Fransanın Ermənistanı silahlandırmasının “sistemli xarakter alması” nə deməkdir...
Elşən Manafov: “44 günlük savaşdan sonra regionun yeni geosiyasi konfiqurasiyası Fransanı qane etmir”
Ermənistanın müdafiə naziri Suren Papikyan bəyan edib ki, Fransa ilə hərbi əməkdaşlıq sistem xarakterlidir: “Ermənistan və Fransa arasında hərbi sahədə əməkdaşlığın praktiki müstəviyə keçməsindən iki il belə keçməməsinə baxmayaraq, birgə səylərimiz artıq sistem xarakterlidir və uzunmüddətli xarakter daşıyır”.
Onun sözlərinə görə, Ermənistan və Fransa arasında əməkdaşlıq gündəliyinə silahlı qüvvələrin, demək olar ki, bütün sahələri daxildir: “Mən Fransanın müdafiə islahatları, hərbi təhsil sahəsi, sürətlə inkişaf edən təlimlər sahəsi və əlbəttə ki, silahlı qüvvələrin və müdafiə texnikasının modernləşdirilməsi prosesi ilə bağlı hərtərəfli məsləhət dəstəyini xüsusilə qeyd etməliyəm. İkitərəfli əməkdaşlıq 10-dan çox sahədə inkişaf edir. İmzalanan sənədlər əməkdaşlıq gündəliyinin inkişafı üçün yeni zəmin yaradacaq”.
Maraqlıdır, Ermənistanla Fransa arasında hərbi sahədə əməkdaşlığın sistem xarakterli olması nə deməkdir?
“Paris Ermənistanda Rusiyanı hərbi baxımdan əvəz etməyə çalışır”
Sözügedən məsələ ilə bağlı bağlı fikirlərini “Bakı-Xəbər”lə bölüşən politoloq Elşən Manafov hesab edir ki, Fransanın Ermənistanın silahlandırılması istiqamətində həyata keçirdiyi məqsədəyönlü siyasət təkcə orada silah bazarında özünə yer etmək maraqlarından irəli gəlmir: “Bu, Makron iqtidarının neomüstəmləkəçi siyasətindən qaynaqlanır. Son vaxtlar qara qitədə məruz qaldığı ciddi itkilərin müqabilində Fransa Cənubi Qafqazla bağlı siyasətinə dinamizm verməklə vəziyyətdən çıxmaq istəyir. Cənubi Qafqazda Ermənistan və Azərbaycan arasında məlum 44 günlük savaşdan sonra regionun yeni geosiyasi konfiqurasiyası Fransanı qane etmir. Fransa ilə Ermənistan arasında münasibətlərin “baci dövlətlər” ampluasında olduğunu da nəzərə almaq lazımdır. Paris Ermənistanda Rusiyanı hərbi baxımdan əvəz etməyə çalışır. Hərbi baxımdan əməkdaşlıq buna hesablanıb. Fransanın Cənubi Qafqaz uğrunda geosiyasi mübarizəyə qatilmasına gəlincə, hazırda Qərbin Rusiyanı Ukraynada məlum savaşa çəkməsi kontekstində Qərbdə bir sira dairələrdə olduğu kimi, Fransada da yanliş və illüzionist fikirlər formalaşib. O mənada ki, Rusiyanın Şərqi Avropada son dərəcə ağır müharibəyə cəlb olunduğu şəraitdə Kremlin Ermənistan və ətrafında yaşanan hadisələrə münasibətdə reaksiyası adekvat və operativ olmaya da bilər. Hazırda Qərb Ermənistanı KTMT barədə təxribatçı hərəkətlərə sövq etməklə məhz Rusiyanın səbr kasasının daşıb-daşmayacağı ilə bağlı məsələlərə aydınlıq gətirmək istəyir. Ermənistanın KTMT-də fəaliyyətini dondurması barədə qərarı təşkilatın qüvvədə olan nizamnaməsi ilə ziddiyyət təşkil edir. Ermənistan blokdan çıxması barədə qərarı bilərəkdən vermir. Bu halda onun bu qərarına blok da adekvat münasibət sərgiləyib, Ermənistanla bağlı öhdəliklərindən birtərəfli şəkildə imtina edə bilər. Ermənistan bu qərarı ilə Azərbaycanı ona qarşı adekvat addımlar atmağa sövq etmək istəyir. Əslində rəsmi Bakının Ermənistanla münasibətlərə yenidən baxmaqla bağlı hüququ da var. Çünki Ermənistan imza atib öz üzərinə götürdüyü öhdəliklərdən birtərəfli şəkildə imtina edir. Hadisələrin bu yönümdə inkişafı isə Ermənistanı cəzalandırmaq üçün məqam gözləyən rəsmi Moskvanın da xeyrinə olacaq. Paşinyanın bu halda Fransa və ya Avropa Birliyinin onun köməyinə gələcəyi ilə bağlı ümidləri isə gözundə qalacaq. Hazırda əsas qayğısı Ukraynaya silah və maliyyə dəstəyi verməkdən ibarət olan Aİ Ermənistana deklarativ mahiyyətli dəstəkdən başqa real bir dəstək verə bilməyəcək. Paşinyan iqtidarı isə öz ziddiyyətli mövqe və bəyənatları ilə Zəngəzur ətrafındakı danışıqları faktiki olaraq blokladığı üçün onun vurulması regionun təhlükəsizlik problemlərinin həllində 3+2 formatı çərçivəsində əməkdaşlığı müdafiə edən Türkiyə və İranın da maraqlarına cavab verəcək. Paşinyanın eskalasiyanın gücləndirilməsi istiqamətində ata biləcəyi hər hansı kiçik bir addım isə onun rejiminin süqutunu sürətləndirəcək”.
Vidadi ORDAHALLI
