İlham Əliyevin İstanbul Zirvəsinə məktubu bu faktlara söykənir...
Tural İsmayılov: “Azərbaycanın bu tip bəşəri və dünyəvi məsələlərlə mübarizə aparması dövlətimizin potensialını göstərir”
“Hazırda hökm sürən iqlim dəyişmələri planetimizi təhdid edən başlıca problemlər sırasında yer almaqdadır”. Bu fikirlər Prezident İlham Əliyevin İstanbulda keçirilən 27-ci Avrasiya İqtisadi Zirvə toplantısının iştirakçılarına məktubunda yer alıb.
Dövlət başçısı iqlim dəyişmələrinin təsirlərinin artıq həyatın bütün sahələrində özünü büruzə verdiyini əlavə edib: “Azərbaycan iqlim dəyişmələri ilə mübarizə məsələlərinə böyük diqqət ayırır, onun mənfi fəsadlarının azaldılması üçün birgə fəaliyyətin təmin olunması istiqamətində səylər göstərir. Təsadüfi deyil ki, dünyada ən mötəbər beynəlxalq tədbirlərdən biri olan BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) bütün ölkələrin yekdil qərarı ilə 2024-cü ildə məhz Azərbaycanda keçiriləcəkdir”.
Qeyd edək ki, İlham Əliyevin məktubda ifadə etdiyi məsələlər həqiqətən Azərbaycanın bu istiqamətdə son illərdə həyata keçirdiyi bir sıra strateji layihələrə əsaslanır. Məsələn, işğaldan azad edilmiş rayonlarımızda qısa müddətdə çoxlu sayda hidroelektrik stansiyalar tikilib və ermənilərin dağıtdığı belə stansiyalar bərpa olunub. Üstəlik, bu ərazilərdə Günəş elektrik stansiyalarının tikilməsi üçün müxtəlif layihələr həyata keçirilməyə başlanılıb, xarici ölkələrlə bu sahəyə investisiya qoyulması üçün sazişlər imzalanıb. O cümlədən, Azərbaycanın istehsal edəcəyi "Yaşıl enerjinin" Avropaya və qonşu ölkələrə ixracına imkan verən beynəlxalq razılaşmalar əldə olunub və sair. Bütün bunlar Azərbaycanın iqlim dəyişmələrinin nəticələri ilə mübarizəyə böyük töhfələr vermək iradəsindən və potensialından xəbər verir.
“Azərbaycanın yaşıl enerjini təşviq etməsi, eyni zamanda enerji məsələsi ilə bağlı gücü bütün dünyaya bəllidir”
Siyasi şərhçi Tural İsmayılov “Bakı-Xəbər”ə açıqlamasında qeyd etdi ki, hazırda iqlim problemi bütün dünya ölkələrini narahat etsə də, lazımi tədbirlər görülmür: “Təəssüf ki, dünyanın böyük dövlətləri qlobal istiləşmə ilə bağlı heç bir addım atmır. Nəticədə havada böyük dəyişikliklər baş verir. Hava səbəbilə insanların orqanizmində də problemlər yaranır. Belə olan halda qlobal iqlim dəyişikliyi ilə mübarizə aparan ölkələr sırasında Azərbaycan ilk yerdədir. Azərbaycanın bu tip bəşəri və dünyəvi məsələlərlə mübarizə aparması dövlətimizin potensialını göstərir. Prezident İlham Əliyev dəfələrlə vurğulayıb ki, Azərbaycan qlobal iqlim dəyişikliyi ilə mübarizədə ön sırada yer alacaq. Danılmaz faktdır ki, ölkəmizin bu sahədə böyük potensialı var. Biz hər bir dövrdə bu potensialımızı yüksək səviyyədə göstəririk”.
Həmsöhbətimiz hesab edir ki, Azərbaycanın yaşıl enerjini təşviq etməsi, eyni zamanda, enerji məsələsi ilə bağlı gücü bütün dünyaya bəllidir. Azərbaycanın COP29-a ev sahibliyi etməsi bunun bariz nümunəsidir.
Günel CƏLİLOVA
