Keçmiş Ermənistan naziri qondarma "Artsax"ın Avropada əsas fiquruna çevrildi...
Samir Hümbətov: “Əgər hər hansı bir formada Azərbaycanın ərazi bütövlüyünə qarşı hörmətsizlik olacaqsa, biz Avropa ilə siyasətimizə yenidən baxmalı olacağıq”
Qarabağ iddiasından əl çəkməyən separatçılar bu ilin yanvar ayında yaratdıqları qondarma “artsax məsələləri üzrə beynəlxalq komitə”ni aktivləşdirməyə çalışır. Komitənin ideya müəllifi, həm də koordinatoru olan keçmiş xarici işlər naziri Vardan Oskanyanın hazırda Avropada görüşlər keçirdiyi haqda məlumatlar var.
Erməni mənbələr Oskanyanın son günlər ərzində 16 görüş keçirdiyini yazır. Əsas diqqətçəkən məqam onun Avropa İttifaqının Cənubi Qafqaz üzrə xüsusi nümayəndəsi Tovio Klaarla da görüşü haqda məlumatın olmasıdır.
Qondarma “Artsax” ideyasının belə geniş təbliğatı və Avropa rəsmilərinin buna göstərdiyi diqqət nədən xəbər verir?
Siyasi şərhçi Samir Hümbətov “Bakı-Xəbər”ə açıqlamasında bildirdi ki, qondarma “Artsax”ın yenidən aktivləşdirilməsi cəhdlərinin daha rasional aparılmasının arxasında bir neçə səbəb var. Hesab edirəm ki, Avropa Azərbaycana qarşı qondarma, saxta rejim üzərindən təsir etməyə çalışır. Aydın məsələdir ki, Vardan Oskanyan uzun illər Ermənistan xarici işlər naziri olub və onun əsas fəaliyyət istiqaməti Qarabağı Ermənistanın əlində saxlamaqdan ibarət olub. Təbii ki, həmin dönəm Qarabağla bağlı danışıqlarda daşlaşmış dövr sayıla bilər. Yəni bir addım belə iraliyə atılmayıb. Amma deyə bilmərik ki, sırf belə addımların atılması, Avropada görüş keçirilməsi oradakı saxta rejimin yenidən aktivləşdirilməsinə hansısa müsbət təsir edə bilər. Biz Avropa İttifaqının qarşısına bunu qoya bilərik ki, ali dəyərlərdən danışırsızsa, Azərbaycanın bütövlüyünü nə üçün tanımırsız? Nəzərə almaq lazımdır ki, bu, Avropa İttifaqıdır. Qərb təsisatlarında ikiüzlülük xüsusilə davam edir və bu gün Azərbaycana qarşı da baş verir. Qərb ölkələrində hazırda Azərbaycana qarşı hansısa yumşalma siyasəti yoxdur. Bütün vasitədən istifadə edib, öz güclərini burada yenidən bərpa etməyə çalışırlar. Mən düşünürəm ki, keçirdiyi 16 görüşün hər birinin arxasında Azərbaycana qarşı çirkin niyyətin olduğu açıq-aşkar görünür. Biz, təbii ki, adekvat addımları atırıq. Ancaq hər halda Qərb təsisatlarına o mesaji verməliyik ki, bilsinlər. Əgər hər hansı bir formada Azərbaycanın ərazi bütövlüyünə qarşı hörmətsizlik olacaqsa, biz Avropa ilə siyasətimizə yenidən baxmalı olacağıq. O zaman onlar da tutduqları yanlış yola yenidən baxmalı olacaqlar. Yaranan istənilən problem onların Azərbaycanla əlaqələrinə, enerji siyasətinə ciddi zərbə ola bilər”.
Ermənilərin bugünlərdə Almaniyanın paytaxtı Berlində keçirməyi planlaşdırdıqları “Artsaxın mədəni irsi” adlı kitabın geniş təqdimat mərasimi təxirə salınıb.
Xatırladaq ki, ermənilər martın 6-da Berlində “Artsaxın mədəni irsi” adlı kitabın təqdimatı məqsədilə geniş tədbir keçirməyi planlaşdırırdılar. Avropada yaşayan azərbaycanlılar və diaspor təşkilatları təqdimat mərasimində iştirak etmək üçün qeydiyyata düşmək məqsədilə davamlı olaraq müraciətlər edib və tədbirin qarşısının alınması üçün ciddi cəhd göstəriblər.
Məhəmmədəli QƏRİBLİ
