Mədət Məmmədov - 65
Zəmanədən söz götürə bilməyən adamların çoxu sözdən söz, ocaqdan köz götürüb ürəyimizi, içimizi isidən, düşüncələrimizi təzələyən yazılar yazdılar, fikirlər yaratdılar.
Onlar demokratik mətbuatın əsl simasını, söz adlı silahın vurmalı olduğu hədəfləri göstərdilər. Özlərindən əvvəlkilərin açdıqları çığırlara öz izlərini saldılar, ənənələri davam etdirdilər, hətta bu ənənələrə öz çalarlarını da qatdılar.
Ömrünü mətbuata həsr edən, sözə könül verən, yazıb-yaratmağı özünə həyat tərzi seçən, sözdən-sözə könül verən usta qələm sahiblərindən biri haqda danışmaq istəyirik. Şair-publisist, jurnalist, mətbuat təşkilatçısı Mədət Məmmədov (Əyyuboğlu) hər zaman barəsində danışılacaq, danışılmalı olan usta qələm sahibidir.
Fevralın 22-də 65 yaşını qeyd edəcək Mədət Məmmədovun imzasınına (Əyyuboğlu) bir sıra qəzet və jurnallarda rast gəlmişik. Gənc yaşlarında mətbuat sahəsində məsul vəzifələrdə çalışsa da, hər zaman jurnalist, publisist, vətəndaş kimi öz mövqeyini ortaya qoyub, əsl vəzifəsini, missiyasını unutmayıb.
Mədət Əyyub oğlu Məmmədov Azərbaycan Dövlət Universitetinin (indiki BDU) jurnalistika fakültəsinin tanınmış məzunlarındadır.
O, 1985-1989-cu illərdə Azərbaycan KP MK-nın “Kommunist” (indiki “Azərbaycan”) nəşriyyatında mətbuatın yayılması üzrə Baş müfəttiş, 1989-1990-cı illərdə Azərbaycan KP MK-nın “Kommunist” (sonralar “Dirçəliş”) ictimai-siyasi jurnalında məsul katibin müavini, 1990-1991-ci illərdə Azərbaycan KP MK-nın “Kənd həyatı” jurnalında Baş redaktorun müavini, 1992-1994-cü illərdə müstəqil “Doğru yol” qəzetinin Baş redaktoru, Mətbuat və İnformasiya Nazirliyində 1994-1996-cı illərdə şöbə rəisi, 1996-2001-ci illərdə KİV Baş İdarəsinin rəisi vəzifələrində, Azərbaycan Respublikasının Ombudsman (İnsan Hüquqları üzrə Müvəkkil) Aparatında İdarə rəisinin müavini və Azərbaycan Dövlət İnformasiya Agentliyində çalışıb. 2003-cü ildən “Jurnalistlər Həmrəyliyi Komitəsi” İctimai Birliyinə rəhbərlik edən Mədət Məmmədov ölkəmizdə jurnalist peşəkarlığının artırılmasında, dördüncü hakimiyyətin cəmiyyətdə öz funksiyasını yüksək səviyyədə gerçəkləşdirməsində müstəsna xidmətlər göstərib. Mədət Məmmədov nüfuzlu “Qızıl Qələm” və “Həsən bəy Zərdabi” media mükafatlarına layiq görülüb”.
Dövrünün kifayət qədər nüfuzlu mükafatlarına layiq görülən M.Məmmədov (Əyyuboğlu) bunları öz peşəkarlığı, yazısı, jurnalist mövqeyinə görə alıb.
M. Məmmədov haqqında “Şair-publisist Mədət Əyyuboğlu” kitabının müəllifi, “Kredo” qəzetinin baş redaktoru Əlirza Xələfli belə deyir: “…Doğrusu, mən həmişə - ən azı 50 yaşıma qədər ağsaqqallığı elə yaş ölçüsündə görmüşəm. Elə bilmişəm ki, əsl ağsaqqal gərək 60 yaşdan sonra, 70-dən, 80-dən sonra üzə çıxsın. Yoxsa yaşın dayaq gücü yoxdursa, o heç ağsaqqal ola bilməz. Ən azı, ağıllı sözü, dəyərli sözü eşitdiyim cavanların mövqeyini mənəvi sağlamlığı ilə bağlamışam. Həmin günlərdə Mədət Məmmədovla qarşılaşanda ilk dəfə bildim ki, ağsaqqallıq o qədər də yaşla bağlı deyil. Elə kim harada mövqeyindən, missiyasından asılı olmayaraq, dəyərli məsləhət verirsə, o, həqiqətən ağsaqqaldır...”
Ə.Xələfli yazır ki, “Təbii hisslərin poeziyası”, “Poeziyanın döyüşən yolu”, “Şairin poetik nəfəsi”, “İnsan problemi: Arzular, istəklər”, “Gəldim ki, söz gətirəm”, “Şəxsiyyətin təsdiqi” – bu adlar altında şair Mədət Əyyuboğlunun poetik yaradıcılığının tədqiqinə həsr olmuş yazıları çap etdirib.
M.Məmmədovun müəllifi olduğu “Dövlət və dördüncü hakimiyyət” kitabının mahiyyəti qayəsi barədə yazıdığı məqalədə akademik Nizami Cəfərov yazır: “Mədət Məmmədov Azərbaycanda demokratik media quruculuğunun ilk illərinin canlı şahidi və fəal iştirakçısı kimi KİV-in sonrakı daha yüksək inkişafı mərhələsi ilə bağlı ulu öndərin böyük yolunun davamından da eyni həvəs və bələdliklə söhbət açmışdır. Bununla müəllif həmin alternativsiz siyasi xəttin modern davamçısı İlham Əliyevin adı ilə bağlı, milli jurnalistikamızın cəmiyyətin hərtərəfli tərəqqisi dövrünün tələblərinə uyğun inkişafına yönəlik məqsədyönlü tədbirlər silsiləsində hər bir addımın rolunu və önəmini qədərincə incələməyə nail olmuşdur”.
M.Məmədov barəsində yazanların hər biri onu demokratik media quruculuğunun aktiv iştirakçılarından biri kimi qeyd etməklə, onun mənalı ömür yolu və yaradıcılığı, mövqeyi barədə bizlərə dəqiq məlumatlar verir.
Bizim M.Məmmədov kimi usta qələm adamlarının yaradıcılığı, vətəndaş mövqeyi, öz peşəsinə tükənməz sədaqəti bir örnəkdir. Biz belə örnəklərdən güc alıb çağdaş jurnalistikanı daha da inkişaf etdirməliyik.
İradə SARIYEVA
P.S. ”Bakı-Xəbər” media qrupunun rəhbəri Aydın Quliyev və rəhbərlik etdiyi kollektv tanınmış qələm adamı Mədət Məmmədovu 65 illik yubileyi münasibətilə təbrik edir, ona can sağlığı, uzun ömür, yaradıcılıq uğurları arzulayır.
