Ermənistanda Aİ missiyası ilə rus hərbçilərinin münasibəti gərginləşir...
Bəhruz Quliyev: “Toqquşma versiyası bu gün olmasa da, qarşıdakı aylarda belə bir ehtimal var”
Ermənistan Təhlükəsizlik Şurasının katibi Armen Qriqoryan Rusiyanı Nerkin And kəndi yaxınlığında sərhəd insidentini dayandırmamaqda ittiham edib. Qriqoryan qeyd edib ki, rus hərbçilər Aİ müşahidəçilərini Nerkin-Anda buraxmırlar:
“Bilirsiniz ki, Nerkin Anda Aİ missiyasının çıxışı yoxdur, yalnız Rusiya Federasiyasının çıxışı var və orada mövcuddur. Rusiya insidenti dayandıra bilmədi”.
Qriqoryan Moskvanın Aİ-ni tənqid etməsinə cavab olaraq bildirib: “Əminəm ki, reallıq başqadır. Aydındır ki, Aİ-nin mülki missiyası sabitləşdirici rol oynayır. Biz onların fəaliyyətini tam dəstəkləyirik və bundan sonra da dəstəkləyəcəyik”.
“Nə üçün Aİ missiyasının Nerkin And kəndi yaxınlığındakı hissəyə çıxışı yoxdur” sualına Qriqoryan belə cavab verib: “Bəli, bu problem mövcuddur. Rus hərbçilər Aİ müşahidəçilərini Nerkin-Anda buraxmırlar. Biz bu problemi həll etməyə çalışırıq”.
Maraqlıdır, bütün bu deyilənlərin fonunda, Ermənistanda ruslarla Aİ missiyasının toqquşma ehtimalı varmı?
“Rusiya Ermənistanı açıq müharibə apardığı Qərbə güzəştə getmək niyyətində deyil”
Sözügedən məsələni “Bakı-Xəbər”ə şərh edən “SƏS” Media Qrupunun rəhbəri, politoloq Bəhruz Quliyevin fikrincə, bu gün Ermənistan müstəqil olmayan, kosmopolit ölkədir və tasması başqasının əlindədir: “Belə ölkələr adətən sərbəst, öz milli maraqlarına söykənən qərarlar verə bilmirlər. Ermənistan tarixən Rusiyanın qapazı altında olub. Azərbaycan torpaqlarında yaradılan qondarma erməni dövlətinin mövcudluğu da Rusiyanın xeyir-duasından asılıdır. Ermənistan bu gün öz ağasına dönük çıxmaq istəyir və yeni çətir axtarır. Fransa ilə “bacı” olması İrəvanı həvəsləndirir. Güman edir ki, Parisin “sehrli əlləri” onu bütün təhlükələrdən qoruya biləcək. Amma unudur ki, Rusiya Ermənistanın içində oturub və bu ölkənin bütün sərhədləri də Federal Sərhəd Xidmətinin hərbçiləri tərəfindən qorunur. Rusiya Ermənistanı açıq müharibə apardığı Qərbə güzəştə getmək niyyətində deyil. Bu özünü Nerkin And kəndi ətrafında baş verən hadisələrdə də göstərdi. Ermənistanda anti-Rusiya münasibətləri 44 günlük müharibədən sonra açıq müstəviyə keçib. Ermənilər müharibədə uğradıqları ağır məğlubiyyətdə Rusiyanın rəhbərlik etdiyi KTMT-ni bu gün də günahlandırırlar. Amma anlamaq istəmirlər ki, müharibə Ermənistan ərazilərinə keçməyənə qədər hərbi birliyə üzv dövlətlərin məsələyə müdaxiləsi mümkün deyil. Bu gün də oxşar hadisələr yaşanır. Ermənistan bu dəfə də Avropa ölkələrinin “mülki müşahidə missiyası”nın nümayəndələrini hadisənin baş verdiyi Nerkin And kəndinə dəvət etməklə yeni oyunlar qurduğunu düşünür. Rəsmi İrəvan bu addımı ilə Fransanın rəhbərlik etdiyi Avropa missiyasının bölgədə nə qədər önəmli gücə malik olduğunu Moskvaya anlatmağa çalışır. Amma həmin ərazilərdə Rusiya sərhədçiləri var və avropalıların hadisələrdə aparıcı rola malik olması onların maraqlarına uyğun deyil. Ermənistanın növbəti addımı qarşı-qarşıya duran iki qüvvə arasında genişmiqyaslı toqquşmaların baş verməsinə hesablanıb. Bu yanaşma təsadüfi deyil, çünki Ermənistan məğlub tərəfdir, İrəvan düşünür ki, itirəcəyi heç nə yoxdur. Amma iki gücün Cənubi Qafqazda üz-üzə dayanması nələrisə dəyişdirə bilər. Ancaq yanılır, regional aktorların arasında nə Fransa, nə də Qərb var. Nəzərə alsaq ki, Avropa İttifaqının mülki müşahidə missiyası hərbçilərdən və əsasən də kəşfiyyatçılardan təşkil olunub, bu gün olmasa da qarşıdakı aylarda toqquşma versiyası kimi ehtimal var. Qərbin məqsədi Rusiyanı Cənubi Qafqazdan çıxarmaq, onun yerini tutmaqdır”.
Vidadi ORDAHALLI
