Ukrayna dronlarla Rusiyanın iki neftayırma zavodunu vurdu...
Ukraynanın Rusiya ərazisinə pilotsuz təyyarələrlə hücumları davam edir. Rusiyanın Rostov və Ryazan şəhərlərindəki iki neft emalı zavodu pilotsuz uçuş aparatları tərəfindən hədəf alınıb, hücumdan sonra neftayırma zavodlarında yanğın baş verib.
Bildirilib ki, Ryazandakı zavoda hücum nəticəsində 3 nəfər yaralanıb. Zavod ildə 12,7 milyon ton neft hasil edilir və Rusiyada istehsal olunan aviasiya yanacağının 8 faizi bu müəssisədə emal olunur. Hücumdan sonra istehsalın dayandığı obyektin axşam saatlarına doğru yenidən istehsala başladığı bildirilib.
Rostov şəhərindəki Novoshakhtinsky neft emalı zavoduna da pilotsuz təyyarənin hücumu nəticəsində yanğın baş verib. Rostov vilayətinin qubernatoru Vasili Qolubev açıqlamasında Ukrayna sərhədinə yaxın şəhərdə Rusiyanın neft obyektinə edilən hücumu təsdiqləyib və hücumda itkilərin olmadığını bildirib.
Rusiyanın Ukrayna ilə sərhədində yerləşən Belqorod da pilotsuz təyyarələrin hədəfi olub. Səhər saatlarında Ukrayna tərəfindən Belqorodda iki pilotsuz təyyarə hücumu həyata keçirilib. Hücum nəticəsində mülki yaşayış məntəqələrinə ziyan dəyib. Belqorod qubernatoru Vyaçeslav Qladkov hücumlarda çoxlu mülki yaşayış məntəqəsinin zərər gördüyünü, 5 nəfərin yaralandığını bildirib.
Ukrayna Müdafiə Nazirliyinin (GUR) Kəşfiyyat Baş İdarəsinin mətbuat katibi Andrey Yusov isə deyib ki, dron hücumlarını təsdiq etməyəcəklər, amma inkar da etməyəcəklər: “Novoşaxtinski neft obyekti Ukraynadakı işğal qruplarını təchiz edən və onlara dəstək verən obyektdir. Bu vəziyyətlə bağlı əlavə şərh verməyəcəyik. Hər kəs əslində nə baş verdiyini mediadan görə bilər. Biz Rusiyanın iqtisadi potensialını zəiflətmək üçün müfəssəl, hesablanmış strategiyanı sistemli şəkildə həyata keçiririk. Biz bunu (hücumu) təsdiq etməyəcəyik, amma inkar da etməyəcəyik. Siz çənlərinizi neftlə doldura bilməyəcəksiniz”.
TAHİR
