Paşinyan tarixi “Quran” nümunəsini iranlı qardaşlarına yox, Misirə hədiyyə etdi...
“Görün, Paşinyanın İrana münasibəti necə qeyri-səmimidir ki, qiymətli Quran surəsini ona vermədi”
Ermənistanın Baş naziri Nikol Paşinyan Misir Ərəb Respublikasına iki günlük səfəri zamanı Əl-Əzhərin ali imamı Şeyx Məhəmməd Əhməd ət-Tayib ilə görüşüb. Erməni mətbuatı yazır ki, Paşinyan Əl-Əzhərin ali imamına Quranın 1719-cu ilə aid ilk surəsinin Matenadaranda saxlanılan nüsxəsini hədiyyə edib.
Maraqlıdır, Paşinyan Matenadaranda saxlanılan 1719-cu ilə aid Quran surələrini nə yaxşı İrana vermir, götürüb Misirə verib? Halbuki, İran dünyada islam dininin daha böyük mərkəzi kimi tanınır, nəinki Misir. Paşinyan bu Quran ayəsini Misirə niyə aparıb, nə üçün iranlı qardaşlarına verməyib?
“O, İranın müsəlmanlığına ciddi yanaşmır, yanaşsaysı onu çoxdan İrana verərdi”
AMEA-nın Qafqazşünaslıq İnstitutunun Qafqaz tarixi şöbəsinin müdiri, professor Qasım Hacıyev “Bakı-Xəbər”ə şərhində bildirdi ki, hazırda Ermənistan yeni “dost” axtarışındadır və indi də özünü Misirə yaxın göstərmək istəyir. “Paşinyan özünü müsəlman aləminə yaxınlaşdırmaq, ölkəsini “tolerant” kimi qələmə vermək üçün hər cür cildə girir. Anlamır ki, onun bu davranışları kənardan gülünc görsənir. Paşinyan da özündən əvvəlkilər kimi dindən siyasi məqsədlər üçün istifadə edir, bunu özü də dilə gətirir. Misir səfərindəki davranışı ilə Ermənistanın siyasətini bir daha ifşa etdi. O unudur ki, din, siyasət və elm bir-birindən ayrı məfhumlardır. Amma Ermənistan siyasətində bunlar bir-birinə qarışdırılır və alət kimi istifadə edilir. Aydın olur ki, ermənilər üçün müqəddəs bir şey qalmayıb. Monoetnik dövlət olan Ermənistanı “tolerant” rolunda təqdim etməklə belə mənzərə yaratmaq istəyir ki, guya Ermənistan da tolerant bir ölkədir, guya dini dözümlülük göstərir. Amma halbuki, özlərindən başqa heç kəsi sevmirlər, Qriqoryanlığı bütün dinlərdən üstün tuturlar. Ermənistan heç xristianlığın özünə də hörmət qoymur. Monoetnik Ermənistanın əhalisinin 2 faizdən azı başqa xalqlardır, onlara da tutduqları divanı tarix unutmaz. Bütün ədalətsizlikləri, haqsızlıqları edən Ermənistanın bütün bunları unudub özünü tolerant kimi təqdim etməsi gülünc çıxır.
Quran ayəsinin Misirə verilməsinə gəlincə, deyim ki, Paşinyan indi də bu yolla ərəb dünyasına yarınmaq istəyir. Görsənir ki, o, Misirdən hansısa mənada siyasi dəstək almaq istəyir, bu səbəbdən də Quran ayəsini onlara bağışlayıb. Gizlin deyil ki, Ermənistan heç İranla da münasibətlərdə səmimi deyil, sadəcə İrandan öz məqsədləri üçün yararlandıqları üçün özlərini İranpərəst göstərirlər.
Bu gün İran özünü dünyanın ən öndə gedən müsəlman, islam ölkəsi hesab edir. Çünki dövlətin adında da bu var, orada yaşayan xalqların başına da islam bayrağı altında hər cür oyunlar açırlar”-deyə Q.Hacıyev qeyd etdi.
Q.Hacıyevin sözlərinə görə, Paşinyan siyasi liderdən çox jurnalist olduğu üçün İran haqda da məlumatı var və İranın necə müsəlman ölkə olduğunu bilir. “Paşinyan Quranın XVIII əsrə aid olan surəsini İrana yox, Misirə verməklə İrana müsəlman ölkəsi kimi qeyri-ciddi yanaşdığını göstərir. O, İranın müsəlmanlığına ciddi yanaşmır, yanaşsaysı onu çoxdan İrana verərdi. Necə ola bilir ki, İrəvanda azərbaycan türklərinin mirası olan məscidin ora-burasına fars elementləri yapışdırıb onu “fars məscidi” adlandırır, amma Quran surəsini bu ölkəyə vermir? Vaxtilə Şuşadakı Gövhər ağa məscidini də “fars məscidi” kimi qələmə verib İrana yarınırdılar. Görün, Paşinyanın İrana münasibəti necə qeyri-səmimidir ki, qiymətli Quran surəsini ona vermədi, amma böyük təntənə ilə Misir imamına verdi”-deyə Q.Hacıyev qeyd etdi.
Amma bununla belə, Q.Hacıyev hesab edir ki, Paşinyanın burada ayrıca məqsədi var və o məqsədini icra etmək istəyir. Q.Hacıyev əlavə etdi ki, Ermənistanın özünün heç bir sərvəti yoxdur ki, götürüb onu hədiyyə etsin, heç İrəvan konyakı da indi işə yaramır. “Bir məsələ də var, görəsən Paşinyanın Misir imamına verdiyi Quran surəsi oriinaldırmı? Bilirsiz, onlarda o qədər saxta, qondarma əlyazmalar var ki, saymaqla bitməz. Bu cür əlyazmalarla Matenaaranı doldurublar.
Orada müsəlman irsinə aid olan örnəklər var, amma orijinallığı şübhəlidir”-deyə Q.Hacıyev qeyd etdi.
İradə SARIYEVA
