İki ölkənin kəşfiyyatı Azərbaycanla müharibə üçün birləşir...
Ramil Hüseynov: “Strategiya odur ki, təxribat törədilsin və buna görə Rusiya fəaliyyətsizlikdə ittiham edilsin”
Məlum olduğu kimi, Fransa və Ermənistan arasında hərbi əməkdaşlıq barədə saziş imzalanıb. İndi rəsmi Paris Ermənistanı müxtəlif vasitələrlə və sistemli şəkildə silahlandırmağa çalışır. Bununla bağlı artıq Ermənistana müəyyən hərbi texnika növləri də göndərilib.
Üstəlik, rəsmi İrəvandan iki istiqamət üzrə konkret addımların atılması tələb olunur. Birincisi, Paşinyan hakimiyyətindən Azərbaycanla qısamüddətli də olsa, genişmiqyaslı hərbi toqquşmalara nail olması istənilir. Digər tərəfdənsə, Ermənistanın Rusiyaya qarşı daha radikal siyasi addımlar atması ilə bağlı şərt irəli sürülüb.
Sözügedən məsələdə əsas məqam ondan ibarətdir ki, Fransa Azərbaycanla bağlı hərbi peyk müşahidələri ilə əldə olunmuş məlumatların Ermənistana verilməsini öz üzərinə götürüb. Rəsmi İrəvan isə bunun qarşılığında dörd ölkə - Azərbaycan, Türkiyə, Rusiya və İran barədə kəşfiyyat materiallarının Fransaya verilməsi barədə öhdəliyi qəbul edib. Necə deyərlər, Fransa və Ermənistan kəşfiyyat orqanlarının bununla bağlı gizli anlaşdıqları barədə məlumatlar var.
Fransanın Ermənistanı nəzarətə götürmək, onu Azərbaycana, Rusiyaya qarşı müharibə meydanına çevirmək planı hansı halda uğur qazana bilər? Fransa-Ermənistan kəşfiyyatının əməkdaşlığı, fransız generalın Azərbaycanla sərhəddə gəlməsi, Paşinyanın Makronla görüşdən dərhal sonra anti-KTMT ritorikasının artması və digər amillər bununla bağlı riskləri artırır.
“Biz onu da nəzərə almalıyıq ki, Fransa kosmosda çox güclü və müasir kəşfiyyat peyklərinə sahibdir”
Sözügedən məsələni “Bakı-Xəbər”ə şərh edən “Yeni Xətt” Müstəqil Siyasi Tədqiqatlar Mərkəzinin rəhbəri Ramil Hüseynov hesab edir ki, son dərəcə ayıq-sayıq və diqqətli olmalıyıq: “Çünki istər dünyada, istərsədə regionda vəziyyət çox mürəkkəbdir. Rusiya və Gürcüstan seçkilərə hazırlaşır. Ukraynada şiddətlənən müharibə fonunda Fransanın Ermənistanla hərbi əməkdaşlığı dərinləşdirməsi, bu ölkələrin xüsusi xidmət orqanlarının birgə əməkdaşlığı, Avropa İttifaqı Monitorinq Missiyasının üzvlərinin sayının artırılması təsadüfü deyil. Bu gün heç kəsə sirr deyil ki, Aİ missiyasının üzvlərinin əksəriyyəti Fransa xüsusi xidmət orqanlarının əməkdaşlarıdır. Nəzərə almaq lazımdır ki, bir müddət əvvəl Fransanın kəşfiyyat şəbəkəsi ifşa edildi. Ancaq bu, arxayınlaşmağa əsas vermir. Ən azından ona görə ki, Fransa ilə Ermənistan arasında kəşfiyyat sahəsində əməkdaşlıq yeni mərhələyə keçib. Məhz Paşinyan Parisdən qayıdandan sonra Kəlbəcər, Naxçıvan və Daşkəsən istiqamətində atəşkəsin pozulması təsadüfü deyildi. Strategiya odur ki, təxribat törədilsin və buna görə Rusiya fəaliyyətsizlikdə ittiham edilsin. Ondan sonra KTMT-dən rəsmən Ermənistan çıxsın və Rusiyanı Fransa əvəzləsin. Avropa İttifaqından da bununla bağlı siyasi dəstək alsınlar. Təxminən iki ölkənin kəşfiyyatı belə bir plan üzrə ortaq hərəkət edirlər. Ən nəhayət biz onu da nəzərə almalıyıq ki, Fransa kosmosda çox güclü və müasir kəşfiyyat peyklərinə sahibdir. Fikrimcə, hansısa təxribata əl atsalar bu peyklərin imkanlarından istifada edilməsi ehtimalı böyükdür”.
Vidadi ORDAHALLI
