Ermənistan həm Fransa, həm də İranla təhlükəsizlik paktı bağlamaq istəyir...
Bünyamin Qəmbərli: “Əksinə, hər iki tərəf Azərbaycana qarşı mübarizə aparması üçün ümumi dostlarını gücləndirməkdə maraqlı olar”
Fevralın 23-də Fransanın müdafiə naziri Sebastyan Lekornunun başçılıq etdiyi nümayində heyəti Ermənistana rəsmi səfər edib. Səfər çərçivəsində hər iki ölkənin müdafiə nazirləri arasında “hərbi əməkdaşlığa dair sənədlər” paketi imzalanıb.
Bildirilir ki, İran hakimiyyəti də Ermənistana hərtərəfli müdafiə və təhlükəsizlik haqqında pakt imzalamağı təklif edir.
Həm Qərblə, həm də onun düşməni olan İranla eyni məzmunlu sənədi imzalamaq Ermənistana münasibəti dəyişə bilərmi?
Müstəqil siyasətçi Bünyamin Qəmnərli “Bakı-Xəbər”ə açıqlamasında bildirdi ki, Fransanın Ermənistana hərbi dəstəyi və ya silah verməsi təbiidir: “Çünki bizim tarixi ərazilərimizdə süni dövlət yaradan anti-türk mövqeyində olan ölkələrin hər biri Ermənistanı dəstəkləməkdə davam edir. Onlar bu yolla həm də Azərbaycanın inkişafının qarşısını almaqda maraqlıdırlar. Bu, onların hədəfləridir. Ancaq ən acınacaqlısı budur ki, onlar xam xəyala düşüblər. Belə bir deyim var: “od da olsa, özünü yandırmaz”. Ermənistanın da özündən başqa kimsəni yandıra biləcək gücü yoxdur. Həmin ölkəni təpədən dırnağa silahlandırsalar belə, bizimlə mübarəzə aparmaq gücünə sahib olmayacaq. Əgər Ermənistan Fransadan, Hindistandan silah alırsa, bizim arsenalımızda o silahlar çoxdan var. Biz ən müasir silahları almaqda davam edirik. İranın Ermənistanla hərbi əməkdaşlıq etməsinə gəldikdə isə, bu da başadüşüləndir. Çünki onlar Azərbaycan dövlətinin varlığını belə istəmir. Birinci Qarabağ müharibəsindən başlayaraq, biz bənzər münasibətin şahidi olmuşuq. İran onsuz da Ermənistana hər cür yardım edib, bundan sonra da verəcək. Qərbin İrana, İranın onlara münasibıti Ermənistan -Azərbaycan münasibətləri kontekstinə aid deyil. Qərb İranın özünə görə onunla pis münasibətdədir. Ermənistanla bağlı məsələdə onların mövqeləri üst-üstə düşür. Bu baxımdan da, həm Qərbin, həm də Ermənistanın eyni anda İranla əməkdaşlıq etməsi problem yaratmaz. Əksinə, hər iki tərəf Azərbaycana qarşı mübarizə aparması üçün ümumi dostlarını gücləndirməkdə maraqlı olar”.
Ermənistanın Qərblə müttəfiqlik axtarışları İranın ənənəvi Qafqaz siyasətinə ziddir. İran administrasiyası ABŞ, Aİ və NATO-nun Qafqaz regionuna təsirini həyati təhlükə hesab edir. İranın Qafqazda Rusiyanı prioritetləşdirmək siyasətinin səbəblərindən biri də Moskvanın köməyi ilə Qərbin bölgəyə girməsinin qarşısını almaqdır. Bu strategiyaya uyğun olaraq Tehran bölgə dövlətlərinin NATO və Aİ kimi təşkilatlara inteqrasiyasına qarşıdır.
ABŞ-ın Ermənistan vasitəsilə regiona nüfuzu ehtimalı Tehranı çıxılmaz vəziyyətə salır və İranın siyasi-ideoloji təbliğatının iflasını təsdiqləyir. Prezident İ.Rəisinin Zəngəzur dəhlizini “NATO dəhlizi” adlandıraraq ona qarşı çıxdığı bir vaxtda Qərblə müttəfiqlik etmək istəyən Ermənistanı dəstəkləməsi isə açıq-aşkar ziddiyyətdir.
Ermənistanın Qərblə yaxınlaşması mahiyyətcə İranın Azərbaycan siyasətinin yanlışlığı deməkdir və bu kontekstdə Azərbaycana qarşı təcavüzkar siyasətinin davam etdirilməsinin çox ciddi risqlər daşıdığını göstərir.
Məhəmməsəli QƏRİBLİ
