Avroittifaq dondurulan Rusiya aktivləri ilə bağlı qərarını verdi - pul Putinin, faizi Zelenskinin...
Rusiya ilə Ukrayna arasında müharibənin başlamasından sonra dondurulmuş Rusiya aktivləri ilə bağlı Avropa İttifaqından (Aİ) diqqətəlayiq addım atılıb. Yüksək səviyyəli bir məmur Rusiyanın dondurulmuş aktivlərinin qlobal faiz dərəcələrindəki proseslərdən asılı olaraq 2027-ci ilin sonuna qədər 15-20 milyard avro gətirəcəyini gözlədiklərini açıqlayıb. Sözügedən pulların bir hissəsinin müntəzəm olaraq Ukraynaya köçürülməsi gözlənilir.
Aİ ölkələri müharibə səbəbindən Rusiya Mərkəzi Bankının təxminən 200 milyard avrosunu dondurub. Rusiya aktivlərini donduran maliyyə qurumları, müəyyən aralıqlarla yenidən sanksiyalar tətbiq etməklə əhəmiyyətli gəlir əldə edirlər. Aİ tərəfindən dondurulan Rusiya Mərkəzi Bankının ehtiyatlarının 180 milyard avrosu Belçikada yerləşən və maliyyə xidmətləri göstərən “Euroclear” adlı şirkətdə saxlanılır. “Euroclear” bu aktivlərə görə, böyük miqdarda faiz gəliri əldə edir. Belə ki, şirkət keçən il Aİ sanksiyaları səbəbindən dondurulan Rusiya aktivlərinin faizlərindən 3 milyard avrodan çox gəlir əldə edib.
Aİ rəsmisi “Euroclear”ın rus aktivləri üzərindən əldə etdiyi qazancın 25 faizini vergiyə cəlb edən Belçikanın 2024-cü ildə 1,7 milyard avro vergi alacağını gözlədiyini bildirib və bunun 1,5 milyardının bu il Kiyevə göndəriləcəyini qeyd edib. Rəsmi bildirib ki, qalan pul isə 2025-ci ildə Ukraynaya veriləcək.
Bildirilir ki, ABŞ rəsmiləri də Rusiyanın dondurulmuş aktivlərindən Ukraynanın silah alışında istifadə variantını nəzərdən keçirir.
Qeyd edilir ki, Ukrayna ilə Rusiya arasında müharibə başlayandan bəri dondurulmuş Rusiya aktivlərindən əldə edilən qazanc 5,2 milyard avroya çatıb.
Onu da qeyd edək ki, Avropa Mərkəzi Bankı (ECB) ötən ilin iyun ayında Rusiya Mərkəzi Bankının dondurulmuş aktivləri ilə bağlı Aİ Komissiyasına xəbərdarlıq edib. ECB Rusiyanın aktivlərinə və ya gəlirlərinə həbs qoyulmasının avronun qlobal valyuta mövqeyinə və maliyyə sabitliyinə zərər verə biləcəyinə diqqət çəkib.
Avropa Mərkəzi Bankı böyük miqdarda valyuta ehtiyatı olan digər mərkəzi bankların avrodan imtina edə biləcəkləri barədə xəbərdarlıq edib.
Tahir TAĞIYEV
