Yeni Vergi Məcəlləsi hazırlanır - kimlərə faydalı olacaq...
Eldəniz Əmirov: “Yeni Vergilər Məcəlləsində kiçik və orta sahibkarlığın dəstəklənməsi prinsipləri üstünlük təşkil etməlidir”
“Bu ildən Azərbaycanda yeni Vergi Məcəlləsinin hazırlanması istiqamətində işlərə başlanılıb”. Bunu İqtisadiyyat Nazirliyi yanında Dövlət Vergi Xidmətinin rəis müavini Samirə Musayeva bildirib:
“Bu məqsədlə biznes subyektləri ilə birgə baxış keçiririk. Yeni Məcəllə təkcə dilin sadələşdirilməsi ilə bağlı deyil. Biz həm də qanunvericiliyi bir daha təhlil edəcəyik. Hazırda Məcəllənin “Yol xəritəsi”ni hazırlayırıq. Biznes subyektləri ilə işçi qaydada görüşlər aparırıq. Beynəlxalq təcrübəni özümüz də araşdırırıq, məsləhətçi şirkətlər də cəlb edirik. Yeni Məcəllənin nə vaxt hazır olacağını indi demək tezdir. Amma prosesə başlamışıq. Onun başa çatdırılmasını çox uzun illərə buraxmaq istəmirik. Sadəcə Məcəllənin “Yol xəritəsi”nin hazırlanmasını yekunlaşdırmamış onun nə vaxt hazır olacağını demək qeyri-ciddi olar".
Qeyd edək ki, son vaxtlar ölkədə Vergi Məcəlləsinə edilən dəyişiklik heç də birmənalı qarşılanmadı. Hətta Vergi Məcəlləsi ilə bağlı vətəndaşların bir çox problemlərlə üzləşdiyi deyilir. Bu səbəbdən də mütəxəssislər bu sahədə dəyişiklik edilməsini vacib sayır.
Maraqlıdır, yeni hazırlanacaq Vergi Məcəlləsi vətəndaşlar üçün hansı imkanlar yaradacaq?
“Məcəlləyə müdaxilələrin edilməsi, dəyişikliklərə məruz qoyulması xarici investorlara Azərbaycana gəlməyi maraqsız edir”
İqtisadçı ekspert Eldəniz Əmirov hesab edir ki, yeni Vergi Məcəlləsi geniş miqyasda və uzunmüddətli müzakirələr nəticəsində hazırlanmalıdır: “Məcələyə təklif olunan hər bir dəyişikliyə detallı şəkildə yanaşmaq lazımdır. Kiçik və orta sahibkarlığın dəstəklənməsi prinsipləri üstünlük təşkil etməlidir. “5 faiz” və “20 faiz” arasında olan vergi məsələsi kimi sahibkarlar üçün arzuolunmaz vəziyyətə deyil, ciddi güzəşt mexanizmlərinə ehtiyac var”.
E.Əmirovun sözlərinə görə, Vergi Məcəlləsi ölkəyə investorları cəlb edən, sərmayə mühitini yaxşılaşdıran əsas sənədlərdən və istiqamətlərdən biridir. Məcəlləyə müdaxilələrin edilməsi, dəyişikliklərə məruz qoyulması xarici investorlara Azərbaycana gəlməyi maraqsız edir: “Vergi Məcəlləsi dayanıqlı olmalıdır. Addımbaşı bu mühüm dövlət sənədinə, qanunvericiliyə dəyişikliyin olunması investorlara strateji planlar qurmağa imkan vermir. Məhz bu səbəbdən də investorların ölkəyə marağı azalır”.
Günel CƏLİLOVA
