Akademiyanın institutlarında icraçı direktor vəzifələrinin adları dəyişdirildi…
Azərbaycan Milli Elmlər Akademiyasının (AMEA) institutlarında vəzifə dəyişiklikləri aparılıb. AMEA-nın institutlarında baş direktor və icraçı direktor vəzifələri ləğv edilib. Akademiyanın institutlarında baş direktor vəzifəsi direktor, icraçı direktor vəzifəsi isə elmi işlər üzrə müavin vəzifəsi kimi təsdiqlənib.
Bu barədə mətbuatda məlumat yayılıb.
AMEA-nın Rəyasət Heyətində müvafiq qərarına əsasən tarix üzrə fəlsəfə doktoru Fərhad Quliyev Arxeologiya və Antropologiya İnstitutunun direktoru vəzifəsinə təsdiqlənib. O, 2023-cü ildən direktor vəzifəsini müvəqqəti olaraq icra edirdi.
Dəyişikliyə uyğun olaraq, filologiya üzrə fəlsəfə doktoru Mehman Həsənli Ədəbiyyat İnstitutuna, filologiya üzrə fəlsəfə doktoru Baba Məhərrəmli Dilçilik İnstitutuna, filologiya üzrə fəlsəfə doktoru Afaq Ramazanova Folklor İnstitutuna, tarix elmləri doktoru Eynulla Mədətli Fəlsəfə və Sosiologiya İnstitutuna, filologiya üzrə fəlsəfə doktoru Ruhəngiz Cümşüdlü Şərqşünaslıq İnstitutuna, siyasi elmlər doktoru Ramilə Dadaşova Qafqazşünaslıq İnstitutuna, texnika üzrə fəlsəfə doktoru Rauf Muradov isə Respublika Seysmoloji Xidmət Mərkəzinə elmi işlər üzrə direktor müavinləri vəzifəsinə təsdiq ediliblər. Məlumat üçün bildirək ki, onlar indiyədək təmsil olunduqları institutlarda icraçı direktor vəzifəsində çalışıblar.
Məlumatlara görə, Ramiz Mehdiyev AMEA-prezidenti olana qədərki dövrdə də AMEA-nın institutlarında direktor və müavin vəzifələri mövcud olub. Baş direktor və icraçı direktor vəzifələri Ramiz Mehdiyevin AMEA-ya rəhbərlik etdiyi dövrdə təsis edilib. R.Mehdiyev AMEA prezidenti postundan getdikdən sonra bu quruma akademik İsa Həbibbəyli rəhbərlik edir. İ.Həbibəylinin rəhbərli dövründə AMEA-nın strukturunda, institutlarında xeyli dəyişikliklər baş verib, bəzi şöbələr, o cümlədən də Elm Tarixi İnstututu ləğv olunub.
AMEA-dan aldığımız məlumata görə, bu günlərdə bəzi elmi-tədqiqat institutlarında direktor seçkiləri keçirilib. Direktor seçkiləri keçirilən institutlardan biri Tarix və Etnologiya İnstitutu olub ki, professor Kərim Şükürov yenidən bu institut direktor seçilib. Bundan əvvəl K.Şükürov bu institutda baş direktor vəzifəsini daşıyırdı. Məlumatlara görə, yaxın günlərdə mərhələli şəkildə digər institutlarda da direktor seçkiləri keçiriləcək.
AMEA-dan əldə etdiyimiz məlumata görə, hələ ki, heç bir institut direktoru dəyişməyib və hər kəs öz vəzifəsini icra edir. Bildirilənə görə, direktorlar yerlərində qalsalar da, bəzi keçmiş icraçı direktorlar yeniləri ilə əvəzlənib.
İnstutut direktorlarının seçkilərinə gəlincə, AMEA-dan bildirildi ki, bu barədə hələ bir məlumat yoxdur.
İradə SARIYEVA
