ABŞ ordusunun mobil təlimatçıları İrəvana 5 apreldən qabaq gəldilər...
Daşdəmir Əliyev: “ABŞ-ın Ermənistanda hərbi mövcudluğu hətta Rusiya ilə İrəvanın münasibətlərinin rəvan olduğu dönəmdən start götürüb”
ABŞ ordusunun mobil təlimatçıları Ermənistanda səfərdədir. Amerikalı hərbçilər 1-5 aprel tarixində Ermənistan Müdafiə Nazirliyinin ictimaiyyətlə əlaqələr idarəsi və “Zinus media” dövlət qurumunun əməkfaşlarına təlim keçir. Təlimin əsas mövzusunun ictimaiyyətlə əlaqələlər və kommunikasiya olduğu deyilir.
Amerikalı hərbçilərin Ermənistanda məhz aprelin 5-də Ermənistan-Avropa İttifaqı-ABŞ formatında keçiriləcək Brüssel görüşündən öncə gəlməsi maraqlı görünür. Brüssel görüşündə Ermənistanın “təhlükəsizliyi” adı altında Qərb qüvvələrinin bu ölkəyə gətirilməsi məsələsinin müzakirə olunacağı bildirilirdi. Artıq ABŞ hərbçilərinin Ermənistana hissə-hissə gəlməyə başladığını söyləmək olarmı?
Hərbi-siyasi ekspert, ehtiyatda olan polkovnik-leytenant Daşdəmir Əliyev “Bakı-Xəbər”ə açıqlamasında bildirdi ki,
ABŞ-ın Ermənistanda hərbi mövcudluğu hətta Rusiya ilə İrəvanın münasibətlərinin rəvan olduğu dönəmdən start götürüb: “Bu ilin əvvəlində ABŞ-ın Ermənistanda 13-cü hərbi-bioloji laboratoriyasının yaradılmasına hazırlıq getdiyi bəyan edildi. Bildirilib ki, Ermənistanın müdafiə naziri Suren Papikyan ABŞ Müdafiə Nazirliyinin (Pentaqon) nümayəndələri ilə bu barədə müqavilə imzalayıb.
Məlumata görə, həmin laboratoriya Gümrüdə, Rusiyanın 102-ci hərbi bazasının yaxınlığında yerləşəcək.
Qeyd edək ki, hazırda Ermənistanda ABŞ-nin 12 hərbi-bioloji laboratoriyası var. Kreml bu laboratoriyalara qarşı hələ ki, Kollektiv Təhlükəsizlik Müqaviləsi Təşkilatı (KTMT) çərçivəsində hərəkətə keçib. Təşkilatın 2023-cü ildə keçirilən iclaslarında da bu məsələ qaldırılıb. Ermənistanla yanaşı, Qazaxıstanda və Gürcüstanda da ABŞ laboratoriyaları var və hər iki ölkə də Birləşmiş Ştatların hərbi-bioloji layihələrinə cəlb edilib. Kremlin narahatlığı ondan ibarətdir ki, Ermənistanda 12, Qazaxıstanda 6 belə obyekt mövcuddur. Moskva bəyan edir ki, həmin obyektlər bütün dünya üzrə ən təhlükəli virusların saxlanılması üçün anbar rolunu oynaya bilər. Bununla yanaşı, şəxsi heyət sayına və ərazisinə görə ABŞ-ın dünya ölkələrindəki ən böyük səfirliyi də məhz Ermənistanda yerləşir. İstisna deyil ki, belə çoxlu sayda səfirlik kontingentinin arasında peşəkar hərbçilər də mövcud olsun. Avropa Missiyaaı ilə regiona soxulan müşahidəçilərin də, demək olar ki, hamısı hərbçi və jandarm qüvvələrinin təmsilçilərindən ibarətdir. Maraqlıdır ki, rəsmi İrəvanın Qərblə əməkdaşlığı, ora hərbçilərin gəlməsi Tehranı heç qıcıqlandırmır. Məsələn, ABŞ hərbçilərinin bu ölkəyə səfərinə rəsmi Tehran və ona bağlı KİV münasibət bildirməyib. Yəqin heç bildirməyəcək də. Sanki İran Ermənistanın ABŞ-la hərbi əməkdaşlığını alqışlayır və ona bu istiqamətdə dəstək belə verir. Belə gərgin dönəmdə təlim adı ilə Ermənistana gələn ABŞ hərbçilərinin hələ orada çox qalacağını ehtimal edə bilərik”.
Məhəmmədəli QƏRİBLİ
