Putin özü susur, Paşinyan KTMT-yə zərbəni zərbə dalınca vurur...
Abutalıb Səmədov: “Ermənistanı onlara təhlükə yarada bilən qüvvə kimi görürlər”
Rusiya prezidenti Vladimir Putin Ermənistanın baş naziri Nikol Paşinyanla İrəvanın KTMT üzvlüyünün dayandırılması ilə bağlı bəyanatlarını hələlik müzakirə etməyib. Rusiya liderinin mətbuat katibi Dmitri Peskov bildirib ki, hələlik belə təmaslar üçün heç bir plan yoxdur:
"Xeyr. Hazırda heç bir əlaqə yoxdur və olmayıb. Amma işgüzar əlaqələr çərçivəsində, təbii ki, biz erməni dostlarımızdan nəyin nəzərdə tutulduğunu və işlərin necə olduğunu öyrənmək istəyirik. Ona görə də İrəvanla dialoqa davam edəcəyik”.
O, Putinin Paşinyanla təmasda Ermənistanın KTMT-yə üzvlüyü ilə bağlı vəziyyətə aydınlıq gətirmək niyyətindədirmi və ya hələlik hər hansı təmas planı varmı sualına belə cavab verib:
“Bundan əvvəl Paşinyan respublikanın Kollektiv Təhlükəsizlik Müqaviləsi Təşkilatında iştirakını dayandırdığını bildirib. Eyni zamanda KTMT katibliyi Ermənistandan belə bir bəyanat almadığını bildirib”.
Putin hələ özü bu KTMT məsələsində Paşinyanın siyasətinə rəy verməyib. Maraqlıdır, niyə susur?
Ermənistan nümayəndələri, həm də Kollektiv Təhlükəsizlik Müqaviləsi Təşkilatının Parlament Assambleyasının Belarusda keçirilən parlament seçkilərinə müşahidəçi qismində getməyib.
Müstəqil siyasətçi Abutalıb Səmədov “Bakı-Xəbər”ə açıqlamasında bildirdi ki, Rusiya bütün gücünü Ukrayna ilə müharibəyə yönəldib: “Cəbhədə irəliləmək üçün onun əlinə yaxşı imkan keçib. ABŞ-ın yardımı ləngiyir, ən yaxşı halda azaldılmış səviyyədə mart ayında Ukraynaya yardım göstəriləcək. Bunun da yarısından azı hərbi məqsədlər üçün istifadə edilə bilər. Avropa Birliyinin 4 illik 50 milyard həcmdəki yardımı hərbi məqsədlər üçün istifadə edilə bilməz. Bütün bunlar Rusiya üçün yeni ərazilər işğal etmək imkanı yaradır. Artıq bir neçə şəhəri işğal da edə bilib. Buna görə də Putinin Paşinyanın bəyanatları ilə məşğul olmağa vaxtı və həvəsi yoxdur. Son günlər baş verənlər bir daha göstərdi ki, Ermənistan rəhbəri son dərəcə qeyri-ciddi adamdır. Əgər sən bir qurumda öz fəaliyyətini dondurursansa, bununla bağlı bir sənəd ortaya qoymalısan. Faktiki olaraq görürük ki, Ermənistan KTMT-nin fəaliyyətində iştirak etmir. Ancaq ordan çıxdığını da demir, hər dəfə bir bəhanə gətirərək bunu edir. Bu səbəbdən, rəsmi müraciət mütləq mənada olmalıdır. Əgər dövlətin başında ciddi adam durursa, mütləq mənada belə müraciət olmalıdır. Nə Ermənistan, nə də onun baş naziri bu ölçülərə cavab vermir. Ancaq bir şey aydındır ki, Ermənistan KTMT üçün ciddi problemə çevrilib. Qurumdan çıxmaq istiqamətində ilk addımlarını atır. Fəaliyyətini dondurduğunu deyirsə, bu artıq bundan sonra iştirak etməməyə dəlalət edir. Bir qalır son addımı atıb, rəsmi şəkildə KTMT-dən çıxmağı bəyan etmək. Görünür, Qərbdəki havadarları Ukrayna müharibəsi bitənə kimi gözləməyi məsləhət görür. Çünki heç Ulraynaya lazım olan dəstəyi verə bilmirlər. Zelenskinin qarşısına qoyduğu sərhədlərin bərpası ilə bağlı hədəfi qeyri-real görünür. Ermənistan belə vəziyyətdə, təbii ki, gözləməlidir. Rusiya da Ermənistanla ciddi şəkildə məşğul olmağı müharibədən sonraya saxlayır. Belarusdakı seçkiləri müşahidə etməməyə gəldikdə isə bu, Paşinyanın keçmiş müttəfiqləri ilə aralarında olan körpüləri yandırması deməkdir. Aydındır ki, Ermənistan bundan sonra yalnız özünə sərf edən iqtisadi tədbirlərdə iştirak edəcək. Rusiyadan iqtisadi asılılığı olduğu üçün bunu etməyə məcburdu. Lukaşenko deyib ki, Ermənistanın KTMT-dən çıxması onu narahat etmir. Belə bəyanat olsa da, Ermənistanın sərgilədiyi davranış ilk növbədə Rusiya və Belarusu narahat edir. Çünki Ermənistanı onlara təhlükə yarada bilən qüvvə kimi görürlər. Ermənistanın bu addımları digər üzvləri də belə addımlar atmağa vadar edə bilər. Yaxın aylarda baş verən hadisələr Ermənistanın əsl niyyətlərini ortaya qoymuş olacaq”.
Məhəmmədəli QƏRİBLİ
