İctimai nəqliyyata 2500 lüks avtobus alınacaq - özəl sektor işi yarıtmadı...
Bakı sakinlərinin uzun müddətdir davam edən ictimai nəqliyyat problemi hələ də öz həllini tapmayıb. Vətəndaşlar uzun müddət dayanacaqda marşrut avtobusları gösləməli olur və uzun fasilədən sonra gələn avtobuslar da problemi həll etmir. Mövcud problemin səbəbi isə müxtəlif amillərlə izah edilsə də, yenə əziyyət çəkən paytaxt sakinləri olur.
Qeyd edək ki, Milli Məclisin İqtisadi siyasət, sənaye və sahibkarlıq komitəsində keçirilən ictimai dinləmədə Rəqəmsal inkişaf və nəqliyyat nazirinin müavini Rəhman Hümmətov ictimai nəqliyyatla bağlı bəzi fikirlər səslədirib. O etiraf edib ki, bu gün ictimai nəqliyyatda 2000 avtobus var, onların da yarısı tələblərə cavab vermir, köhnədir: “Bu gün bizə ictimai nəqliyyatda 2500 avtobus lazımdır. Bunu özəl sektorun öhdəsinə qoyduq, amma görürük ki, öhdəsindən gələ bilmir. Tariflərin o həddə qədər artırılmasına biz də qarşıyıq. Dünya ölkələrində ictimai nəqliyyata dövlət dəstəyi var. Bizdə də buna gediləcək”.
Xatırladaq ki, hələ 2018-ci ildə prezident İlham Əliyev Bakı şəhərində avtobus parkının yenilənməsi haqqında sərəncam imzalayıb. Sənəddə qeyd edilirdi ki, 2015-ci ildən başlayaraq üç il ərzində 300-dən artıq müasir orta və iritutumlu avtobus alınaraq Bakı şəhərinin marşrut şəbəkəsində istismara buraxılıb. Dövlət Statistika Komitəsinin məlumatlarında da hər il təzə avtobusların alınması ilə bağlı xəbərlərə rast gəlinir.
Elməddin Muradlı: “Gediş haqqı artandan sonra dövlət özəl sərnişin daşıyıcı şirkətlərə heç bir dotasiya vermir”
Nəqliyyat məsələləri üzrə ekspert Elməddin Muradlının sözlərinə görə, gediş haqqı artandan sonra dövlət özəl sərnişin daşıyıcı şirkətlərə heç bir dotasiya vermir: "Yalnız dövlət şirkəti olan "BakuBus"a vəsait ayırır. Məlumdur ki, Bakıda bir-birinin marşrutunu təkrarlayan fərqli avtobuslar var. Hər bir daşıyıcı şirkət və yaxud da fərdi sahibkar baxır harada daha çox pul var, avtobus alır, xəttə buraxır. Əvvəllər bu açıq "bazar" idi. Digər həssas qrup insan da var idi, onlar təsir imkanlarından bəhrələniblər və marşrutlar açıblar. Həmin marşrutlar üzrə fəaliyyət göstərən avtobusların bir çoxu yararsızdır. Hazırda var gücü ilə işləyəndə 2 min avtobus xəttə çıxara bilirlər. Məlumat üçün deyim ki, Bakıda isə təxminən 2 min 600 avtobusa ehtiyac var. 600 avtobus hazırda çatmır və bu, kiçik rəqəm deyil".
Elxan Əliyev: “Avtobus parkının yenilənməsi üçün həmin marşrutda çalışan avtobus parkı sahiblərinə hardasa güzəşt təklif olunmalıdır”
Sosial sahə üzrə ekspert Elxan Əliyev “Bakı-Xəbər”ə şərhində bildirdi ki, bu gün Bakıda xəttə buraxılan avtobusların sayının az olmasının səbəbi təkcə onların nasaz olması ilə bağlı deyil: “Qəsəbə və kəndlərdə ictimai nəqliyyat problemi daha çox nəzərə çarpır. Bu problem avtobusun texniki baxımdan yararsız olmasından, interval müddətinin çox olmasından və digər səbəblərdən yaranır. Onu da vurğulamaq lazımdır ki, avtobusların sayı kifayət qədər azdır. Bu məsələlərə nəzarət edən qurum qanunvericilik üzərindən cəlbedici təkliflər verməlidir ki, iş adamlarının marağı artsın. İnterval və avtobus parkının yenilənməsi üçün həmin marşrutda çalışan avtobus parkı sahiblərinə hardasa güzəşt təklif olunmalıdır ki, buna maraq yaransın”.
Günel CƏLİLOVA
