Tehran rejiminin Güney Azərbaycanı xəritədən silmək planı - Azərbaycanlılara qarşı kürd kartı işə salındı...
Bir neçə gün əvvəl İranda keçirilən seçkilərdə 7 kürd namizədin Güney Azərbaycan şəhərlərində parlamentə seçilməsi ciddi müzakirələrə səbəb olub. Seçkidən sonra PKK bayraqları ilə keçirilən bayram şənlikləri bölgədə gərginliyə səbəb olub. Cənubi Azərbaycan şəhərlərində yaranan vəziyyət Suriyada Tel Abyat, Menbic, Hələb çölü, Qamışlı, Həsəkə, İraqda Ərbil, Mosul və hətta Kərkükün türklərdən təmizlənməsi və kürd şəhərlərinə çevrilməsi planının davamı kimi şərh edilir.
Bununla bağlı “Türkiye” qəzetinə açıqlama verən iranlı tədqiqatçı və akademik Həmid Sefidgar hadisələri əvvəlcədən hazırlanmış saxta xəritə planının davamı kimi xarakterizə edib. Sefidgar deyib ki, bölgənin türksüzləşdirilməsi layihəsi yeni deyil, amma hazırkı məqam yeni mərhələdir: “Normal şəraitdə Qərbi Azərbaycan dediyimiz Urmiya, Sulduz, Maku kimi şəhərlərdə kürd namizədlərin qalib gəlməsi mümkün deyil. Amma o seçki qutularının hamısı türk səsi kimi hesablansa belə, nəticə dəyişməyəcəkdi. Kürd namizədlərin Urmiyada necə qalib gəldiyini izah edəcək heç nə və ya onları dəstəkləyəcək seçici yoxdur. Maku çölü indi PKK bazasına çevrilib. Xoy da oxşar vəziyyətdədir. Onlar türk əhalisinin sayını az göstərmək üçün bu üsula əl atıblar. Güney Azərbaycan reallığından qorxurlar. Plan aydındır, Türkiyə və Azərbaycana “PKK-Kürdüstan kartından daha səmərəli istifadə edəcəyik” mesajını verirlər. Eyni təhlükə həm Türkiyə sərhəddinə, həm də Qarabağa və hazırda işğal altında olan Qərbi Azərbaycan və Zəngəzura da aiddir”.
İranlı fəal Elyar Makuyi isə bildirib ki, Tehran rejimi Güney Azərbaycanı bölmək və xəritədən silmək üçün düyməyə basıb: “Bölgədə çirkin və son dərəcə təhlükəli oyun oynanılır. İran hökuməti Qərbi Azərbaycan adını Mukryanla dəyişməyə çalışır. Türklər demoqrafik dəyişiklik şantajı ilə üzləşiblər. İran kəşfiyyatı və kürdlər razılaşıblar. Tehranın planı Güney Azərbaycanın əhalisini və siyasi gücünü qırıb türkləri bölgədən qaçırmaqdır. Urmiya gölünün qurudulması da eyni planın bir hissəsidir. Onlar Türkiyə şəhərlərini kürdləşdirmək və Suriyada olduğu kimi Türkiyəni bufer Kürdüstan təhlükəsi ilə üz-üzə qoymaq istəyirlər. İstər Azərbaycan, istərsə də Türkiyə bu təhlükəni görmək və yeni Suriya sərhədi təhlükəsi yaşamaq istəmirlərsə, hadisələri ciddi qəbul etməlidirlər. Hədəf aydındır - Şimali Suriyanı, Şimali İraqı və Cənubi Azərbaycanı parçalamaq, İran Kürdüstanını yaratmaq və onları birləşdirmək. Türkiyə tərəfi də İsrail və ABŞ-ın təhdidləri kimi İrana qarşı tədbir görməli və gec olmadan lazım olanı etməlidir”.
Makuyi bölgəni demoqrafik cəhətdən dəyişdirən layihəni idarə edən şəxsin bir müddət Türkiyədə qaranlıq bizneslə məşğul olduqdan sonra ölkəsinə qayıdan iranlı qaçaqmalçı Naci Şerifi Zindaşti olduğunu deyib. Makuyi Zindaştının seçki prosesində milyonlarla dollar xərclədiyini ifadə edib: “Tehran rejimi bir vaxtlar Zindaştini Türkiyəyə sızdırdı. Zindaşti İran kəşfiyyatının xüsusi əməliyyatlar üzrə zabitidir. İran İslam İnqilabı Keşikçiləri Korpusu ona həm Azərbaycanın, həm də Türkiyənin sərhədlərini və demoqrafiyasını pozmaq tapşırığı verib”.
Tahir TAĞIYEV
