Lənkəranın dağılıb sıradan çıxan kənd yolları...
Lənkəran rayonunda illərdir ki, əksər kənd yollarının təmiri yerli məmurların yadına düşmür. Bəlkə də düşür, amma bilə-bilə əhalinin rahat güzəranına əngəl olurlar. Axı, ömrünü başa vuran yararsız yolda hərəkət etmək çətin, hətta insan həyatı üçün təhlükəlidir.
Odur ki, rayonda Separadi, Tükəvilə, Diryan və Gəgiran kəndlərinin sakinləri keçilməz yollarla bir yerə çıxanda sağ-salamat mənzil başına çatacağına indi ümid etmirlər. Bir yandan da asfaltı çoxdan dağılmış, üstü çala-çuxurlu yollar indiki inkişaf etmiş zamanla heç bir araya sığışmır. Deyilənlərə görə, artıq respublikamız öz dinamik inkişafi ilə bütün dünyaya meydan oxuyur. Digəl, Lənkəranın çala-çuxur yollarını görəndə adam tam bunun əksini düşünür.
Burada dövlətdən incik düşmək isə heç insafdan deyil. Yəni respublikanın hər yerində olduğu kimi, Lənkəranda da yolların təmirindən ötrü növbəli şəkildə maliyyə vəsaiti ayrılıb. Lakin həmin pulların çox hissəsi əhalinin rahatlığına yox, rayonun səlahiyyət sahiblərinin öz “təmirlərinə” sərf olunub. Xalqını özündən çox sevən, həmişə insanların rahatlığını düşünən ölkə başçısının isə bunlardan xəbəri yoxdur. Yoxsa əhalinin qayğısına qalmayan, vəzifə kreslosuna güvənib haram yolla mal-mülk sahibi olanlar indi layiqli cəzasına çatmışdı. Ölkə başçısı yorulmadan çalışır ki, ona ürəkdən bağlanan hər bir Azərbaycan vətəndaşı gün-güzəranını rahat qura bilsin.
Bəli, Lənkəranın Separadi, Tükəvilə, Diryan və Gəgiran kəndlərinin sakinləri yollardan son vaxtlar daha çox narazıdırlar: “Biz çox pis vəziyyətdəyik. Yollarımız bərbad gündədir, gediş- gəlişdə çətinlik çəkirik, maşınlar dağılır, sürmək olmur. Maşınlarımız ayda iki dəfə ustada olur. Xəstəmiz olanda təcili yardım gələ bilmir. Yayın toz-torpağı bir yana, bir balaca göyün üzünə bulud gələndə canımızı qorxu alır. Çünki, yağış yağan kimi çuxurlar dolur. Sürücülər məcburiyyət qarşısında ya piyada yoluna, ya da qarşı istiqamətə çıxmalı olurlar. Bu hal isə yolda ciddi təhlükəyə səbəb olur”.
Zəfər ORUCOĞLU
Azərbaycan Jurnalistlər Birliyinin üzvü
