Lavrovun açıq mesajı - Ermənistan Suriyanın gününə qalacaq...
Daşdəmir Əliyev: “Moskva hər şey etməyə çalışacaq ki, Paşiniyanı durdura bilsin”
Rusiyanın xarici işlər naziri Sergey Lavrov III Antalya Diplomatiya Forumu çərçivəsində təşkil olunan brifinqdə Ermənistanın gələcəyi ilə bağlı bədbin proqnozlar verib. O qeyd edib ki, Rusiya sərhədçilərinin İrəvan aeroportundan çıxarılması tələbinin olduğunu təsdiq edə bilməz, amma bu, Baş nazir Nikol Paşinyanın, spiker Alen Simonyanın danışdıqlarının məntiqinə uyğundur:
“Onlar deyir ki, Ermənistanla Rusiya arasında 1994-cü ildən bəri baş verənlər hamısı səhv olub. Bundan başqa, Ermənistan Rusiyanı guya KTMT çərçivəsində öhdəliyini yerinə yetirməməkdə ittiham edir”.
S.Lavrov qeyd edib ki, Rusiyanı hansı məqsədlə ittiham etdikləri, hansı məqsədlə bunu erməni xalqının şüuruna yeritdikləri anlaşılmazdır:
“Kənardan bunu qızışdıranlar və Rusiyanı Cənubi Qafqaz regionundan çıxarmaq istəyənlər var. Bunu edənlər digər heç bir regiona öz hərəkətləri ilə xeyir verməyən mühəndislərdir. Son 50 ildə baş verənləri xatırlamaq kifayətdir – Vyetnam, Əfqanıstan, Livan, Suriya. Bu təcrübədən çıxış edərək, ABŞ, İngiltərə, Avropanın Cənubi Qafqaza gəlişinin nəticəsinin nə olacağını demək olar”.
Bu, həm Ermənistana, həm də Qərbə açıq mesaj ola bilərmi ki, belə gedişlə Ermənistanın da Suriyanın, Əfqanıstanın, Vyetnamın gününə düşmə ehtimalı var?
Hərbi-siyasi ekspert, ehtiyatda olan polkovnik-leytenant Daşdəmir Əliyev “Bakı-Xəbər”ə açıqlamasında bildirdi ki, Lavrovun bu açıqlamasında ciddi xəbərdarlıq var: “Artıq Rusiya Ermənistanın timsalında ikinci Ukraynanı görməyə başlayıb. Ermənistanla Rusiya arasındakı müttəfiqlik müqaviləsi artıq formal xarakter daşıyır. Paşinyan və digər erməni rəsmiləri Rusiya ilə münasibətləri tamamilə kəsməyə yönələn açıqlamalar verirlər. Məhz buna görə də, Lavrov açıq mətnlə bəyan edir ki, Ermənistanı sadaladığı ölkələrin taleyi gözləyir. Bunlar tamamilə məhv edilən, dağıdılan ölkələrdir. Ermənistan doğrudan da Qərbdəki havadarlarına arxayın olub, onların bölgədəki marağını təmin etməyə çalışır. Regiona heç bir aidiyyəti olmayan ölkələri bura gətirməklə sülhə təhdid yaradır.
KTMT-dən imtina, rus sərhədçilərini İrəvandakı hava limanından çıxarmaq cəhdləri buna sübutdur. Putini bu məsələdə aqressivləşdirən əsas məsələ Ermənistanın KTMT-də fəaliyyətini dondurmaq adı altında əslində Moskvanın hərbi nəzarətindən çıxmağa çalışmasıdır. Çünki fəaliyyəti dondurmaqla üzvlükdən çıxmaq arasında praktiki olaraq elə bir fərq yoxdur və bundan sonra məsələnin formal tərəfi artıq heç bir əhəmiyyət daşımayacaq. Bu məsələdə Moskvanın qorxusu təkcə Ermənistanla da bağlı deyil. Çünki Ermənistanın ardınca Cənubi Qafqazın digər ölkələrinə də nüfuz edəcəklər. Göründüyü kimi, Ermənistanla bağlı məsələ Rusiya üçün geostrateji əhəmiyyətli nəticələr doğura biləcəyindən, Moskva hər şey etməyə çalışacaq ki, Paşiniyanı durdura bilsin. Son çarə kimi bu ölkədəki Rusiya ordusunun dəstəyi ilə hakimiyyət çevrilişi planlarına əl atılmağı da istisna olunmur. Bütün bunlar onu deməyə əsas verir ki, yaxın zamanda biz Ermənistanla Rusiya arasındakı münasibətlərin daha da dərinləşməsini hiss edəcəyik”.
Məhəmmədəli QƏRİBLİ
