Minimum 30 yaş tələbi götürülür - universitet partasından birbaşa məhkəmə hakimliyinə?..
Əliməmməd Nuriyev: “Məhkəmə insanların taleyini həll edən qərarlar qəbul edir, bu baxımdan yaşın çox böyük əhəmiyyəti var”
Hakim vəzifəsinə namizədlər üçün 30 yaş tələbi ləğv edilir. “Məhkəmələr və hakimlər haqqında” Qanuna təklif edilən dəyişiklikdə yaş senzi aradan qaldırılır.
Layihəyə əsasən, Azərbaycan Respublikası Konstitusiyasının 126-cı maddəsinin birinci hissəsinə uyğun olaraq seçkilərdə iştirak etmək hüququna malik olan, ali hüquq təhsilli, hüquqşünas ixtisası üzrə 5 ildən artıq işləyən Azərbaycan Respublikası vətəndaşları hakim ola biləcəklər.
Qeyd edək ki, qüvvədə olan qanuna əsasən, yaşı 30-dan aşağı olmayan, seçkilərdə iştirak etmək hüququna malik olan, ali hüquq təhsilli, hüquqşünas ixtisası üzrə 5 ildən artıq işləyən Azərbaycan Respublikası vətəndaşları hakim ola bilərlər.
Ancaq hüquqşünasların bununla bağlı fikirləri birmənalı deyil. Hesab edilir ki, dövlət adından hökm, qərar, qətnamə çıxaran şəxs kifayət qədər böyük təcrübəyə malik olmalıdır.
“… elə məsələlər var ki, yaş öz mühüm rolunu oynayır”
“Konstitusiya” Araşdırmalar Fondunun prezidenti Əliməmməd Nuriyev “Bakı-Xəbər”ə açıqlamasında bildirdi ki, müəyyən vəzifələr var ki, orda yaş senzinin olması vacibdir: “Hakim təcrübəli olmalıdır. Çünki məhkəmə son instansiyadır. Məhkəmə insanların taleyini həll edən qərarlar qəbul edir. Bu baxımdan yaşın çox böyük əhəmiyyəti var. Hakimin qərar qəbul etmək, taleyə təsir etməklə bağlı mühüm bir vəzifəsi var, burada təcrübəsi olan şəxslər çalışmalıdır. Gənclərin ümumilikdə idarəetmə prosesinə gəlməsinin tam tərəfdarıyam. Amma bunu icra hakimiyyəti sistemində daha yaxşı realizə etmək imkanları var. Amma hakim vəzifəsi ilə bağlı 30 yaş məhdudiyyətinin aradan qaldırılmasını mən o qədər də məqbul hesab etmirəm. Hesab edirəm ki, bu, bütövlükdə məhkəmə tərəfindən qəbul edilən qərarların keyfiyyətinə təsir göstərəcək. Çünki təcrübə çox vacib bir məsələdir. Əgər belə bir qərar veriləcəksə, o qədər də uğurlu olmayacaq. Bəlkə də başqa sahələrdə düşünmək olar. Əlbəttə, hakimliyə namizədlər imtahan verir, daha sonra uzun müddətli treninqlərə cəlb olunurlar, bir neçə mərhələdən keçirlər. Amma bütövlükdə yaş həddinin götürülməsi bu mərhələlərdən keçmək sayılmır. Hər hansı bir şəxsin böyük bir təcrübəyə malik olaraq hakim təyin etməsini fərqləndirmir. Elə məsələlər var ki, yaş öz mühüm rolunu oynayır”.
Günel CƏLİLOVA
