Turizmdə qonşulardan geri qaldığımızı bu rəqəmlər göstərir...
Fuad İbrahimov: “Bunun bir səbəbi onunla əlaqədardır ki, 4 ildir quru sərhədlərimiz bağlıdır”
Azərbaycan 2023-cü ildə turizmdən cəmi 1,4 mlrd. dollar gəlir əldə edib. Ölkəyə ümumilikdə 2 mln. 85 min turist gəlib və hər bir turist ortalama 671 dollar vəsait xərcləyib.
Müqayisə üçün qeyd edək ki, Gürcüstana 2023-cü ildə 5.1 mln. turist gəlib. Ölkənin turizmdən gələn gəliri 4,8 mlrd. dollar olub və hər bir turist, ortalama 941 dollar xərcləyiblər. Ermənistana 2023-cü ildə 2 mln. 300 min turist gəlib. Bu ölkə turizmdən 2,1 mlrd. dollardan vəsait qazanıb.
Gürcüstanı anladıq. O mənada ki, açıq dənizə çıxışı var, bu sahənin inkişafına xüsusi diqqət verilir və s. O zaman turist sayına və gəlirlərinə görə Ermənistana niyə uduzuruq? Ölkəmizdə turizm sahəsində ciddi inkişafa nail olmaq üçün çıxış yolu nədədir?
“Bizdə xidmət sektoru qiymət sarıdan od tutub yanır, regionlarda və Bakıda qiymətlər çox bahadır”
Sözügedən məsələ ilə bağlı fikirlərini “Bakı-Xəbər”lə bölüşən iqtisadçı-ekspert Fuad İbrahimov buna bir neçə aspektdən yanaşdı: “Bizim turizm gəlirlərində qonşu ölkələrə uduzmağımızın bir səbəbi onunla əlaqədardır ki, 4 ildir quru sərhədlərimiz bağlıdır. Pandemiyadan üzübəri sərhədlər bağlıdır. Təhlükəsizlik nöqteyi-nəzərindən də sərhədlər bağlı saxlanılır. Halbuki, turist axınını təmin etmək üçün quru sərhədlərin açıq olması mühüm şərtlərdən biridir. İkincisi, Azərbaycana alternativ vasitələrlə gəlmək yalnız təyyarə ilə mümkündür. Bu gün regionlarda beynəlxalq hava limanlarının olmasına baxmayaraq, onlar faktiki olaraq işləmir. Regionlardan xaricə birbaşa reyislər çox azdır. Üçüncüsü, bizdə aviabiletlərin qiyməti qonşu ölkələrlə müqayisədə çox bahadır. Aviadaşımalarda rəqabət yoxdur. Dördüncüsü, bizdə otellərin qiyməti çox bahadır. Kiçik otellərin sayı çox deyil. Hostel şəbəkəsi inkişaf etməyib. Halbuki, Gürcüstanda kiçik otel funksiyasını yerinə yetirən hostellərə geniş meydan verilib. Bizdə xidmət sektoru qiymət sarıdan od tutub yanır. İstər regionlarda olsun, istərsədə Bakıda qiymətlər çox bahadır. Restoranlarda belə, turistlərdən çox pul qoparmağa çalışırlar. Digər müştərilərlə müqayisədə onlara fərqli baxırlar. Belə olan halda bizə çoxsaylı turist necə gəlsin? Turist şəffaflığı sevir. Bütün bu problemləri ümumiləşdirəndə Azərbaycan turizmə görə qonşu ölkələrə uduzur. Sadalanan məsələlər həll edilməsə, bu sahədə qonşu ölkələrdən geri qalmağda davam edəcəyik. Ona görə də, ilk növbədə quru sərhədlər açılmalıdır, regionlarda hava limanları işləməlidir. Xidmət sektorunda süni bahaçılıq ortadan qaldırılmalıdır. Azərbaycanın neft gəlirləri var deyə, bu sahənin inkişafına barmaqarası baxılır. Problem həm də bununla bağlıdır. Yoxsa bizim turizm potensialımız həm Gürcüstandan, həm də Ermənistandan qat-qat böyükdür”.
Vidadi ORDAHALLI
