Ən çox şikayət olunan 3 bank bunlardır - camaat nədən narazıdır?..
Əkrəm Həsənov: “Vətəndaşların şikayətləri əksər hallarda kreditlə bağlı olur”
Azərbaycan Mərkəzi Bankı (AMB) banklar arasında şikayət indeksini açıqlayıb. Məlumata görə, ən çox şikayət edilən bank 6,22 indeksi ilə "Bank of Baku" seçilib. "Bank BTB" siyahıda ikinci (5,18 indeksi), "Yapı Kredi Azərbaycan" isə üçüncü (4,17indeksi) olub. Bank VTB Azərbaycan, Expressbank, Bank Avrasiya, Yelo Bank, Unibank da ən çox şikayət olunan banklar arasında ilk onluqda qərarlaşıb.
Maraqlıdır, müştərilər bu banklardan niyə şikayətlənir? Ümumiyyətlə, müştərilərin ən çox narazı olduğu bankların aqibəti necə olacaq?
“Vətəndaşların banklardan narazı qalması onların fəaliyyətinə heç bir təsir etməyəcək, çünki…”
Bank sahəsi üzrə ekspert Əkrəm Həsənov “Bakı-Xəbər”ə açıqlamasında qeyd etdi ki, şikayət olunan banklar daha çox pərakəndə bankçılıqla məşğul olanlardır: “Vətəndaşların şikayətləri əksər hallarda kreditlə bağlı olur. Kredit borcunu düz hesablamayıb və daha çox pul tutulub, yaxud əvvəlcədən bankdan düzgün məlumat verilməyibmiş kimi şikayətlər edilir. Bəzən isə vətəndaşlar tərəfindən haqsız şikayətlərə də rast gəlinir. Məsələn, bank mənə güzəşt etmədi və s. Halbuki, qanunla bank güzəşt etməyə də bilər. Amma əksər hallarda vətəndaşların şikayətləri haqlı olur. Ümumilikdə, pul köçürmələri, hesabdan pulun itməsi, pulun müvafiq ünvana çatmaması, əmanət və faizlərlə bağlı şikayətlər edilir. Vətəndaş şikayətində haqlıdırsa məhkəməyə müraciət edə bilər. Məhkəmə də onun iddiasını təmin edər”.
Ekspert onu da əlavə etdi ki, ən çox şikayət olunan bankların hazırda bağlanma təhlükəsi yoxdur. Vətəndaşların banklardan narazı qalması onların fəaliyyətinə heç bir təsir etməyəcək: “Çünki bu bankların reytinq siyahısı ilə tanış olmuşam. Reytinqlər dəyişkən olur və heç bir hüquqi əsası yoxdur. Onu da deyim ki, narazılıqlar olduğu zaman belə reytinqin olması normaldır”.
Ə.Həsənov hesab edir ki, növbəti illərdə müştəri narazılığının aradan qaldırılması üçün adıçəkilən bank öz üzərində çalışacaq.
Günel CƏLİLOVA
