Makron Münhen sülh prosesini Paşinyana pozdurdu...
Mətin Məmmədli: “...Sülh danışıqlarını pozur, sülhün yaranmasını əngəlləyir”
Fransanın Cənubi Qafqazda sülhün əldə olunmasına qarşı həyata keçirdiyi təxribatlar saysız-hesabsızdır. Fransa çalışır ki, bizim bölgədə sülh olmasın, münaqişə ocaqları yaradılsın. Ermənistanın baş naziri Nikol Paşinyan da Fransa prezidenti Makronun sözü ilə oturub-durur. Biz bunu Paşinyanın Fransaya son səfərində də aydın şəkildə müşahidə etdik. Halbuki, Fransa səfərindən əvvəl Münhendə Azərbaycan Prezidenti ilə görüşdə Paşinyan başqa cür danşırdı, amma Fransaya gedər-getməz Munhen söhbətlərini unutdu. Heç şübhəsiz, Paşinyanın Fransaya səfəri zamanı davranışı və açıqlamaları Münhendə əldə olunmuş pozitiv siqnallara və irəliləyişə bir zərbə oldu. Yenə də o, öz ənənəsinə sadiq qalaraq sülh prosesində irəliləyişi məhz Makronun təhriki ilə pozdu. Paşinyan Makronun sözü və təhriki ilə yenə də verdiyi vədi unutdu. Ekspertlər hesab edir ki, Makron Münhendəki irəliləyişdən çox narahat olub. Ən çox da ondan narahat olub ki, bu görüş onun bir müddət müttəfilqik etdiyi Almaniya kanslerinin təşəbbüsü, təşkilatçılığı ilə baş tutub, bunu da Makron həzm edə bilmir.
Ekspertlər hesab edir ki, Fransa regionda sülhün olmasını qəti şəkildə istəmir, bu səbəbdən də vəziyyəti gərginləşdirir, Ermənistanı öz təsiri altında saxlayaraq onu yeni təxribatlara sürükləyir. Bir sözlə, Münhendə əldə olunmuş sülh razılaşmasını Paşinyan məhz Makronun təhriki ilə pozdu. Həmçinin Fransa Müdafiə nazirini Ermənistana göndərdi, Paşinyanla görüşdə onu qızışdırıb ortaya saldı ki, sülh əleyhinə danışsın, sülhü pozan ifadələr işlətsin.
“Bu, Ermənistan hökuməti tərəfindən növbəti ziddiyyətli addımdır”
Beynəlxalq Münasibətlərin Təhlili Mərkəzinin eksperti, siyasi elmlər üzrə fəlsəfə doktoru Mətin Məmmədli baki-xeber.com-a şərhində “Əlbəttə, Münhendə Almaniya kanslerinin təşəbbüsü ilə iki ölkə lideri görüşmüşdü. Görüşdən sonra danışıqlarda iki ölkə arasında sülh prosesi ilə bağlı müsbət mesajlar verildi. O cümlədən də Ermənistan tərəfindən. Münhen görüşündən qısa müddət sonra Paşinyanın Fransaya səfər etməsi və bu ölkədə səfərdə olarkən sülh prosesinə mane olan, əngəl törədən açıqlamalar verməsi, Azərbaycanı əsassız olaraq ittiham etməsi, əlbəttə ki, başadüşülən deyil. Bu, Ermənistan hökuməti tərəfindən növbəti ziddiyyətli addımdır. Eyni zamanda, təbii ki, burada Fransanın rolunu da xüsusi qeyd etmək lazımdır. Fransanın Ermənistanla, xüsusən də hərbi sahədə əməkdaşlıq etməsi və onu silahlandıması bölgədə hərbi-siyasi eskalasiyanı daha daha da gərginləşdirir, iki ölkə arasında davam edən sülh prosesinə mane olur”-deyə bildirdi.
M.Məmmədlinin sözlərinə görə, burada Fransanın maraqları ondan ibarətdir ki, ilk növbədə Ermənistan vasitəsilə bölgədə mövqeyini möhkəmləndirməyə çalışır. “Ermənistandan alət olaraq istifadə etmyə çalışır. Niyyət ondan ibarətdir ki, Ermənistanı Rusiyadan qopararaq öz nüfuz dairəsinə salsın. Təəssüf ki, Ermənistan hökuməti Fransanın bu maraqlarından çıxış edərək danışıqlar prosesində qeyri-konstruktiv mövqe nümayiş etdirir. Bu da, qeyd etdiyimiz kimi, nəticə etibarilə sülh danışıqlarını pozur, sülhün yaranmasını əngəlləyir”-deyə M.Məmmədli bildirdi.
M.Məmmədli əlavə etdi ki, Fransanın müdafiə nazirinin Ermənistana gəlməsi, bu ölkə üçün ayrılmış hərbi texnika ilə bağlı açıqlamalar verməsi, onun Paşinyanla hərbi əməkdaşlıqdan danışması kimi amillər də burabaşa sülhə təhdid kimi ortaya çıxır.
İradə SARIYEVA
