Katolik kilsəsi də Xocalıya biganə qalmadı - 32 ildə ilk hadisə...
Faiq Ələkbərli: “Xocalı faciəsinin Varşava şəhərindəki "Evangelist Lukas" katolik kilsəsində anılması təsadüfi deyil”
Xocalı soyqırımının 32-ci ildönümü Polşada da qeyd edilib. Polşa Azərbaycanlıları Şurası tərəfindən Xocalı soyqırımı ilə bağlı Varşava şəhərindəki "Evangelist Lukas" katolik kilsəsində 250-dən çox Polşa vətəndaşının iştirak etdiyi tədbir təşkil edilib.
Xocalı faciəsinin qurbanları kilsədə katoliklərin "messa" saatı adlanan kütləvi ibadəti zamanı yad olunub.
İbadət bitdikdən sonra kilsə keşişi Yan Popiel Xocalı hadisələri və soyqırımı şəhidləri haqqında kilsəyə toplaşmış yerli əhali qarşısında çıxış edib. O, Xocalı soyqırımının Ermənistan silahlı qüvvələrinin Azərbaycanın mülki əhalisinə qarşı törətdiyi ən böyük cinayətlərdən biri olduğunu deyib.
Qeyd edək ki, katolik kilsəsinin baş keşişi tərəfindən yerli əhali qarşısında Xocalı soyqırımı haqqında danışılması, bu faciəni törədənlərin sərt şəkildə qınanılması və soyqırımı qurbanlarının xatirəsinə dua edilməsi ümumi Avropa ölkələrində daha öncə baş tutmayıb.
Maraqlıdır, katolik kilsəsinin bu faciəni ilk dəfə xatırlaması nə deməkdir? Bu, dünyaya nə kimi mesaj ötürür?
“Qərb ölkələri çalışır ki, bir çox dövlətləri Rusiyadan uzaqlaşdırsın, bu səbəbdən də katolik kilsəsində Xocalı faciəsi qeyd edilib”
AMEA Fəlsəfə və Sosiologiya İnstitutunun aparıcı elmi işçisi, fəlsəfə üzrə fəlsəfə doktoru, dosent Faiq Ələkbərli “Bakı-Xəbər”ə açıqlamasında bildirdi ki, Xocalı faciəsinin Varşava şəhərindəki "Evangelist Lukas" katolik kilsəsində anılması təsadüfi deyil: “Bu, Qərb dünyasının Rusiyaya münasibətinin kəskinləşməsi ilə bağlıdır. Məlumdur ki, Polşa da Qərb dövlətləri ilə əməkdaşlıq edir. Qərb dövlətləri Xocalı faciəsini anmaqla diqqəti özünə cəlb etmək istəyir. Məlumdur ki, Xocalı soyqırımı Rusiyanın nəzarəti altında olan Ermənistanda baş verib. Qərb ölkələri də çalışır ki, bir çox dövlətləri Rusiyadan uzaqlaşdırsın. Bu səbəbdən də katolik kilsəsində Xocalı faciəsi qeyd edilib”.
Həmsöhbətimiz onu da əlavə etdi ki, Xocalı faciəsinin dünyanın istənilən yerində anılması yaxşı haldır. Beləliklə, dünya əhalisi ermənilərin azərbaycanlıların, xocalılıların başına hansı oyunlar gətirdiyini biləcək.
Günel CƏLİLOVA
