Paşinyan KTMT-yə qarşı son addımları Makronun tövsiyəsi ilə atır...
Elşad Musayev: “Açıq görünür ki, regionda gərginlik planlaşdırılır və bunun arxasında Fransa dayanır”
Məlum olduğu kimi, Ermənistan son bir ildə, faktiki olaraq, KTMT-də iştirakını dondurub. Ermənistan KTMT-nin bütün təlimlərində iştirakdan və iclaslarına qatılmaqdan imtina edib.
Hətta 2023-cü ilin yanvar ayında Paşinyan hakimiyyəti KTMT-nin hərbi təlimlərinin Ermənistanda keçirilməsinə icazə verməyib. Rəsmi İrəvan bu mövqeyini KTMT-nin Ermənistan qarşısındakı hüquqi öhdəliklərini yerinə yetirməməsi ilə izah edir.
Ancaq o da var ki, bütün bunlar bəhanədir. Ermənistan Fransa ilə yaxınlaşmaqdan ötrü bunları edir. Fransada səfərdə olarkən Ermənistanın Baş naziri Nikol Paşinyan “France 24” telekanalına müsahibəsində bəyan edib ki, Ermənistan KTMT-də iştirakını dondurub. Onun bu açıqlaması Rusiyada birmənalı qarşılanmayıb. Rusiya rəsmiləri bəyan etdilər ki, KTMT-də üzvlüyü dondurmaq mümkün deyil. Paşinyan Parisdən qayıtdıqdan dərhal sonra Fransanın müdafiə naziri Sebastyan Lekornyu Ermənistana səfər etdi, bir sıra silahların veriləcəyini bəyan etdi və s.
Bütün bunların fonunda belə bir ehtimal var ki, Paşinyan KTMT-yə qarşı son addımları Makronun tövsiyələri ilə atır. Maraqlıdır, ekspertlər bunu necə dəyərləndirir?
“Bundan sonra Moskvanın İrəvana münasibəti daha da kəskinləşəcək”
Sözügedən məsələni “Bakı-Xəbər”ə şərh Böyük Azərbaycan Partiyasının sədri Elşad Musayev buna bir neçə aspektdən yanaşdı: “Məsələ ondadır ki, Paşinyan Fransada səfərdə olarkən Ermənistanın KTMT-də fəaliyyətini dondurduğu barədə məlumat verdi. Bu isə Rusiyanın sərt etirazına səbəb oldu. Eyni zamanda xeyli dərəcədə düşünməyə əsas verdi. Açıq-aşkar görünür ki, Paşinyan hökuməti müxtəlif müstəvilərdə oynamaqla vəziyyəti gərginləşdirməyə çalışır. Fransa başda olmaqla, bir sıra ölkələrdən dəstək almağa çalışır. Bununla paralel Rusiyanı şantaj edir. Aydın görünür ki, Paşinyan Rusiyanın Ukrayna müharibəsində ilişib qalmasından maksimum yararlanmağa çalışır. Çünki Paşinyan hökuməti hesab edir ki, bir daha belə fürsət yaranmaya bilər. Belə olan halda əsas sual ondan ibarətdir ki, bundan sonra necə olacaq. Təbii ki, bundan sonra Moskvanın İrəvana olan münasibəti daha da kəskinləşəcək. Çünki rəsmi İrəvan KTMT-ni iqnor edir. Rusiya, Ermənistanda hakimiyyət dəyişikliyi daxil olmaqla, müxtəlif addımlar ata bilər. Hələ ki, Putin buna tələsmir. Hesab edirlər ki, Ermənistan qırmızı cizgini tam keçməyib. Üstəlik, Rusiyada qarşıdan prezident seçkiləri gəlir. Seçkini yola verməlidilər. Ermənistanın bir şıltaqlığı da bununla bağlıdır. Azərbaycan bu fürsətdən maksimum istifadə etməlidir. Yəni Rusiya ilə Ermənistan arasında yaşanan gərginlikdən öz mənafeyinə uyğun istifadə etməlidir. Ermənistanın Fransa tərəfindən silahlandırılmasını biz elə-belə qəbul edə bilmərik. Açıq görünür ki, regionda gərginlik planlaşdırılır və bunun arxasında Fransa dayanır. Fransa müdafiə nazirinin İrəvana məlum səfəri, verdiyi açıqlamalar təsadüfi deyildi. Biz maksimum təmkinli davranmalıyıq və prosesləri düzgün dəyərləndirməliyik”.
Vidadi ORDAHALLI
