Dövlətlər bir-bir "yüksək terror təhlükəsi" elan edir - Azərbaycan təhlükədən yenə uzaqdır...
Elşən Həsənov: “Məhz elə buna görə də Prezident İlham Əliyev qeyd edir ki, bu gün Azərbaycan təhlükəsizlik adasıdır”
Bəzi ölkələrdə Moskva terrorundan sonra yüksək terror təhlükəsi elan edilib. Azərbaycan üçün isə terror təhlükəsinin mövcudluğu həqiqətən ciddi görünmür. Azərbaycan bu təhlükədən niyə bu qədər azad və uzaq görsənir?
Təhlükəsizlik orqanlarının veteranı Elşad Həsənov “Bakı-Xəbər”ə açıqlamasında bildirdi ki, terrorizm əsrin bəlasıdır və hər bir ölkə üçün böyük təhlükədir: “Martın 22-də Moskvada törədilən terror aktı son zamanın ən dəhşətli nümunələrindəndir. Bu terrorun məqsədi və hədəfi birbaşa Rusiya dövlətini sarsıtmaq olub. Bunun da çox ağır nəticələri oldu. Putin öz çıxışında bildirdi ki, bunun arxasında duran Ukraynadı və yaranmış vəziyyətlə bağlı ciddi tədbirlər görəcəklər. Terror təşkilatlarının ilk rüşeymlərindən birini ermənilər qoyub. 1890-cı ildə yaradılan “Daşnaksütyun” partiyasından azərbaycanlılara və türklərə qarşı istifadə ediblər. Sonra Beyrutda Ermənistan Gizli Ordusu adlı təşkilat yaranıb. Onlar 19 türk diplomatını öldürüblər. ASALA isə 1975-ci ildə Livanda yaranıb. Əsas məqsədləri qondarma “böyük Ermənistan” ideyası olub. ASALA ilə sıx əlaqədə olan bu təşkilat Qarabağda erməni əhalini silahlandırmaqda iştirak edib. 1990-cı ildə ermənilər Tiflis-Ağdam avtobusunu partladıblar. Ardınca Bakı metrosunda terror törətdilər. Qardaş Türkiyə də PKK adlı terror təşkilatının əməllərindən əziyyət çəkir. BMT 1999-cu ildə “Terrorçuluğun Maliyyələşməsi və Mübarizə Haqqında” Beynəlxalq Konvensiya qəbul etdi. Azərbaycan bu Konvensiyaya 2001-ci ildə qoşulub. Terrorçuluğun 3 növu var: fərdi, mütəşəkkil və dövlət terrorçuluğu. Yəni bu gün baş verən terror hadisələri buna misaldır. Qlobal terrorizm indeksi - indeks 2024 deyilən bir şey var. Hesabatı ilə dövlətin terror təhlükəsinə görə növbəti reytinq sıralaması təqdim olunub. Ərazisində terrorçuluq fəaliyyəti və terror təhlükəsi ən yüksək olan ölkələr arasında ilk sıralamada İsrail, Mali, Pakistan, Suriya, Əfqanıstan durur. Bu sıralamada İran 26 - cı yerdə, Türkiyə 29 - cu, ABŞ 30 - cu, Rusiya 35 - ci, Fransa 38 - ci, Norveç 53 - cü, Ermənistan 76 - cı, BƏƏM 79 - cu, Litva 87 - ci yerdə sıralanıb. Bu qlobal terrorizm reytinq sıralaması indeksləri terror hadisələri, terrorçuluqla mübarizə və onun araşdırılması üzrə qəbul edilmiş mürəkkəb hesablamalara əsaslanır. Azərbaycan Respublikası terror təhlükəsi üzrə reytinqdə qeyd olunan sıralamada 0 indekslə sonuncu 89 - cu yerdə Danimarka, Finlandiya kimi ölkələrlə birgə qərarlaşmaqla, dünyada terrorla bağlı ən təhlükəsiz ölkələrdən biri kimi ən yüksək reytinqə sahiblənib. BMT İqtisadi Əməkdaşlıq və İnkişaf Təşkilatının, dünya bankının, digər beynəlxalq təşkilatlar, qeyri - hökümət təşkilatlarının sitat mənbəyi kimi çıxış edən qlobal terrorizm indeks hesabatları iqtisadiyyat və sülh institutu tərəfindən dövri olaraq açıqlanır. Eyni zamanda bildirilir ki, daha əvvəl Avropa Şurasının çirkli pulların yuyulması və terrorizmin maliyyələşdirilməsinə qarşı tədbirlərin qiymətləndirilməsi üzrə ekspert və komitənin Azərbaycan üzrə son 5 il ərzində qiymətləndirmə hesabatı açılmışdı. Hesabatda Azərbaycan qeyd olunan cinayətlərlə mübarizədə yüksək səviyyədə effektə nail olub və bu cinayətlərin araşdırılmasının uğurla aparılmasına dair bacarıqları qeyd olunmuşdu. Beynəlxalq hesabatlardan göründüyü kimi, nə qədər həssas və mürəkkəb geosiyasi məkanda olsa da, uğurlu dövlət siyasəti nəticəsində bərqərar olmuş sürətli inkişaf, terrorçuluqla mübarizə sahəsində Azərbaycan dünyada ən yüksək təhlükəsizlik reytinqinə sahib olmuşdu. Məhz elə buna görə də Prezident İlham Əliyev qeyd edir ki, bu gün Azərbaycan təhlükəsizlik adasıdır. Buna misal olaraq da, Dövlət Təhlükəsizlik Xidmətinin son günlər ictimaiyyətə açıqladığı həbslərlə bağlı, Bəhruz Əsgərov haqqında məlumatların araşdırılması göstərildi. Bəhruz Əsgərov da öz çıxışında bildirdi ki, terrorçuluqda ittiham olunmuş Yunis Səfərova görə Lənkəran Şəhər İcra hakimiyyətinin başçısı Qaraşova qarşı terror hadisəsi törətmək istəyirdilər. Azərbaycanda fəaliyyət göstərən xarici dil müəllimlərinə qarşı terror hazırlayıb, vahimə, dövlətə inamsızlıq yaratmaq məqsədi güdüblər. Təbii ki, bunun da arxasında duran qüvvələr var. Onlara qarşı təhlükəsizlik orqanları mütəmadi işlər həyata keçirir. Bir müddət əvvəl Azərbaycan parlamentinin üzvü Fazil Mustafaya qarşı terror hadisəsi lazımi səviyyədə həll olundu. İran tərəfindən maliyyələşdirildiyi, göstəriş aldığı müəyyən olundu. Bu gün də Azərbaycan ağır bir geosiyasi məkanda yerləşir. Çünki ətrafımızda Azərbaycanın inkişafını istəməyən İran, Ermənistan kimi xarici qüvvələr var ki, onlar daima Azərbaycanda qarışıqlıq salmaq istəyirlər. Ancaq buna nail ola bilmirlər. Çünki Azərbaycanın çox doğru daxili və xarici siyasəti, müzəffər Ali Baş Komandanı var”.
Məhəmmədəli QƏRİBLİ
