Paşinyan Zəngəzur dəhlizinə fantastik alternativ layihəsini yunan qardaşları ilə bölüşdü...
Bəhruz Quliyev: “Paşinyanın dedikləri onsuz da sülh razılaşmasında əksini tapır”
“Azərbaycandan yollar, boru kəmərləri, kabellər Ermənistandan keçərək Türkiyəyə getməlidir”. Bu barədə Ermənistanın baş naziri Nikol Paşinyan Yunanıstanın “Katimerini” nəşrinə eksklüziv müsahibəsində deyib.
Onun sözlərinə görə, Cənubi Qafqazda sülh və sabitlik çərçivəsində regionun infrastrukturlarının açılmasına önəm verir. “Həmçinin Xəzər dənizini Ermənistan ərazisi ilə Aralıq dənizinə birləşdirə biləcək Şərq-Qərb qanadı, Qara dənizdəki Türkiyə limanları var. Bunun üçün Azərbaycandan Ermənistandan keçən dəmir və avtomobil yolları, boru kəmərləri, elektrik xətləri, kabellər Türkiyəyə çatmalıdır. Biz belə qərarlara hazırıq. Bu yolun infrastrukturu Azərbaycanın əsas hissəsi ilə Naxçıvan arasında əlaqə üçün də istifadə oluna bilər və biz buna da hazırıq. “Dünyanın kəsişməsi” layihəsində bütün bu infrastrukturların işləməsi üçün biz məlum prinsipləri müəyyən etmişik”.
Paşinyan onu da qeyd edib ki, bütün infrastrukturlar ərazisindən keçdiyi ölkələrin suverenliyi və yurisdiksiyası altında olmalıdır.
“Sadəcə olaraq, sülh razılaşmasını başa çatdırmaq və bunun üçün iradə göstərmək lazımdır”
Sözügedən məsələni “Bakı-Xəbər”ə şərh edən “SƏS” Media Qrupunun rəhbəri, politoloq Bəhruz Quliyev buna bir neçə aspektdən yanaşdı: “Nikol Paşinyanın müxtəlif dünya və yerli mətbuata verdiyi açıqlamaları, atdığı addımlar ziddiyyət təşkil edir. Çünki sözdə “Sülhə hazırıq”, “Sülhün tərəfdarıyıq”, “Biz cəhd edirik” kimi ifadələr istifadə olunsa da, əməldə bunun tam əksini görürük. Bu onu göstərir ki, Ermənistanın sözü ilə əməli üst-üstə düşmür. Biz bunu illərdir sınaqdan keçirmişik. Ona görə də Nikolun səsləndirdiyi fikirər o qədər də səmimi deyil. Paşinyanın dedikləri onsuz da sülh razılaşmasında əksini tapır. Yəni burada yeni bir şey yoxdur. Sadəcə olaraq sülh razılaşmasını başa çatdırmaq və bunun üçün iradə göstərmək lazımdır. Bir sözlə, söz və əməl eyni olmalıdır. Çünki Ermənistan başqa yolla düşdüyü vəziyyətdən çıxa bilməyəcək. Ermənistan artıq bilir ki, onun rifahı yalnız Azərbaycanla əməkdaşlıqdan, regionda qonşularla normal qonşuluq münasibətləri qurmaqdan və qarşılıqlı faydalı layihələrdən keçir. O baxımdan hesab edirəm ki, gələcək sülh razılaşmalarında bütün bəndlərin hər biri həm regionun inkişafına, həm də Şərq-Qərb arasında olan münasibətlərin iqtisadi, diplomatik, mədəni inkişafına xidmət edir. Ona görə də əgər Cənubi Qafqazda sülh baş tutarsa, bu bütün Qafqaz və Avropa ölkələri üçün faydalı əməkdaşlığa yol aça bilər. Baxmayaraq ki, Qərb Qafqazda yeni münaqişə ocağı alovlandırmaq niyyətindədir, Ermənistan bu təxribata getməməlidir”.
Vidadi ORDAHALLI
