Putindən Qərbə nüvə təhdidi - onları öz torpaqlarında vurarıq...
Rusiya prezidenti Vladimir Putin xalqa müraciətində Qərb ölkələrinə nüvə müharibəsi ilə bağlı xəbərdarlıq edib. Ukraynaya qoşun yeridəcəkləri təqdirdə real nüvə müharibəsi risqinin olacağını bildirən Putin Moskvanın Qərbdəki hədəfləri vura biləcək silahlara malik olduğunu xatırladıb.
Qeyd edək ki, Fransa prezidenti Makron bu həftə Parisdə keçirilən beynəlxalq konfransda ölkəsinin Ukraynaya qoşun göndərməsini istisna etmədiyini demişdi, lakin bu fikir ABŞ, Almaniya, İngiltərə və digər ölkələr tərəfindən dərhal rədd edilmişdi.
Çıxışında bu fikrə diqqət çəkən Putin, "(Qərb ölkələri) bizim də onları öz ərazilərində vura biləcək silahlarımız olduğunu başa düşməlidirlər. Bütün bunlar nüvə silahının istifadə olunduğu bir mühribəyə və mədəniyyətin məhv edilməsi təhlükəsini ortaya qoyur. Məgər onlar bunu başa düşmürlər?” deyib.
Ukraynadakı müharibə Rusiya-Qərblə münasibətlərini 1962-ci ildə Kuba raket böhranından sonra ən gərgin vəziyyətə gətirib. Putin bundan əvvəl də NATO və Rusiyanın birbaşa münaqişəyə girəcəyi təqdirdə yarana biləcək təhlükələr barədə xəbərdarlıq etmişdi.
Olduqca qəzəbli görünən Putin çıxışında nasist Almaniyasının lideri Adolf Hitler və Fransa imperatoru Napoleon Bonapartın Rusiyanı işğal etmək üçün uğursuz cəhdlərini xatırladıb. "Ancaq indi nəticələr daha faciəli olacaq" deyən Putin deyib ki, "onlar müharibənin bir cizgi filmi olduğunu düşünürlər".
Putin Rusiyanın Qərbə hücum etmək istəməsi ilə bağlı iddiaları “cəfəngiyyat” adlandırıb. Bununla belə, o əlavə edib ki, NATO-nun genişlənməsinin yaratdığı təhlükə səbəbindən qərb qanadını gücləndirəcəklər. Rusiya lideri çıxışında dünyanın strateji təhlükəsizliyi ilə bağlı ABŞ-la dialoq qurmaq istədiyini də bəyan edib.
Tahir TAĞIYEV
