Makron Bayramov-Mirzoyan görüşünə mane ola bilmədi...
Elşən Mustafayev: “Paşinyan həqiqətən bunu istəyirsə, üzərinə götürdüyü öhdəlikdən doğan və Azərbaycanın irəli sürdüyü haqlı şərtləri qəbul etməlidir”
Azərbaycan və Ermənistan xarici işlər nazirləri 28-29 fevral tarixində Berlində görüşəcək. Müzakirələr Münhendə Əliyev və Paşinyanın sülh sazişi üzrə danışıqların davam etdirilməsi, eləcə də sərhədin delimitasiyası üzrə komissiyaların iclasının keçirilməsi ilə bağlı XİN rəhbərlərinə verdiyi tapşırığa uyğun aparılacaq.
Görüşün Berlində keçirilməsi Münhen razılaşmasının davamıdır və belə görünür ki, Avropanın danışıqlarda iştirakı Almaniyaya həvalə olunur. Fransa etibarını itirdiyi üçün neytral ölkə kimi qəbul olunmur. Görünən budur ku, həm də görüşün baş tutmasına mane ola bilməyib. Hərçənd, nəticə əldə edilməsi, yaxud mümkün razılaşmaların praktiki mərhələdə işləyəcəyi sual altından çıxmayıb.
XİN rəhbərlərinin görüşündən nə gözləmək olar?
Beynəlxalq məsələlər üzrə ekspert Elşən Mustafayev “Bakı-Xəbər”ə açıqlamasında bildirdi ki, AB vasitəçiliyində Fransaya qarşı Almaniyanı alternativ kimi istifadə etməklə balans yaratmağa çalışır: “Lakin bu görüşə getmək Bakının gündəliyinə hansısa dəyişiklik etməsi demək deyil. Ilham Əliyev də Xocalıda bəyan etdi ki, yeni yiyə axtarışında olan, onun-bunun qucağına sığınan Ermənistan bilməlidir ki, yeganə yol Azərbaycanın bütün şərtlərini qəbul etmək və Azərbaycana qarşı ərazi iddialarından əl çəkməkdir. Bu baxımdan, Münhen razılaşmasına əsasən nazirlərin Berlində bir araya gəlməsinin sülh prosesində köklü irəliləyişə zəmin yaradacağı ehtimalı azdır. AB vasitəçiliyində Fransaya qarşı Almaniyanı alternativ kimi istifadə etməklə balans yaratmağa çalışır.
Bu görüşə getmək Bakının gündəliyinə hansısa dəyişiklik etməsi demək deyil.
Fevralın 17-də Münhendə Azərbaycan Prezidenti İlham Əliyev Almaniya Federativ Respublikasının Kansleri Olaf Şolts və Ermənistan Baş naziri Nikol Paşinyanın iştirakı ilə baş tutan görüş zamanı hər iki ölkənin xarici işlər nazirlərinə tapşırılmışdı ki, yenidən yaxın zamanda görüşsünlər və sülh müqaviləsi ilə bağlı danışıqları davam etdirsinlər. XİN başçılarının Berlində görüşməsi, görünür, həm də hər iki tərəfin ortaq qərarıdır.
Görüşdə XİN başçılarının ilk növbədə Münhen görüşündə əldə edilən “sərhədlərin delimitasiyası ilə bağlı komissiyaların danışıqlarının davam etdirilməsi” məsələsini müzakirə etmələri mümkündür. Bundan başqa, XİN başçılarının görüşlərinin ardıcıl xarakter alması, eləcə də sülh prosesi istiqamətində yol xəritəsinin daha optimal hala salınması müzakirə edilə bilər. Görüşdə ilkin sülh müqaviləsinin imzalanması və bu istiqamətdə qarşıda duran problemlərin həlli də müzakirəyə çıxarıla bilər. Ancaq bu görüşdə hansısa ciddi razılığın əldə olunma ehtimalı olduqca azdır. Ermənistan Baş naziri Nikol Paşinyan Ermənistan və Azərbaycan xarici işlər nazirlərinin fevralın 28-29-da Berlində baş tutacaq görüşündə sülh sazişi üzrə irəliləyişə nail olunacağına ümidvar olduğunu bildirib. Bunlar hamısı söz yığınıdır. Paşinyan həqiqətən bunu istəyirsə, üzərinə götürdüyü öhdəlikdən doğan və Azərbaycanın irəli sürdüyü haqlı şərtləri qəbul etməlidir. Bunlar olmasa, hansısa razılaşmadan danışmaq yersizdir”.
Məhəmmədəli QƏRİBLİ
