Ermənistan eksklav olmayan 4 kəndimizin məsələsini bu məqsədlə uzadır...
Sahil Kərimli: “Azərbaycan ordusu bir neçə saat ərzində keçirəcəyi hərbi əməliyyatlar nəticəsində bu kəndləri geri qaytara bilər”
Azərbaycanın Ermənistan tərəfindən işğal edilmiş 4 eksklav olmayan kəndinə (Bağanis Ayrım, Aşağı Əskipara, Xeyrimli və Qızılhacılı) gəldikdə, onlar mübahisəsiz Azərbaycana məxsusdur və dərhal azad edilməlidir.
Bu barədə dövlət sərhədinin delimitasiyası üzrə Azərbaycanda və Ermənistanda yaradılmış komissiyaların görüşləri barədə Azərbaycan Respublikası Baş nazirinin müavini Şahin Mustafayevin xidmətindən verilən məlumatda bildirilib.
Qeyd olunub ki, delimitasiya prosesi çərçivəsində Azərbaycanın Ermənistanın işğalı altında olan 4 eksklav kəndinin (Yuxarı Əskipara, Sofulu, Barxudarlı və Kərki) azad edilməsi məsələsi də həll olunacaq.
Maraqlıdır ki, Ermənistan eksklav olmayan 4 kəndimizi qaytarmaqda ləng mövqe tutur. Axı, qeydsiz-şərtsiz qaytarmalıdır. Məqsədi nədir?
Siyasi şərhçi Sahil Kərimli “Bakı-Xəbər”ə açıqlamasında bildirdi ki, Ermənistan zaman - zaman işğalçılıq siyasəti həyata keçirib: “Bu bütün dünyaya yaxşı məlumdur. Ermənistanın düşmənçilik siyasətindən 30 ilə yaxındır əziyyət çəkən Azərbaycan dövləti ərazi bütövlüyünü öz gücünə tam bərpa etdikdən sonra növbəti hədəfimiz Ermənistanla sülh müqaviləsi imzalamaqdır. Təbii ki, hazırda bir neçə kəndimiz Ermənistanın işğalı altındadır. Bu da o deməkdir ki, Ermənistan yenə işğalçılıq siyasətini davam etdirir, qeyri - konstruktiv mövqe tutmağa çalışır. Ərazilərin qaytarılmamasının başlıca səbəbləri də Ermənistanın danışıqlar masasında nəyəsə nail olmaq istəməsi, bu kəndləri əlində bir vasitə kimi istifadə etməyə çalışması, sülh danışıqları masasında bu vasitədən istifadə edərək, nəyəsə nail olmaq niyyətidir. Ancaq Ermənistan yenə də hər zamanki kimi yanılır. Onun yeganə yolu Azərbaycanla münasibətləri normallaşdırmaq, xüsusilə də Azərbaycanın irəli sürdüyü şərtləri qəbul edərək, sülh müqaviləsi imzalamaqdır. Əgər belə olmayacaqsa, o zaman Azərbaycan daim gündəmdə saxladığı B variantına əl atacaq. Bu da o deməkdir ki, Azərbaycan ordusu bir neçə saat ərzində keçirəcəyi hərbi əməliyyatlar nəticəsində bu kəndləri geri qaytara bilər”.
Qeyd edək ki, Ermənistan bu kəndləri qaytarmamaq üçün əlindən nə gəlirsə, edir. Bunun üçün müxtəlif bəhanələr uydurur. Ermənistan Baş nazirinin müavini, Ermənistanla Azərbaycan arasında dövlət sərhədinin delimitasiyası və sərhəd təhlükəsizliyi məsələləri üzrə Komissiyanın sədri Mher Qriqoryanın ofisi martın 6-da bildirib ki, Azərbaycanın 4 kəndi tələb etməsi, əslində, Ermənistanın 31 qeyri-anklav yaşayış məntəqəsinin ərazisinin "işğal"ını tanımaqdan imtina etdiyini və Bakının öz qoşunlarını Ermənistan ərazisindən çıxartmaq niyyətində olmadığını təsdiq edir.
Prezident İlham Əliyev bu il yanvarın 10-da yerli telekanallara müsahibəsində bildirib ki, Azərbaycanın işğal altında qalan səkkiz kəndinin məsələsi daim gündəlikdədir:
"Orada anklav və qeyri-anklav kəndlər var. O kəndlər ki anklav kəndlər deyil, həmin dörd kənd Azərbaycana qeyd-şərtsiz qaytarılmalıdır. O kəndlər ki anklav kəndlərdir, - çünki Ermənistanın bir anklav kəndi Azərbaycan ərazisindədir, - həmin kəndlərlə əlaqədar ayrıca bir ekspert qrupu yaradılmalıdır və o, müzakirə edilməlidir. Biz hesab edirik ki, bütün anklavlar qaytarılmalıdır. Bu anklavlara gedən yollarda şərait olmalıdır və bu anklavlara orada yaşayan insanlar yerləşdirilməlidir".
Məhəmmədəli QƏRİBLİ
