Bu təklif keçsə, 110 min ailənin uşağı müavinət alacaq...
Fatimə Hacıbəyli: “Çoxuşaqlı anlayışının 5 uşaqdan 3-ə endirilməsi müsbət qiymətləndirilməlidir”
Ailələrdə uşaqların sayı ilə bağlı müzakirə hər zaman aktual olub. Son illər isə Azərbaycan cəmiyyətində bu mövzu ilə bağlı müzakirələr daha da aktuallaşıb. Ölkəmizdə “çoxuşaqlı ailə” modeli tədricən sıradan çıxmaqdadır.
On ildən çoxdur ki, müasir ailələr ya bir, ya iki uşaqla kifayətlənirlər. Hazırda 3-4 uşağı olan ailələrin sayı barmaqla sayılacaq qədərdir, 5-6 uşaqlı ailələrə isə nadir hallarda rast gəlinir. Bu səbəbdən də 3-dən daha artıq uşaq olan ailələrin çoxuşaqlı ailə sayılması təklif olunur. Belə bir təklif Milli Məclisin Əmək və sosial siyasət komitəsinin ötən iclasında deputat Vüqar Bayramov tərəfindən səslənib: “Biz çoxuşaqlı anlayışını 5-dən 3-ə endirsək, bu o deməkdir ki, 110 min ailə bu hüquqdan yararlana biləcək. Yəni 110 min ailədə yaşayan uşaqlar sosial müavinət ala biləcəklər. Çoxuşaqlı ailə anlayışına yenidən baxılsın. Çoxuşaqlı ailələr 5-dən 3-ə endirilsin".
Qeyd edək ki, bu təklif ölkə ictimaiyyəti tərəfindən yüksək qiymətləndirilir.
“Belə bir təklif müsbət dəyərləndirilərsə, bu ümumi demoqrafik vəziyyətə, ailələrə yardım nöqteyi-nəzərindən müsbət addım ola bilər”
“Vəfa” Sosial İctimai Birliyinin sədri Fatimə Hacıbəyli “Bakı-Xəbər”ə açıqlamasında qeyd etdi ki, çoxuşaqlı ailələrin sayı sürətlə azalır. İndi ailələr az uşağa üstünlük verməyə başlayıb. Bunun səbəbləri isə müxtəlifdir: “Belə ki, son dövrlərdə yaşam tərzinin ağırlaşması, müasir texnologiyaların artması, sosial şəbəkələr və s. bu kimi amillər ənənəvi ailə modelini pozub. Artıq əvvəllər olduğu kimi insanlar ailə qurub oğul-uşaq sahibi olmaq barədə düşünmür”.
Birlik sədri hesab edir ki, çoxuşaqlı anlayışının 5 uşaqdan 3-ə endirilməsi müsbət qiymətləndirilməlidir: “Kütləvi halda ailələrdə uşaqların sayı, demək olar ki, 2-ni keçmir. Bununla əlaqədar çoxuşaqlı anlayışının artıq 5 yox, 3 uşaqlı ailələrə aid olması lazımdır. Azərbaycanın orta statistik məlumatlarına nəzər salsaq, son illərdə artıq 2 uşaqlılıq üstünlük təşkil edir. 5 uşaqdan 3 uşağa enmək ailəyə kömək etmək deməkdir. Həmçinin, belə bir təklif müsbət dəyərləndirilərsə, bu ümumi demoqrafik vəziyyətə, ailələrə yardım nöqteyi-nəzərindən müsbət addım ola bilər”.
Həmsöhbətimiz onu da əlavə etdi ki, bu gün çoxuşaqlı ailələrin az olmasının psixoloji səbəbi valideynlərin çox maksimalist olmaları ilə bağlıdır: “Məsələn, valideyn düşünür ki, bir övladım olsun, amma onu mükəmməl oxudum, mükəmməl yedizdirim, mükəmməl geyindirim düşüncəsi var. Düşünürlər ki, 3-4 uşaq olarsa, onu mükəmməl şəkildə böyüdə bilməz. Bu mükəmməlliyyatçılıq da, təbii ki, xarakterdən və həyat tərzindən irəli gəlir. Mükəmmilliyatçı insanlar hər şeyin ən yaxşısını istəyir. Bunlar ya olursa ən yaxşısı olsun, olmursa, heç olmasın düşüncəsində olan valideynlərdir”.
Günel CƏLİLOVA
