Belə düşmənçilik hara, ABŞ-ın Rusiyadan 1 milyardlıq uran alması hara?!.
Məhərrəm Zülfüqarlı: “Birləşmiş Ştatlar Ukraynada ölənlərin qanı hesabına milyardlar qazanır”
Avropa dövlətlərinin, xüsusilə də Almaniya iqtisadiyyatının tənəzzülə doğru irəlilədiyi bir vaxtda Ukraynada davam edən hərbi əməliyyatlar hesabına ABŞ iqtisadiyyatı yüksələn xətlə inkişaf edir.
Məlum olub ki, Ukraynaya hərbi yardım göstərmək ABŞ-ın hərbi sənaye kompleksinə ciddi təkan verib. Onların sifarişləri həddən artıq artıb. Belə ki, 2022-ci ilin fevralından 2024-cü ilin fevralına kimi ABŞ-ın hərbi sənaye kompleksinin istehsal həcmi 17,5 faiz artıb.
Digər tərəfdən Avropa, nefti də Amerikadan almağa məcbur edilir. ABŞ Avropaya Rusiya neft-qazının alışını qadağan etdiyi vaxtda özü bəzi məhsullar üzrə fərqli mövqedədir. 2023-cü ildə Rusiyadan ABŞ-a zənginləşdirilmiş uran idxalı 1,19 milyard dollar təşkil edib ki, bu da 2022-ci illə müqayisədə 360 milyon dollar çoxdur. Həmçinin 1992-ci ildən bəri rekord göstəricidir. Necə olur ki, Avropanın Rusiyadan neft-qaz idxalına cəza tətbiq edilir, Birləşmiş Ştatlar isə Rusiyadan daha çox uran idxal edir?
“Rusiya rəhbərliyinin ağılsız hegemonçuluq siyasəti bu ölkəni tələyə saldı”
Məsələ ilə bağlı “Bakı-Xəbər”ə açıqlama verən AVCİYA-nın vitse-prezidenti, professor Məhərrəm Zülfüqarlı hesab edir ki, bu, Birləşmiş Ştatların nə dərəcədə ədalətsiz olduğunu ortaya qoyur: “Silah istehsal olunursa, o kiməsə satılmalıdır. Ona görə də dünyada münaqişə ocaqlarını yaradan əsas dövlət ABŞ-dır. Çünki münaqişə olmasa, istehsal olunan silahlar satılmaz. Bu səbəbdən Rusiya-Ukrayna müharibəsi ən çox ABŞ-ın işinə yarayır. Baxın, Birləşmiş Ştatlar elə bir zəmin yaradıb ki, bir sıra Avropa ölkələri Birləşmiş Ştatlar hesabına öz silah arsenalını yeniləyir. Nə qədər köhnə silah varsa, hamısı Ukraynaya yönəldilir. Əvəzində böyük milyardlar hesabına ABŞ-a yeni silahlar sifariş verilib. ABŞ bir tərəfdən Avropa İttifaqı ölkələrinin Rusiya ilə olan bütün əlaqələrini kəsməyə çalışır, buna əməl etməyənləri sanksiyalarla həsələyir, o biri tərəfdən də Rusiyadan böyük miqdarda uran idxal edir. Avropa ölkələri Ukrayna müharibəsinə qədər qaza olan tələbatın 40 faizini Rusiya hesabına təmin edirdilər. Hazırda bu, 8 faizə düşüb. Əvəzində ABŞ baha qiymətə maye qazı Avropaya satır. Bütün bunlar onu göstərir ki, Rusiya-Ukrayna müharibəsindən ən çox qazanan ABŞ-dır. Bunu heç gizlətmirlər də. Sadəcə olaraq, Rusiya rəhbərliyinin ağılsız hegemonçuluq siyasəti bu ölkəni tələyə saldı. Putin Ukrayna müharibəsinə getməklə böyük səhvə yol verdi. Rusiya xaraba qoyduğu Ukrayna şəhərlərini ələ keçirsə də resurs itkiləri qat-qat böyükdür. Bunun fəsadları hələ sonra özünü göstərəcək. Rusiyanın 300 milyard dollar vəsaiti dondurulub və o pulların müsadirə edilərək Ukraynaya verilməsi üzərində iş gedir. İstənilən halda, qazanan tərəf ABŞ-dır. Həmin ABŞ Avropanı Rusiya ilə ticarət aparmağa qoymur, amma özü uran idxal edir. Bu onu göstərir ki, ABŞ Ukraynada ölənlərin qanı hesabına milyardlar qazanır. Bax, əsl mənzərə budur. ABŞ-ın maraqlarına uyğun gələndə insan haqlarını müdafiə edir, uyğun gəlməyəndə nala-mıxa vurur. Çünki bunların məqsədi silahları satıb milyardlar qazanmaqdır”.
Vidadi ORDAHALLI
