Qərbin Ermənistanda 2-ci “Ukrayna ssenarisi” bu planla həyata keçəcək...
Elşad Həsənov: “Rusiya Gümrüdəki 102-ci baza vasitəsilə müdaxilə edəcək”
Aprelin 5-də Ermənistan baş naziri Nikol Paşinyanın ABŞ dövlət katibi Entoni Blinken, NATO-nun baş katibi Yens Stoltenberq və Avropa Komissiyasının rəhbərli Ursula Fon der Lyayenlə gözlənilən görüşü Qərbin Ermənistanla bağlı planlarından xəbər verir. Artıq görünən odur ki, Ermənistan hakimiyyəti Qərbin himayəsi ilə Rusiyadan uzaqlaşmaqda qərarlıdır.
Bu görüş faktiki olaraq iştirakçıların Ermənistanın təhlükəsizliyinə təminat vermələrini əks etdirən hərbi-siyasi paktdır. Strateji hədəf Rusiyanı Ermənistandan vurub çıxarmaqdır. Faktiki olaraq, Fransa Ermənistanı 2-ci Ukraynaya çevirmək istəyir. O baxımdan 5 aprel üçtərəfli görüşü də buna hesablanıb. Ancaq istənilən halda Rusiya buna seyrçi yanaşmayacaq.
Maraqlıdır, bəs Ermənistanda 2-ci Ukrayna ssenarisi necə gerçəkləşəcək? Yəni Rusiya ora desant atacaq, ya 102-ci baza xüsusi hərbi əməliyyat keçirəcək? Qərb Ermənistana hansı yolla yardım çatdıracaq - havadan, ya qurudan? Rusiya Ermənistana əlavə hərbi qüvvələri necə yeridəcək? Rusiya Qarabağdakı qüvvələrdən istifadə edəcəkmi?
“Diversiya qrupları və Moskvaya bağlı müxalifət hərəkətə keçəcək”
Sözügedən məsələyə aydınlıq gətirən siyasi ekspert Elşad Həsənov “Bakı-Xəbər”ə açıqlamasında bununla bağlı bir sıra məqamlara toxundu: “Həqiqətən də son dövrlər Fransa Ermənistanı müharibəyə hazırlayır. Bunun üçün Ermənistana silah-sursat, zirehli maşınlar, radioelektron vasitələr verir. Eyni zamanda Ermənistan Hindistandan raketlər, haubitsalar alır. Üstəlik, Qarabağdan çıxarılan hərbi birləşmələrin bir hissəsi Fransada hərbi təlimlərə cəlb olunub. Bununla yanaşı, Fransa hərbi təlimatçıları Ermənistan ordusuna təlimlər keçir. Bunların əsas strateji məqsədi Rusiyanı Ermənistandan çıxarmaqdır. Məsələ ondadır ki, bu gün Rusiya Ukrayna ilə müharibə aparır. Təkcə Ukrayna ilə deyil, Putinin dediyi kimi, NATO ölkələri ilə müharibə aparır. Çünki NATO həm silah-sursat dəstəyi göstərir, həm də blokun məsləhətçiləri Ukraynada fəaliyyət göstərirlər. Ukraynada nisbətən zəifləyən Rusiyanı daha da çökdürmək üçün çoxdandır Qərb bu ölkəyə qarşı ikinci cəbhə açmaq istəyir. Bunun üçün onlar Gürcüstan variantından istifadə etməyə cəhd etdilər, amma rəsmi Tbilisi buna getmədi. Ancaq Gürcüdtandan fərqli olaraq Ermənistan buna gedir. Faktiki olaraq, Ermənistanı Rusiyaya qarşı ikinci cəbhə açmağa hazırlayırlar. Sual doğuran məqam odur ki, Paşinyanı bu qədər cəsarətləndirən nədir. Halbuki, o yaxşı bilir ki, Rusiya bir neçə günə Ermənistanı işğal edə bilər. Burda əsas məqam ondan ibarətdir ki, başda Fransa olmaqla, Qərb Paşinyanı ona təhlükəsizlik zəmanətinin verilməsi ilə bağlı inandırıb. Aprelin 5-də planlaşdırılan görüş də buna hesablanıb. Ancaq Ermənistanın təhlükəsizliyinə nə cür zəmanət verəcəkləri məchuldur. Nə Fransa, nə də ABŞ orduları gəlib Ermənistanda Rusiyaya qarşı döyüşməyəcək. Necə ki, 2008-ci ilin avqustunda Gürcüstan hadisələri zamanı biz bunu görmədik, Ermənistanda da bu olmayacaq. Artıq Rusiya Lavrovun və digər rəsmilərin timsalında Ermənistana xəbərdarlıq edir. Açıq deyirlər ki, proses belə davam edərsə, Ermənistan öz dövlətçiliyini itirəcək. Ermənistanla bağlı kritik vəziyyət yaransa Rusiya Gümrüdəki 102-ci baza vasitəsi ilə müdaxilə edəcək. Orada 5 min rus əsgəri var. O cümlədən Erebunidəki hərbi hava bazasından istifadə edəcək. Bununla paralel diversiya qrupları və Moskvaya bağlı müxalifət hərəkətə keçəcək. Söhbət parlament müxalifətindən və digər qüvvələrdən gedir. Belə olduğu halda Rusiya hava koridoru vasitəsi ilə ora əlavə qüvvələr cəlb edəcək. Qarabağdakı sülhməramlılardan da bu məqsədlə istifadə ediləcəyi istisna olunmur. Fikrimcə, Rusiya geri çəkilməyəcək və Qərb sona qədər Paşinyanın yanında dayanmayacaq”.
Vidadi ORDAHALLI
