Ərdoğan Azərbaycanın Misirlə problemindən danışdı
Məhəmməd Əsədullazadə: “Bu, Qahirənin yanlış siyasətindən irəli gəlir”
Prezident İlham Əliyev və həmkarı Ərdoğanın geniş tərkibdə görüşündə Ərdoğan bir məqama diqqəti yönəltdi. Ərdoğanın açıqlamasından belə məlum oldu ki, Misir Azərbaycanın D-8 üzv olmasında tərəddüd edir: “Azərbaycanın D-8-ə üzvlük müraciətini ən güclü şəkildə dəstəkləyirik. Bəzi tərəddüdləri olan Misir başda olmaqla, D-8 üzvləri arasında bu istiqamətdə təşəbbüslər irəli sürdüm və irəli sürməkdə də davam edəcəyik”.
Qeyd edək ki, D-8 İqtisadi Əməkdaşlıq Təşkilatı və ya qısaca D-8 səkkiz müsəlman ölkəsini birləşdirir. D-8-in təməli Türkiyənin o dövrdəki baş naziri Nəcməddin Ərbakanın təşəbbüsü ilə 1996-cı il oktyabrın 22-də İstanbulda Banqladeş, İndoneziya, İran, Malayziya, Misir, Nigeriya və Pakistanın əməkdaşlığı ilə təşkil edilən İnkişaf Əməkdaşlıq Konfransında atılıb. 1997-ci il iyunun 15-də İstanbulda 8 ölkənin dövlət və hökumət başçılarının sammitində təşkilat rəsmən elan olunub. Azərbaycan bir il əvvəl D-8-ə üzv olmaq üçün müraciət edib.
Maraqlıdır, Misir Azərbaycanın D-8-ə üzv olmasına niyə ehtiyatlı yanaşır?
“Bəlkə də Ermənistanla Misir arasında olan yaxın əlaqələr buna mane olur”
Sözügedən məsələyə aydınlıq gətirən politoloq Məhəmməd Əsədullazadə “Bakı-Xəbər”ə açıqlamasında bunu bir sıra amillərlə əlaqələndirdi: “Misirin Azərbaycanı D-8-ə qəbul etməməsi Qahirənin yanlış siyasətindən irəli gəlir. Baxmayaraq ki, Bakı ilə Qahirə arasında siyasi əlaqələr yüksək səviyyədədir. Hesab edirəm ki, Misirin hazırkı Əbdül Fəttah əs-Sisi hökuməti Azərbaycanla iş birliyi həyata keçirməlidir, diplomatik danışıqlar aparmalıdır. Nəzərə almaq lazımdır ki, Misir prezidenti Əbdül Fəttah əs-Sisi 2022-ci ildə Azərbaycanda səfərdə olub. Onlar yaxşı bilirlər ki, Azərbaycan İslam Əməkdaşlıq Təşkilatında fəal təmsil olunur. Azərbaycan 4 il Qoşulmama Hərəkatına rəhbərlik edib. Misirin Azərbaycanla əlaqələrə önəm verməsi bu ölkənin Orta Asiya ölkələri ilə əlaqələr qurmasına da müsbət təsir edəcək. Ola bilsin ki, hələ də Azərbaycan-Misir əlaqələri arzuolunan səviyyədə inkişaf etməyib. Görünür bu səbəbdən Misir rəhbərliyi Azərbaycanın D-8-ə qoşulmasına tərəddüdlə yanaşır. Bəlkə də Ermənistanla Misir arasında olan yaxın əlaqələr buna mane olur. Ancaq buna da elə bir əsas yoxdur. Ona görə ki, Qarabağ məsələsi artıq həll olunub. Görünür Türkiyə ilə Misir arasında bir neçə il mövcud olan soyuq münasibətlər də buna mənfi təsir edir. Qahirə, ola bilsin, iki ölkə arasında olan yaxın əlaqələrdən o qədər də mənmun deyil. Ancaq hesab edirəm ki, əvvəl-axır bu məsələ öz həllini tapacaq”.
Vidadi ORDAHALLI
