ABŞ-Azərbaycan münasibətlərində tam fərqli dövr başlayacaq - Ermənistansız...
Elşən Manafov: “Prezident Əliyevin yanaşması tamamilə məntiqlidir”
Fevralın 17-də Münhendə Prezident İlham Əliyev Amerika Birləşmiş Ştatlarının dövlət katibi Entoni Blinkenlə görüşüb. Görüş Blinkenin müraciətinə əsasən olub. Görüşdə tərəflər bir sıra məsələləri müzakirə ediblər.
Prezident Əliyev Münhendə Blinkenlə görüşdə bir məqamı xüsusi qeyd edib ki, ABŞ-la əlaqələr Ermənistan-Azərbaycan münasibətləri prosesindən kənarda inkişaf etdirilməlidir. Artıq regionda de-fakto sülhün olduğunu bildirən Prezident İlham Əliyev vurğulayıb: “Azərbaycan-ABŞ ikitərəfli əlaqələri Ermənistanla Azərbaycan arasında münasibətlərin normallaşması prosesindən kənar şəkildə özlüyündə inkişaf etdirilməlidir”.
“ABŞ-a rəsmi Bakının bu sayaq münasibəti onun və Aİ-nin Azərbaycana Ermənistanla müqayisədə fərqli mövqe sərgiləməsindən irəli gəlir”
Sözügedən məsələ ilə bağlı fikirlərini “Bakı-Xəbər”lə bölüşən politoloq Elşən Manafov hesab edir ki, Prezident Əliyevin yanaşması tamamilə məntiqlidir: “Prezident İlham Əliyevin Munhen Təhlukəsizlik Konfransında ABŞ-la münasibətlərimizin perspektiv istiqamətləri ilə bağlı fikirlərində öz əksini tapmış bu bəyənat regionun təhlükəsizlik problemlərinin həllinə dair rəsmi Bakının 3+2 formatına önəm verməsinin növbəti dəfə bəlli dairələrə ismarıcıdır. Prezident Əliyev bu açıqlaması ilə münaqişə tərəfləri arasında mövcud problemlərin vasitəçilərsiz həllinə rəsmi Bakının üstünlük verməsilə yanaşı, regionun təhlükəsizlik problemlərinin həllinə regiondan kənar qüvvələrin müdaxiləsinin məqsədəmüvafiq olmaması fikrini qabardır. Birləşmiş Ştatlara rəsmi Bakının bu sayaq münasibəti onun və Avropa İttifaqının Azərbaycana Ermənistanla müqayisədə fərqli mövqe sərgiləməsindən irəli gəlir. Munhendə Təhlükəsizlik Konfransında ABŞ Dövlət katibi Blinkenin Ermənistanın baş naziri Paşinyanla göruşundə rəsmi Vaşinqtonun Ermənistanda demokratiyaya dəstək verməsi ilə bağlı birmənalı olmayan açıqlaması, əslində dolayısı yolla Azərbaycanı qeyri-demokratik ölkələr sırasına aid etməklə, onun daxili işlərinə müdaxilədən başqa bir şey deyil. ABŞ-ın Bakıdakı səfirliyinin respublikada keçirilmiş növbədənkənar prezident seçkiləri ilə bağlı açıqlaması da seçkilərdə rəqabət mühitinin olmamasi ilə bagli məsələlərin qabardılması ilə tərəflər arasındakı münasibətlərin konstruktiv zəmində inkişafına heç də töhfə olmayib. Bununla belə, rəsmi Baki ABŞ-la ikitərəfli münasibətləri bundan sonra da qarşılıqlı maraqlar müstəvisi üzərində inkişaf etdirməyə həmişə hazır olacaq. O cümlədən, enerji təhlükəsizliyi sahəsində əməkdaşlıq hər iki tərəf üçün bundan sonra da prioritet əhəmiyyət kəsb edəcək. Regionda dəhlizlər və kommunikasiyalar ilə bağlı məsələlərdə fərqli mövqe, baxışlar olsa da, rəsmi Bakı bir qayda olaraq problemlərin konstruktiv zəmində həllinə həmişə prioritet amil kimi yanaşacaq. ABŞ-ın bölgə ilə bağlı geosiyasi maraqlarına isə rəsmi Bakı özünün regional təhlükəsizlik maraqları prizmasından yanaşıb. Bundan sonra da regionun geosiyasi konfiqurasiyasının dəyişdirilməsi proseslərinə, İrəvandan fərqli olaraq, vasitəçi tərəf kimi deyil, müstəqil və suveren dövlət kimi yanaşacaq”.
Vidadi ORDAHALLI
