Qarabağ erməniləri Ermənistandan qaçır, yerlərinə hindistanlılar doluşur...
Elçin Qurbanov: “Nəticə etibarilə Qarabağ ermənilərinin əksəriyyəti Rusiyanın cənubuna, Qara dəniz bölgəsinə köçüb gedəcək”
Qarabağdan köçən ermənilərin 15 faizi Ermənistanı tərk edib. Bunu erməni professor Tatul Manaseryan deyib. Onun sözlərinə görə, Qarabağ sakinlərinin Ermənistandan getməsi əsasən iş tapmaqda yaranan çətinliklərlə bağlıdır.
Manaseryan bildirib ki, əmək bazarında vəziyyət əmək miqrantlarının kütləvi axını ilə daha da ağırlaşıb:
“Təkcə Hindistandan Ermənistana 14 minə yaxın əmək miqrantı gəlib. Ermənistan iqtisadi artıma görə Aİİ-də liderdir, lakin buna baxmayaraq, ölkədə yoxsulluğun səviyyəsi artıq üçüncü ildir ki, artmaqdadır. Rəsmi məlumatlara görə, Ermənistanda yoxsulluq səviyyəsi 42%-dir, lakin ekspertlərin hesablamalarına görə, Şirak bölgəsində bu rəqəm 60%-i keçir”.
Təzadlı fikirlərdi. Hindistandan Ermənistana əmək miqrantları gəlirsə, onda işsizlik səbəbindən Qarabağ erməniləri niyə oranı tərk edir?
İqtisadçı ekspert Elçin Qurbanov “Bakı-Xəbər”ə açıqlamasında bildirdi ki, Qarabağ ermənilərinin Ermənistanı kütləvi şəkildə tərk etməsini ötən ilin sonlarında onların öz rəsmi qurumları da təsdiqlədi: “Həmin məlumatlarda bildirilirdi ki, sentyabrın 25-dən noyabrın 26-dək Qarabağdan gedən ermənilərin 10 929 nəfəri Ermənistanı tərk edib.
Bu barədə Ermənistan Milli Təhlükəsizlik Şurası məlumat yaymışdı.
Qeyd edək ki, Qarabağda yaşayan ermənilərin xeyli hissəsi Rusiya və digər ölkələrin vətəndaşları idilər. Onların Ermənistanı tərk edəcəyi əvvəlcədən gözlənilirdi. Lakin Ermənistan Milli Təhlükəsizlik Şurasının guya bu ölkəni tərk edən Qarabağ ermənilərinin 4303 nəfərinin geri qayıtdığını iddia etməsi inandırıcı deyil. Görünür, Ermənistan Qarabağı könüllü tərk edən ermənilər üçün xarici dövlətlər və beynəlxalq təşkilatlardan gələn yardımların dayanmasını istəmir. Ona görə də guya ölkəni tərk edənlərin təqribən yarısının geri qayıtdığı haqda dezinformasiya yayırlar. Qarabağ ermənilərinin əksəriyyəti çox yaxşı başa düşür ki, Ermənistanda onları qəbul etməyəcəklər. Müəyyən sosial-iqtisadi çətinliklər var, çünki Ermənistan kiçik ölkədir, onun öz problemləri də var. Psixoloji uyğunluq məsələlərini də qeyd etməliyik. Qarabağ ermənilərinin kiçik bir hissəsi orada qalacaq.
Hindistandan ora kütləvi miqrantların gəlməsi faktı da reallığı əks etdirmir. Belə yaxşı şərait varsa, niyə ermənilər oranı tərk edir? Hindistanla bağlı rəqəmlə manipulyasiya məqsədli şəkildə edilir. Hazırda Ermənistanla Hindistan arasında hərbi sahədə ciddi əməkdaşlıq mövcuddur. Hindistan Ermənistana külli miqdarda silah satır. Həmin silahların işlədilməsi, yerləşdirilməsi üçün Hindistandan çoxlu sayda hərbçi və mütəxəssislər Ermənistana ezam oluna bilər. Bu faktı gizlətmək üçün onlara əmək miqrantı donunu geyindirirlər. Ermənistan belə oyunlara öyrəşib. Avropadan gələn hərbçiləri öz ərazisində mülki missiya adı ilə necə gizlədirsə, hindistanlı mütəxəsissləri də əmək miqrantı adı ilə sığortalayır. Qarabağ erməniləri siyasi oyunlarda qurbana çevrildilər. Onlar Ermənistanda heç kimə lazım deyillər. 1990-cı illərdə Azərbaycandan köç edən ermənilərin əksəriyyəti Ermənistanda qalmadı. Üçüncü ölkələrə köçüb getdilər. Həmin aqibət də Qarabağ erməniləri üçün hazırlanıb. Deyilənə görə, artıq onların 20 faizi Ermənistanı tərk edib. Onların sayı hər gün artır. Nəticə etibarilə Qarabağ ermənilərinin əksəriyyəti Rusiyanın cənubuna, Qara dəniz bölgəsinə köçüb gedəcək. Bu gün Qarabağ ermənilərinin başına gələnlər bəzi Qərb ölkələrinin çirkin oyunlarının nəticəsidir”.
Məhəmmədəli QƏRİBLİ
