Bakı küçələrində 1 manata kosmetika yox, zəhər satılır...
Qadınlar gözəl və baxımlı görünmək üçün, demək olar ki, hər gün kosmetik vasitələrdən istifadə edirlər. Bu səbəbdən kosmetik vasitələr qadınların həyatında önəmli rol oynayır. Tələbat çox olduğu üçün kosmetika bu gün ən gəlirli sahələrdən hesab olunur.
Bu konteksdə brend kosmetik vasitələri saxtalaşdıraraq ucuz qiymətə satanlar insanların sağlamlığı ilə oynamağa davam edirlər. Bakıda müxtəlif satış yerlərində, o cümlədən mağazalarda külli miqdarda mənşəyi bəlli olmayan çeşid-çeşid keyfiyyətsiz, saxta məhsullar satılır. Üstəlik, Bakının müxtəlif yerlərində bütün kosmetik vasitələrin bir manata satıldığı mağazalara da rast gəlinir. Bir manatlıq kosmetik məhsullar hətta sosial şəbəkələrdə də reklam olunur.
Danılmaz faktdır ki, əksər xanımlar aldıqları kosmetikanın mənşəyi, istehsal tarixi və saxlanma şəraiti ilə maraqlanmır. Əsas məsələ qiymətdir. Yəni ucuz qiymətə satılsın, içində nə olur-olsun, bizim alıcı üçün fərq etməz.
Maraqlıdır, ucuz olduğu üçün alınan və istifadə edilən saxta kosmetik vasitələr insan orqanizmində hansı fəsadlar yaradır?
Eyyub Hüseynov: “Ölkəmizdə kosmetik vasitələr və parfümeriya bazarında çox böyük problemlər yaşanır”
Azad İstehlakçılar Birliyinin sədri Eyyub Hüseynov “Bakı-Xəbər”ə açıqlamasında ölkəmizdə kosmetik vasitələr və parfümeriya bazarında çox böyük problemlərin yaşandığını bildirdi. Onun sözlərinə görə, ölkəyə normal kosmetik vasitələr daxil olandan təxminən 1 həftə sonra onun saxta növləri meydana çıxır: “Bazara saxta məhsulların belə tez daxil olmasından çıxış edərək belə demək olar ki, ya istehsalçının özü bu işdə maraqlıdır, ya da bu məhsulların alıcı rəğbəti qazandığını görən digər şəxslər onun saxta variantlarını ucuz qiymətə satırlar. Onlar kosmetik vasitələrin qablarını Çində hazırlayırlar, daxilinə isə nə gəldi doldurub əhaliyə satırlar. Saxta məhsullar çox ucuz qiymətə təklif olunur. İkincisi, bu məhsulların qablaşdırılması və təqdimatı primitiv olur, üzərindəki məlumatlar natamam olur və qrammatik səhvlərə yol verilir. Üçüncüsü, bunların keyfiyyətsiz olması ilk istifadə zamanı ortaya çıxır. Dördüncüsü də, saxta malların müvafiq sənədləri və firma zəmanəti olmur. Əhali bilməlidir ki, kosmetik vasitələrin də, ərzaq mallarında olduğu kimi, qanunlara görə üzərində buraxılma tarixi və son yararlılıq müddəti yazılmalıdır. Prestijli dükanlarda satılan saxta kosmetik vasitələr orijinal ilə yan-yana qoyulmur ki, istehlakçı onun poliqrafiyasına fikir verərək ayırd edə bilməsin. İstehlakçılar bu amillərə xüsusilə fikir verməlidirlər”.
E.Hüseynov onu da vurğuladı ki, “İstehlakçıların hüquqlarının müdafiəsi” haqqında qanuna görə, istehlakçının hüququ var ki, aldığı məhsulun gigiyenik sertifikatını, mənşə sertifikatını və uyğunluq sertifikatını tələb etsin. Satıcı bunu istehlakçıya göstərməyə borcludur.
Aynurə Həsənova: “Keyfiyyətsiz, saxta kosmetika və parfümeriya vasitələrinin insan orqanizminə çox böyük mənfi təsiri var”
Kosmetoloq-həkim Aynurə Həsənova “Bakı-Xəbər”ə şərhində ucuz və saxtalaşdırılmış kosmetik vasitələrin dəriyə mənfi təsir etdiyini bildirdi: “Keyfiyyətsiz, saxta kosmetika və parfümeriya vasitələrinin insan orqanizminə çox böyük mənfi təsiri var. Belə məhsullardan istifadə dəridə qıcıqlanmaya, qaşınmaya, allergiyalara, səpkilərə səbəb olur. Təəssüf ki, saxta məhsulların yol açdığı fəsadlar bununla yekunlaşmır. Standartlara cavab verməyən belə məhsulların səbəb ola biləcəyi ən böyük fəlakət xərçəng xəstəliyidir. Keyfiyyətsiz məhsullar dəridə qırışlar əmələ gətirir və quruluq yaradır. Ümumiyyətlə, bütün kosmetik vasitələr üzdə olan tük follikullarına böyük təsir edir. Belə ki, bu maddələr dəri ilə təmasda olduqda tük folliekullarını və dərini yağlandıra bilmir. Bu da dəridə sızanaqların yaranmasına yol açır”.
Günel CƏLİLOVA
