ABŞ-da Texas üsyanı böyüyür - Birləşmiş Ştatlar parçalanır...
ABŞ-ın Missuri ştatının qubernatoru Mayk Parson Texas hakimiyyətinə sərhədi qorumaq üçün Milli Qvardiyanın əsgərlərini göndərəcəyini bildirib.
Parson mətbuat konfransında bu xüsusda bildirib: “Mart ayından etibarən Missuridən ilk patrul orada olacaq. Əvvəlcə 11 zabit olacaq. Milli Qvardiya üzvlərinin ilkin yerləşdirilməsinin martın 10-da başlayacağını gözləyirik".
Missuri rəhbəri əməliyyatın ilkin olaraq 90 gün davam edəcəyini bildirib. Parson qeyd edib ki, onun dövləti üçün təhlükə sərhəddən axan böyük həcmdə narkotikdir. O da vurğulanır ki, ABŞ qeyri-qanuni miqrasiyanın rekord səviyyələrini qeydə alır, sərhəd rəsmiləri keçən dekabr ayında 302 000 qeyri-qanuni sərhəd keçidini qeydə alıblar ki, bu da bir ayda ən böyük rəqəmdir. Bu arada o da bəlli olub ki, Texasda, Meksika ilə sərhəddə qanunsuz miqrant axınına qarşı hərbi düşərgə yaranacaq. Ştatın qubernatoru Qreq Ebbotun sözlərinə görə, orada 2,3 minə qədər əsgər yerləşdirmək olar: “Sərhəd təhlükəsizliyi imkanlarımızı artırmaq üçün biz Texas Milli Qvardiyasına ərazidə əməliyyatları təkmilləşdirməyə imkan verəcək yeni hərbi düşərgə tikirik". Bununla da Texas rəsmiləri ilə Ağ Ev arasında Meksikadan gələn qeyri-qanuni miqrant axını ilə bağlı gərginlik getdikcə artır. Texas qubernatoru Qreq Ebbot sərhədləri qorumaq üçün federal səlahiyyətlilərlə münaqişəyə hazır olduğunu bildirir. Ağ Ev hələ ki, üsyankar qubenatora qarşı hansısa təsirli tədbirlər görə bilmir. Bundan əvvəl Texas hakimiyyəti sərhədi qeyri-qanuni miqrant axınından qorumaq üçün yerli Milli Qvardiyanı səfərbər edib, həmçinin onlardan qorunmaq üçün tikanlı məftillərdən divar tikməyə başlayıb. Qreq Ebbott yerli hüquq-mühafizə orqanlarına miqrantları saxlamağa və hakimlərə onların ABŞ-dan deportasiya edilməsinə göstəriş verməyə icazə verən qanunu imzalayıb, həmçinin miqrantların Vaşinqton, Nyu-York və Çikaqo daxil olmaqla, Amerikanın böyük şəhərlərinə gğndərilməsinə dair əmr verib. 2022-ci ildən bəri Ebbott 102100 nəfərin ölkənin digər bölgələrinə göndərildiyini bildirib.
Indilikdə Texasda immiqrasiya qalmaqalları fonunda Amerika Birləşmiş Ştatlarından ayrılma çağırışları güclənib. “Newsweek” jurnalı yazır ki, buna səbəb federal orqanlara ştatın qubernatoru Qreq Ebbottun Meksika ilə sərhəddə inşa etməyə başladığı tikanlı məftilli divarı sökməyə icazə verən Ali Məhkəmənin qərarı olub: “Bu bəyanatlardan sonra ştatın Şimali Amerika əyalətindən ayrılması olan “Texit” tərəfdarları Texasda yenidən aktivləşib”. “Texit” hərəkatının lideri Daniel Millerin sözlərinə görə, bu vəziyyətdən istifadə edərək, ABŞ-da başlayan Respublikaçıların praymerizində Texasın müstəqilliyi məsələsini səsvermə bülleteninə daxil etməyə çalışıb. Bu arada ABŞ-ın 26 baş prokuroru Texas qubernatorunun “miqrant işğalı”na dair mövqeyini müdafiə edib. 26 respublikaçı baş prokurorun prezident Co Baydenə və daxili təhlükəsizlik katibi Alexandro Mayorkasa ünvanladığı məktubda “milyonlarla insanın ABŞ sərhədinə koordinasiyalı hücumunun” işğal olduğu və ştatın özünü bu işğaldan qorumalı olduğu qeyd edilib. Məktubda vurğulanıb ki, Texasın yerləşdirdiyi baryerlərin federal hökumət tərəfindən dağıdılmasına çalışılmasına rəğmən öz sərhədinin mühafizəsinə çalışması alqışlanmalıdır. Baş prokurorlar əlavə ediblər ki, ştat özünü işğaldan qorumaq qabiliyyətində olmalıdır və heç kim buna etiraz etmir:
“Hazırda kartellər, terror qrupları və digər pis niyyətli aktorlar böyük insan axınını təşkil etmək üçün sərhəddəki xaosdan yararlanırlar. Qanunsuz qruplaşmalar öz “yırtıcı” üzvlərini gizlətmək üçün ABŞ-a daxil olan insan axınından istifadə edirlər. Milyonlarla insanın koodrinasiyalı hücumun bir parçası kimi Texasa gəlməsi işğaldır. Nə Texas, nə də hansısa digər ştat bu cür insan axınının öhdəsindən gələ bilməz”. Ayova ştatının baş prokuroru Brenna Börd və Utah ştatının baş prokuroru Şan Reyesin rəhbərliyi ilə hazırlanmış müraciətdə qeyd olunub ki, 2021-ci ildə Baydenin inauqurasiyasından sonra 6 milyon qanunsuz miqrant ölkənin cənub sərhədini keçib: “Bu, üç ildən az bir müddətdə Ayova və Utah ştatlarının əhalisi qədər insanın bizim ölkəmizə əlavə edilməsidir”. Börd “Fox News Digital”a açıqlamasında bildirib ki, cənub sərhədinin işğalı bütün ştatları sərhəd ştatına çevirir: “Əgər Bayden administrasiyası bizim sərhədimizin mühafizəsi və amerikalıların təhlükəsizliyinin saxlanılmasına dair öz vəzifəsini yerinə yetirməyəcəksə, kənara çəkilməli və ştata öz işini özü görməyə icazə verməlidir”. Qeyd edək ki, ABŞ Ali Məhkəməsi yanvarın 22-də qeyri-qanuni mühacir axını ilə mübarizə aparmaq üçün Texas ştatı tərəfindən ABŞ-Meksika sərhədində quraşdırılmış 48 kilometr uzunluğunda tikanlı məftil hasarının sökülməsinə qərar verib. Amma yuxarıda qeyd edildiyi kimi, Texas hakimiyyəti buna qarşı çıxır. Belə vəziyyət ABŞ-ın parçalanması üçün ilkin şəraitin yaranmaqda olduğunu göstərir.
Tahir TAĞIYEV
