Makronla görüşdən sonra Paşinyan daha aqressiv revanşçıya çevrildi...
Elşad Həsənov: “Yaxın zamanda Rusiya, çox güman, ona tutarlı cavab verəcək”
Ermənistanın Baş naziri Nikol Paşinyanın “France 24” kanalına müsahibədə səsləndirdiyi fikirlər Ermənistan-Azərbaycan normallaşma prosesində yeni mərhələnin başlandığını göstərdi. Açıqlamaların təhlilindən aydın olur ki, 2020-ci ildən indiyə qədərki nisbi konstruktiv mərhələnin yerini geopolitik qarşıdurma ilə müşayiət olunan gərginliklər tutacaq.
Müsahibədə Paşinyan Azərbaycanın Ermənistana qarşı yeni müharibəyə hazırlaşdığını, rəsmi Bakının Ermənistana “Qərbi Azərbaycan” kimi baxdığını, ərazilərin qarşılıqlı tanınmasını istəmədiyini, Ermənistan ərazilərini işğal etmək istədiyini və nəticədə sülh arzulamadığını iddia edib.
Bütün bunlar onu deməyə əsas verirmi ki, Paşinyan sülh prosesindən tamamilə uzaqlaşıb, yalnız yeni müharibə barədə düşünür?
Siyasi şərhçi Elşad Həsənov “Bakı-Xəbər”ə açıqlamasında bildirdi ki, Fransanın, xüsusilə Makronun anti- Azərbaycan bəyanatları, Ermənistana yönəlik əsassız dəstək, Ermənistanı silahlandırmaq açıq - aydın Ermənistanı müharibəyə hazırlamalarına işarədir: “Ermənistanın sülh danışıqlarından qaçmasının səbəbini bizdə görürlər. Guya bizim Qərbi Azərbaycan icmasının öz torpaqlarına qayıtmaq arzusu onları belə narahat edib. Biz bu haqda Birləşmiş Millətlər Təşkilatının qaçqınlar komitəsinə müraciət etmişik. Hər bir insanın öz doğma torpağında yaşama hüququ var və bunu da həmin dövlət təmin etməlidir. Bu mənada 1988 - 92 - ci illər arasında Ermənistandan zorla qovulan 250 mindən artıq soydaşımız öz torpaqlarına qayıtmaq istəyir. Burada müharibədən söz gedə bilməz. Hətta erməni mətbuatı daha irəli gedərək, yay aylarında Azərbaycanın hücum edərək Zəngəzuru qəsb edəcəyi haqqında informasiyalar yayıblar. Bildirirlər ki, həmin dövrdə ABŞ və Avropa dövlət rəhbərlərinin məzuniyətdə olmasından sui - istifadə edəcək və Zəngəzuru işğal edəcək. Onların xəstə təxəyyülü özlərini belə qorxuya salır. Azərbaycan isə qətiyyən heç bir təhdid irəli sürmür, əksinə Beynəlxalq hüquq normalarına uyğun təkliflər irəli sürür. Bu təkliflər də həm beynəlxalq təşkilatlar, həm Ermənistan tərəfindən qəbul olundu. Biz onları başa salırıq ki, gəlin sülh müqaviləsi bağlayaq. Azərbaycan öz torpaqlarını artıq azad edib. Prezidentimiz İlham Əliyev dəfələrlə bildirib ki, bizim heç kimin torpağında gözümüz yoxdur. Biz öz torpaqlarımızı azad etmişik və orada yaradıcl, qurucu işləri aparırıq. Ancaq, başqa ölkələrin, xüsusilə də Fransanın dəstəyi ilə Ermənistan Azərbaycana qarşı müharibəyə hazırlaşır. Eyni zamanda, Hindisatandan silah - sürsat alırlar. Azərbaycan da müharibə bitəndən sonra boş dayanmayıb. Ordusunun quruculuğu ilə məşğuldur, hər gün müasir silahlar alınır. Pakistanla bizim son dövrdə bağlanan müqavilə, yeni nəsil qırıcı təyyarənin alınması və digər proseslər onları qorxuya salır. Biz güclü olmasaq, Ermənistan və digər qevvələr Azərbaycanın üstünə hücum çəkə bilərlər. Fransa bu hadisələrdə Ermənistana dəstək olacağını, İrəvanı müdafiə edəcəyini bildirdi. Onun Azərbaycana olan sərt təhdidləri, acığı nədən ibarətdir? Azərbaycanın Fransaya vurduğu zərbəni indiyə kimi heç kim vurmayıb. Azərbaycanın təhlükəsizlik orqanlarının əməkdaşları Fransanın agenturasını ifşa etdilər , onların iki kəşfiyyatçısı aşkar olundu və o xaric edildi. Eyni zamanda, Azərbaycan təhlükəsizlik orqanlarının əməkdaşları fransızların Gürcüstanda, Ukraynada, Moldovada, Afrika ölkələrində də olan agentura şəbəkəsini ifşa etdi. Ona görə də, Makron çox əsəbiləşdi, Fransa xarici kəşfiyyat idərəsinin rəisi, baş nazir istefaya göndərildi. Əslində Makron özü bu böyük biyabırçılıqdan sonra özü istefaya getməli idi. Öz ölkəsində sabitliyi qoruya bilməyən Makron erməniləri müharibəyə hazırlayır, Azərbaycana qarşı əsassız bəyanatlar səsləndirir. Dünən Prisdə fransızlar ayağa qalxıb, Makronun istefasını tələb etdilər, fermerlər onun üstünə hücum etdilər. Öz daxilində olan prosesləri tənzim edə bilməyən başqa ölkənin daxili işlərinə qarışır. Ermənistan da müstəqil dövlət olmadığına görə, indiyə kimi Rusiyanın əlaltısı olduğu üçün, indi də rusları satıb Fransanın çətiri altına keçmək istədiyi üçün Paşinyan Makronun hər dediyi ilə hərəkət edir. Sülh müqaviləsinin imzalanmasını da istəmir belə olduğu halda. Paşinyanın Fransanın 24 kanalına verdiyi müsahibəsində də Rusiya ilə əlaqələrinin tam qırıldığı aydın görünür. Yaxın zamanda Rusiya, çox güman, ona tutarlı cavab verəcək. Ermənistanda siyasi vəziyyət daha da qızışacaq”.
Məhəmmədəli QƏRİBLİ
