Qazımıza möhtac italyan deputatlar Avroparlamentdə əleyhimizə daha çox fəallıq etdilər...
Bəhruz Quliyev: “Görünür, onlar da erməni lobbisinin təsiri altına düşüblər”
Avropa Parlamenti növbəti dəfə Azərbaycana qarşı qətnamə qəbul edib. Bu, son aylarda avropalı pamentarilərin qəbul etdiyi üçüncü sənəddir ki, orada Aİ rəhbərliyinə rəsmi Bakıya qarşı iqtisadi və siyasi sanksiyalar tətbiq etmək tövsiyə olunur.
Qətnamənin Azərbaycan və Ermənistan xarici işlər nazirlərinin Berlində ikigünlük müzakirələri ərəfəsinə təsadüf etməsi diqqət çəkir. Diqqət çəkən həm də odur ki, Avropa Parlamenti iclasında İtaliya və Almaniyadan olan deputatlar xüsusilə fəallıq ediblər. Onların çıxışlarında Azərbaycanın ünvanına sərt ifadələr səslənib. Avropada Azərbaycan qazının əsas idxalçısı İtaliyadır. Qazaın böyük hissəsi məhz bu ölkəyə ixrac olunur. O zaman İtaliyanı təmsil edən deputatların bu cür canfəşanlığı nə deməkdir?
“İtaliyanı təmsil edən deputatların qərəzli mövqedən çıxış etmələrini anlamaq olmur”
Sözügedən məsələ ilə bağlı fikirlərini “Bakı-Xəbər”lə bölüşən “SƏS” Media Qrupunun rəhbəri, politoloq Bəhruz Quliyev hesab edir ki, Avropa Parlamentinin Azərbaycana qarşı qərəzli münasibəti açıq-aşkar ortadadır: “Biz Avroparlamentdən müsbət heç nə gözləmirik. Çünki illərin təcrübəsi göstərir ki, onlar Azərbaycana daima ikili standartlarla yanaşıb. Qafqazda bu cür münaqişə ocağının olduğunu dəstəkləyiblər. İndiyədək Avropa İttifaqının atdığı addımlar bir tərəfdən onun sülhün yaranmasında maraqlı olduğu barədə görüntü yaradır, digər tərəfdən isə münaqişənin uzanmasında istəkli olduğunu göstərir. Bu cür davranışlar onu deməyə əsas verir ki, Avropa bu problemin uzanmasında maraqlıdır və ondan hər hansı formada istifadə etməyə çalışır. Hesab edirəm ki, bu məsələnin mərkəzində müxtəlif iqtisadi maraqlar dayanır. Avropa Parlamentinin verəcəyi hər hansı bir qərar bizim üçün əhəmiyyətsizdir. AP özünün anti-Azərbaycan qətnamələri ilə bizim üçün yararsız bir quruma çevrilir”.
Politoloq B.Quliyev onu da qeyd etdi ki, İtaliya kimi Azərbaycanla yaxın əməkdaşlıq edən bəzi dövlətlərin Avropa Parlamentində əleyhimizə canfəşanlıq etməsi təəssüf doğurur: “Avropa bazarında Azərbaycan kifayət qədər əhəmiyyətli yerə malikdir. Bəzi dövlətlərlə iqtisadi əməkdaşlığımız da mövcuddur. Amma həmin dövlətləri AP-də təmsil edən deputatlar atdığı addımlarında bunu nəzərə almayıblar. Onlar dövlətlərinin deyil, bir qrupun marağından çıxış ediblər. Bu da həmin dövlətlərlə gələcək əməkdaşlıqlar üçün problemlərin yaranmasına gətirib çıxarır. Ehtimal edirəm ki, gələcək əməkdaşlıqlarda bu cür davranışlar nəzərə alınacaq. AP-də Fransadan olan deputatlar belə həyasızlıq göstərsəydilər, bu bizi təəccübləndirməzdi. Çünki Fransa hakimiyyətinin ölkəmizə olan qərəzli münasibəti bəllidir. İtaliyanı təmsil edən deputatların qərəzli mövqedən çıxış etmələrini isə anlamaq olmur. Axı nəyə görə? Görünür, onlar da erməni lobbisinin təsiri altına düşüblər”.
Vidadi ORDAHALLI
