Almanlar bir yanda sülh vasitəçiliyi edir, o yanda Azərbaycanı ləkələyir - böhtançı film hardan çıxdı?...
Bir çox ekspertlərin dediyi kimi, deyəsən Almaniya dövlətinin siyasətində qarışıqlıq, ziddiyyətlər var. Çünki Almaniya Kansleri Olaf Şolts bir söz deyir, amma ölkəsindəki bəzi siyasətçilər və deputatlar onun dediklərinin ziddini ortaya qoyur.
Almaniya Kanslerinin Azərbaycanla Ermənistan arasında sülh danışıqlarında vasitəçi kimi çıxış etməyə cəhd göstərdiyi bir vaxtda birdən-birə bu ölkədə Azərbaycan əleyhinə çəkilən üzdəniraq bir film ortaya çıxır. Söhbət Almaniyada çəkilən, guya Azərbaycanın Avropa təşkilatlarında "rüşvətlə" lobbi qrupları saxladığı ilə bağlı qərəzli, böhtan xarakterli bir filmdən gedir. O filmin premyerasında aktiv rol oynayanlardan biri Frank Şvabedir. Bu o Şvabedir ki, qatı Azərbaycan düşmənidir və fevralın 17-də AŞPA-da Azərbaycan nümayəndə heyətinin səsvermə hüququnun məhdudlaşdırılmasında onun çox aktiv rolu olub. AŞPA Azərbaycan nümayəndə heyətinin mandatının qəbul edilməməsi ilə bağlı qərarı məhz bu Şvabenin təqdimatı ilə qəbul edib. Son iki ayda AŞPA-da erməni lobbisinin təsiri ilə Azərbaycana qarşı sanksiya tətbiq edilməsi haqda qətnamə qəbul etdilər, bundan başqa, Azərbaycan nümayəndə heyətinin səsvermə hüququnun məhdudlaşdırılması haqda qətnamənin qəbul edilməsi də baş verdi... Bütün bunlardan sonra belə görsənir ki, o bədnam kinonun çəkilməsində də aktiv rollardan birini məhz Frank Şvabe oynayıb. Şvabe kimiləri başdan-ayağa korrupsiyaya batmalarına və erməni lobbisinin muzdlu nökərləri olmalarına baxmayaraq, başqalarında nöqsan axtarırlar. Məlumdur ki, erməni lobbisinin pulu ilə hərəkət edən bu deputatlar Avroparlamentdə antiazərbaycan mövqeyindən çıxış edirlər. Avroparlamentin illərdir rüşvət və korrupsiya yuvasına çevrildiyi gizlin deyil. Neçə-neçə Qərb deputatının adı maliyə, rüşvət qalmaqalında hallandırılıb. Bunlar isə öz ayıblarına kor olmaq əvəzinə Azərbaycanı qaralamaqla məşğuldurlar.
Özləri AŞPA-da rüşvətlə idarə olunan deputatların Azərbaycana qarşı qərəzli qərarlar qəbul etməklə məşğul olduqlarını görmürlər, amma əsassız olaraq iddia edirlər ki, guya Azərbaycan "lobbi qrupları" saxlayır. Onlar Azərbaycanı yersiz olaraq ittiham etməkdənsə, güzgünü əllərinə alıb özlərinə baxsınlar, onda görərlər gözlərinin içinə qədər korrupsiyaya, rüşvətə bələniblər. Məhz erməni milyarderlərdən aldıqları külli miqdarda rüşvət müqabilində öz mənəviyyatlarını satıb Azərbaycana qarşı qərəzli qərarlar, qətnamələr qəbul ediblər. Bu qərəzli qətnamələri qəbul edənlər erməni pulundan asılı olanlar olublar. Erməni lobbisinin maliyyəsi həmişə o deputatların həyatında əsas rol oynayıb, seçki kampaniyalarına erməni lobbisi lazımı qədər vəsait yatırıb, onlar da onun əvəzini çıxmaq üçün Azərbaycanla bağlı qaralama kampaniyası aparırlar. Deyilənə görə, bu üzdəniraq, qərəzli deputatlarla erməni lobbisi arasında vasitəçilik edən şəxs isə erməniəsilli Kaspar Karapetyandır ki, yaşı 80-ni keçən bu şəxs Brüsseldə yaşayır, onun adı daim çirkli pulların yuyulmasında, şübhəli maliyyə əməliyyatlarında və başqa neqativ işlərdə hallandırılır. Ermənilərin Qərb dünyasındakı “kassası” rolunu oynayan bu adamın adı Avropa Parlamenti tarixinin bəlkə də ən qalmaqallı korrupsiya faktlarında çəkilib. Bu adamın uzun illər amerikalı senatorlarla, qərbli parlamentarilərlə görüşlər keçirdiyi, bu görüşlərdən dərhal sonra vaxtilə işğal altında olan Azərbaycan torpaqlarına qeyri-qanuni səfərlər təşkil etdiyi barədə mətbauta məlumatlar var. Qeyd edək ki, Belçikada yaşayan Karen Karapetyan bütün Avropada brilyant biznesini əlində fırladır. Elə Şvabe kimi deputatlar da Karen Karapetyanın və başqa erməni biznesmenlərin pulu ilə Azərbaycana qarşı qərəzli qətnamələr çıxarırlar. Gizlin deyil ki, siyasi korrupsiya mexanizmlərinin böyüyünü elə özləri yaradıblar. Amma Azərbaycanı onlar bunda ittiham edirlər.
Yazının əvvəlində qeyd etdiyimiz kimi, özü də indiki şəraitdə - Almaniyanın Ermənistan və Azərbaycan arasında vasitəçilik etməyə cəhd göstərdiyi bir zamanda Almaniyada belə bir addım atılır. Belə şəraitdə bu necə başa düşülə bilər ki Almaniyada Azərbaycana qarşı belə qərəzli və ikili standart çərçivəsində kino çəkilir? Özü də Almaniya Bundestaqı da bunu himayə edir, parlament də onu müzakirə edir və sair. Təbii, bu, Almaniyanın sülh təşəbbüsləri ilə qəti şəkildə bir araya sığmır.
Şvabe kimiləri özləri siyasi korrupsiyasının içində çabalayır, qurduqları rüşvət, korripsiya mexanizmi hər daim işləyir. Erməni lobbisinin idarə etdiyi korrupsiya mexanizmini Azərbaycana qarşı çevirmək istəyirlər. Məqsədləri də odur ki, yalanlarla Azərbaycanı ləkələsinlər, iddia edirlər guya Azərbaycanın orada lobbisi var, guya 2, 9 milyard da pul ayrılıb (?). Doğrudan da gülməli iddiadır. Necə deyərlər, bişmiş toyuğun gülməyi gəlir. Əgər Azərbaycan bu işə bu qədər vəsait ayrırsaydı və orada lobbisi olsaydı, Azərbaycana qarşı gündə bir qərəzli qətnamə necə qəbul edilərdi, Azərbaycan bunun qarşısını niyə ala bilmir?
Əlbəttə, bunlar yalandan başqa bir şey deyil və Azərbaycan heç zaman belə bir addım atmayıb. Bu, erməni lobbisinə xas tərzdir ki, on illərdir Avroparlamentin deputatlarını və bəzi Avropa dövlətlərinin rəhbər şəxslərini, beynəlxalq qurumların təmsilçilərini pulla əllərində saxlayır və lazım gələndə Azərbaycana qarşı kin, nifrət saçırlar.
Bu gün Avropada yürüdülən ziddiyyətli, həftəbecər siyasətin nəticəsi çox dəhşətlidir. Onlar bir tərəfdən dövlətlərə əl uzadırlar, o biri tərəfdən də qarayaxma kampaniyası aparırlar. Azərbaycana qarşı olduğu kimi. Sülh danışıqlarında vasitəçi, moderator kimi iştirak etmək arzusu ilə Azərbaycanı ləkələyən böhtançı film bir araya sığmır, cənablar! Hesab edirik ki, Almaniya hökuməti özü belə bir filmin geniş səviyyədə yayılmasının qarşısını alacaq. Çünki bu şər-böhtan kampaniyası heç Almaniyanın özünə xeyir gətirməz.
İradə SARIYEVA
