Qərb Ukraynaya qoşun yeritməyə hazırlaşır - Rusiya-NATO müharibəsi başlayır...
Fransa prezidenti Emmanuel Makron Avropa ölkələrinin döyüşmək üçün Ukraynaya qoşun göndərəcəyini istisna etməyib. Makron bu açıqlamanı Rusiya prezidenti Vladimir Putinə Avropanın Ukrayna ilə bağlı qətiyyəti barədə mesaj göndərmək və Kremlin Moskvanın üçüncü ilə girən müharibədə mütləq qalib gələcəyi ilə bağlı ritorikasına qarşı çıxmaq üçün 20-yə yaxın avropalı liderin Paris toplantısından sonra verib.
Görüşdən sonra jurnalistlərə açıqlama verən Makron Rusiyanın məğlubiyyətinin Avropada təhlükəsizlik və sabitlik üçün zəruri olduğuna inandığını deyib: “Bu gün qoşunların təsdiq edilmiş qaydada Ukraynaya göndərilməsi ilə bağlı rəsmi konsensus yoxdur. Amma dinamika baxımından heç nəyi istisna etmək olmaz".
Makron bəzi strateji qeyri-müəyyənliklərin olduğunu deyərək, hansı ölkələrin Kiyevə qoşun göndərməyi düşündüyü barədə təfərrüatlı açıqlama verməkdən imtina edib.
Bir Ağ Ev rəsmisi "Reuters" agentliyinə deyib ki, Birləşmiş Ştatların Ukraynaya döyüşmək üçün qoşun göndərmək planları yoxdur və həmçinin Ukraynaya döyüşmək üçün NATO qoşunlarını göndərmək planları da yoxdur.
Bundan əvvəl Slovakiyanın baş naziri Robert Fiko da bildirib ki, bəzi NATO və Avropa İttifaqı (Aİ) ölkələri Ukraynaya qoşun yerləşdirməyi nəzərdən keçirir.
Fiko sözügedən ölkələrin Ukraynaya qoşun göndərmək üçün ikitərəfli sazişlər bağlamağı düşündüyünü iddia edib. O bildirib ki, bəzi üzv ölkələr onlarla Ukrayna arasında bağlanan ikitərəfli razılaşmadan sonra NATO əsgərlərinin Ukrayna ərazisində fəaliyyət göstərməsi ehtimalına icazə verib, lakin onların Ukraynada hansı vəzifələri yerinə yetirəcəkləri məlum deyil, çünki materiallar məxfi xarakter daşıyır.
“Bəzi NATO və Aİ ölkələrinin ikitərəfli razılaşmalar çərçivəsində Ukraynaya qoşun göndərməyi düşündüyünü deməklə kifayətlənəcəyəm. Ancaq orada hansı məqsədlə yerləşəcəkləri və nə edəcəklərini deyə bilmərəm" - Fiko deyib.
Aİ və NATO üzvü olan Slovakiyanın Ukraynaya əsgər göndərməyəcəyini vurğulayan Fiko Rusiya-Ukrayna müharibəsində ciddi bir eskalasiya risqi gördüyünü deyib. Fiko Parisdə toplantı çağırılmasının Qərbin Ukrayna strategiyasının iflasa uğradığını göstərdiyini bildirib.
NATO baş katibi Yens Stoltenberq isə bildirib ki, alyans Ukraynaya hərbçi göndərməyi planlaşdırmır: "NATO üzrə müttəfiqlər Ukraynaya misilsiz dəstək göstərirlər. Biz bunu 2014-cü ildən edirik və irimiqyaslı əməliyyat başlayandan artırmışıq. Lakin NATO hərbi qüvvələrini Ukraynaya göndərmək planlarımız yoxdur".
Almaniya kansleri Olaf Şolts da Aİ ölkələri və NATO-nun Ukraynaya qoşun göndərməyəcəyini deyib. Şolts bu barədə razılaşmanın lap əvvəldən olduğunu və Qərbdə bu barədə yekdil fikir formalaşdığını vurğulayıb.
Rusiya isə xəbərdarlıq edib ki, Qərb ölkələri Ukraynaya qoşun göndərəcəyi təqdirdə NATO və Rusiya arasında birbaşa hərbi münaqişə qaçılmaz olacaq. "Bu halda, artıq ehtimaldan yox, labüdlükdən danışmaq lazımdır, beləliklə, qiymətləndirmə aparırıq", - Kremlin mətbuat katibi Dmitri Peskov deyib.
Peskov, həmçinin, NATO ölkələrinin bu cür tədbirlərin nəticələrini qiymətləndirməli olduqlarını və bunu dərk etməli olduqlarını bildirib.
"Bunun onların maraqlarına, ən əsası, ölkə vətəndaşlarının maraqlarına uyğun gəlib-gəlmədiyini sorğulamalıdırlar", - deyə Peskov əlavə edib.
Tahir TAĞIYEV
