Şuşa azad edilən gün şəhid oldu, ölümündən sonra isə... Anası Pərvanə Fərhadova danışır
Pərvanə Fərhadova: “Elə bir oğul idi ki, ailədə atasını əvəz edirdi, hamımızın qayğısına qalırdı, iki bacısını ali məktəbdə oxudurdu”
Fevralın 19-da Göyçay rayon Heydər Əliyev Mərkəzində Mədəniyyət Nazirliyi Respublika Xatirə Kitabı Redaksiyasının hazırladığı “44 gün - Tarixi zəfər” adlı kitabın I və II cildinin təqdimat mərasimi çərçivəsində tədbirdə iştirak edən bir neçə şəhidin valideynindən övladları ilə bağlı müsahiblələr götürdük.
“Uğrunda şəhid olduğu Şuşada dəfn edildi”
Budəfəki müsahibimiz İkinci Qarabağ müharibəsində əsgər rütbəsində döyüşən, Azərbaycan Prezidenti İlham Əliyevin 05.11.2021-ci il tarixli Sərəncamına əsasən ölümündən sonra "Azərbaycan Bayrağı" ordeni ilə təltif edilən 19 yaşlı ağdaşlı şəhid Cəlaləddin Elxan oğlu Fərhadovun anası Pərvanə Fərhadovadır.
- Cəlaləddin evimin tək oğlu, iki bacının bircə qardaşı, arxamız, dayağımız, köməyimiz idi…
- Vətən müharibəsi başlayanda əsgər idi?
- Bəli. Cəlaləddin 2019-cu ildə həqiqi hərbi xidmətə getdi. 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan İkinci Qarabağ müharibəsi zamanı Cəlaləddin Şuşanın və Füzulinin, Cəbrayılın azad edilməsi uğrunda döyüşdü.
- Bəs harda, nə vaxt şəhidlik zirvəsinə ucaldı?
- 2020-ci il noyabrın 8-də Şuşa qələbəsindən 2 saat sonra su gətirmək üçün gedərkən şəhid olub.
- Ağdaşda dəfn edilib?
- Xeyr, uğrunda şəhid olduğu Şuşada dəfn edildi. Şəhid olanda 19 yaşı vardı, subay idi. Hərbi xidməti bitirməyinə üç ay qalmış şəhadətə ucaldı.
Oğlumun şəhid olması xəbərini çox ağır qarşıladım, hələ də o ağırılar içində qovruluram. Uzun müddət heç yerə çıxa bilmədim, təzə-təzə tədbirlərə qatılıram. O atasız böyümüşdü. Elə bir oğul idi ki, ailədə atasını əvəz edirdi, hamımızın qayğısına qalırdı, iki bacısını ali məktəbdə oxudurdu.
- Özü ali məktəbə sənəd verməmişdi?
- Xeyr, 13 yaşından ailəni dolandırmaq üçün çayçı işləyirdi. Cəlaləddin bizim əziyyətimizi çox çəkdi. Evimizin kişisi idi, bütün problemimizi o həll edirdi. Oğlum əsl kişi kimi böyüdü, çox qeyrətli oğul idi, çox. Oğlum həyatda mənim ən böyük itkim oldu.
- Təsəlliniz nədir?
- Bizim oğullara dəyər veriləndə, onların adları çəkiləndə biz də yaşayırıq, biz də nəfəs alırıq. Təsəllimiz o olur ki, balalarımız unudulmur. Bizi unutmayanlardan biri də Respublika Xatirə Kitabı Redaksiyasıdır. Xəstə olmağıma baxmayaraq, “44 gün - Tarixi zəfər” adlı kitabın təqdimatına gəldim. Bu kitabın işığına durub gəlmişəm ki, orada Cəlaləddinin adı, şəkli var (kitabı sinəsinə sıxır). Biz bundan qürur hissi keçiririk.
- Cəlaləddin böyük övladınız idi?
- Sonbeşiyim... 1 may 2001-ci ildə Ağdaş rayonunda anadan olub. Ağdaş rayonu 1 saylı orta məktəbin I sinfinə qəbul olunub, 2018-ci ildə məktəbi bitirib.
Çox əziyyət çəkmiş bir oğul idi. Ailənin bütün yükünü çiyinlərində daşıyırdı, amma yoruldum demirdi. Onu da deyim ki, oğlum Ağdaşda “su şəhidi” kimi tanınır.
- Ön cəbhədə olduğunu bilirdinizmi?
- Xeyr, deməmişdi. Təkcə qardaşımgil onun ön cəbhədə olduğunu bilirdi. Həmişə danışanda bizi arxayın salırdı ki, narahat olmayın mən arxadayam, hər şey yaxşıdı. Cəsur idi oğlum. Danışırlar ki, hətta bir dəfə Cəlaləddin komandirini yanan tankdan çıxarıb. Şuşada olanda yoldaşları ondan yaşca böyük könüllü əsgərlər olublar.. Aralarında ən kiçik oğlum olub.
- Hansı təltifləri oldu?
- "Vətən uğrunda”, “Şuşanın azad olunmasına görə”, “Cəbrayılın azad olunmasına görə” medalları ilə təltif edilib. Prezident oğlumu “Azərbaycan Bayrağı” ordeni ilə təltif etdi... Şəhid olduqdan sonra bu yüksək ordenə layiq görüldü. Oğlumun qəhrəmanlığı, cəsurluğu, vətən sevgisi bir örnəkdir. Oğlumun şəhid olması məni çox ağrıtsa da, onun qeyrəti, vətənpərvərliyi məni çox qürurlandırır. O əgər əsgər olmasaydı, müharibəyə könüllü gedərdi. Yəni onda çox böyük Vətən sevgisi vardı.
İradə SARIYEVA
