Ermənistan prezidenti İraqda ilginc etiraflar etdi... “Başlanğıcdan səhv yolda olduq”
Elşən Manafov: “Bununla Xaçaturyan məsuliyyəti məhz sabiq iqtidar komandalarının üzərinə qoyur”
“Biz reallıqları düzgün qiymətləndirə bilmədik. Qonşularımızla həll yolu tapmağa çalışmalı idik”. Bu barədə Ermənistan prezidenti Vaaqn Xaçaturyan Bağdadda erməni icmasının nümayəndələri ilə görüşündə deyib.
Ermənistan prezidenti qeyd edib ki, qarşı tərəfin baxışları nəzərə alınmalıdır:“Biz həmişə proseslərə ancaq öz baxış bucağımızdan baxırdıq, bunu belə istəyirdik, vəssalam. Amma belə olmur, istənilən problemin nizamlanması ikitərəfli yoldakı hərəkət kimidir, digər iştirakçılar da nəzərə alınmalıdır”.
Onun sözlərinə görə, Ermənistan malik olduğu potensialı reallaşdıra bilməyib: “Biz hamımız günahkarıq. 90-cı illərin sonundan sonra yaşadığımız vəziyyətə qeyri-real reaksiyalar verdik”.
Maraqlıdır, erməni rəsmisinin bu etirafları nə dərəcədə səmimidir?
“3 il müddətində Azərbaycan qarşısında öhdəliklərini indiyədək yerinə yetirməyən məhz Paşinyan iqtidarıdır”
Sözügedən məsələ ilə bağlı fikirlərini “Bakı-Xəbər”lə bölüşən politoloq Elşən Manafov bütün bunlara bir neçə prizmadan yanaşdı: “Zamaninda ABŞ prezidenti Franklin Ruzvelt “siyasətdə nə baş verirsə deməli belə də düşünülüb, təsadifi heç nə olmur” açiqlaması ilə çıxış edib. Bu baxımdan Ermənistan prezidenti Xaçaturyanın Bagdadda erməni icmasının nümayəndələri ilə göruşdə verdiyi bəyanatda səmimiyyət aramağa ehtiyac yoxdur. Bu ismarıc, heç şübhəsiz ki, həm daxili auditoriyaya, həm də Ermənistanın siyasətini izləyən, onu idarə etmək və ya təsir göstərən bəlli güc mərkəzlərinə ünvanlanıb. Ermənistanın indiki durumuna və müharibədəki məğlubiyyətinə görə ölkə prezidenti məsuliyyəti birmənalı şəkildə bu ölkənin əvvəlki iqtidarının, konkret götürdükdə isə “Qarabağ klanı”nın üzərinə qoyur. Ermənistanda hakimiyyət uğrunda mübarizənin perspektiv reallıqları konteksində bu klan hazırkı iqtidarın əsas siyasi rəqibidir. Onun hələ də ölkənin güc strukturlarında, parlamentdə, məhkəmələrdə, nəhayət bank sistemində təmsilçiləri və təsir imkanları var. Digər tərəfdən, bu klan Paşinyandan fərqli olaraq geosiyasi anlamda Qərblə bir o qədər də ciddi baglantilara malik deyil. Ermənistan prezidenti ölkənin potensial və imkanlarının düzgün qiymətləndirilməməsi ilə bağlı məsələlərdə məsuliyyəti məhz sabiq iqtidar komandalarının üzərinə qoyur. Bununla geosiyasi anlamda Ermənistanın bugünkü durumuna görə günahın Qərbdə olmaması fikrini ictimai rəyə və erməni diasporasına yönləndirir. Cəmiyyətdə anti-Rusiya ovqatının qızışdırılmasına hesablanmış mövqe sərgiləyir. Azərbaycanla münasibətlərdə qarşı tərəfin mövqe və baxışlarının indiyə qədər nəzərə alınmaması ilə bağlı açıqlamasında da prezident Xaçaturyan iqtidarda onların olacağı təqdirdə başqa vəziyyətin ola biləcəyi ilə bağlı illuziyalar doğurmağa çalışır. Halbuki, muharibənin başa çatmasından keçən 3 il müddətində Azərbaycan qarşısında öhdəliklərini indiyədək yerinə yetirməyən məhz Paşinyan iqtidarı, onun qeyri-konstruktiv mövqeyidir. Paşinyanın Azərbaycan prezidenti Əliyevə etibar etməməsi ilə bağlı bu günlərdə verdiyi açıqlama göstərir ki, tərəflər arasında münasibətlərdə etimadsızlıq sindromu var. Bu, sülh danışıqlarının gedişində hələ də əyləc mexanizmi rolunda çıxış etməkdədir”.
Vidadi ORDAHALLI
