Əliyevin Münhendəki bütün görüşləri qarşı tərəflərin müraciəti ilə baş tutdu...
Ramil Hüseynov: “Bu, Azərbaycanın artan gücü və nüfuzu ilə əlaqədardır”
Məlum olduğu kimi, Prezident İlham Əliyev 60-cı Münhen Təhlükəsizlik Konfransında iştirak edib. Tədbir çərçivəsində ölkə başçısı bir sıra görüşlər keçirib. Diqqəti çəkən məqam odur ki, səfərin ilk günündə reallaşan 10-a yaxın görüşün hər biri Bakının yox, məhz qarşı tərəfin müraciətinə əsasən reallaşıb.
O cümlədən, sonrakı günlərdəki digər görüşlər də. Yəni əvvəlki Münhen görüşlərində iştirakından fərqli olaraq, budəfəki iştirakın önəmli xüsusiyyətlərindən biri bütün görüşlərin qarşı tərəfin müraciətləri əsasında baş tutmasıdır.
Bunu şərtləndirən bir sıra faktorlar var. Başlıca faktor ondan ibarətdir ki, Azərbaycan güc yolu ilə öz ərazi bütövlüyünü təmin etdi. Bu da beynəlxalq miqyasda həm ölkəmizin nüfuzunu artırdı, həm də mövqelərini gücləndirdi. O cümlədən, sonuncu prezident seçkisində İlham Əliyevin inamlı qələbəsi, Azərbaycanın qlobal siyasət aparması bunu şərtləndirdi. Daha bir səbəb Azərbaycanın super güclərdən sonra dünyanın orta güc dövlətlərindən birinə çevrilməsilə bağlıdır.
Maraqlıdır, bəs ekspertlər bunu necə dəyərləndirir? Münhendə bütün görüşlərin qarşı tərəflərin müraciəti əsasında keçirilməsi nə deməkdir?
“O üzdən, Münhendə ölkə başçısı ilə görüşlərin keçirilməsinə böyük maraq var idi”
Məsələ ilə bağlı “Bakı-Xəbər”ə açıqlama verən “Yeni Xətt” Müstəqil Siyasi Tədqiqatlar Mərkəzinin rəhbəri Ramil Hüseynov bunu Azərbaycanın artan gücü və nüfuzu ilə əlaqələndirdi: “Üç il əvvəl heç kəsin ağlına belə gəlnəzdi ki, qısa müddət ərzində Azərbaycan ərazilərinin böyük hissəsini azad edəcək. Rusiya sülhməramlıları Qarabağa yerləşəndən sonra kimsə təsəvvür etmirdi ki, biz yaxın perspektivdə Xankəndidə, Ağdərədə, Əsgəranda suverenliyimizi təmin edəcəyik və birdəfəlik olaraq Qarabağ məsələsini bağlayacağıq. Xüsusən də bir sıra dünya dövlətləri bunu gözləmirdilər. Prezident İlham Əliyevin apardığı uğurlu və qətiyyətli siyasət, necə deyərlər, mümkünsüzü mümkünə çevirdi. Bəzi postsovet ölkələri SSRİ süqut edəndən sonra hələ də separatizmlə boğuşduğu bir dövrdə, Azərbaycan erməni separatizminin kökünü kəsdi. Bütün işğal olunmuş ərazilərdə suverenliyini bərqərar etdi. Bunun mükafatı olaraq 7 fevral prezident seçkilərində seçicilərin 92 faizi yekdilliklə İlham Əliyevə səs verdi. Qlobal güc mərkəzlərinin bu gün diqqəti daha çox ənənəvi enerji siyasətinə fokuslaması, Xəzər dənizinin karbohidrogen resurslarının dünya bazarına çıxarılmasını ehtiva edən layihələrdə birgə tərəfdaşlığın perspektivləri, Mərkəzi Asiyadan yüklərin Transxəzər vasitəsi ilə Avropaya çatdırılması Azərbaycanın önəmini daha da artırır. Bu gün dünyada yüklərin daşınmasında yaşanan təbəddülatlar Azərbaycanın necə vacib tranzit ölkə olduğu reallığını ortaya qoyur. Bu və digər səbəblər Prezident Əliyevin dünyadakı nüfuzunu daha da artırıb. O üzdən, Münhendə ölkə başçısı ilə görüşlərin keçirilməsinə böyük maraq var idi. Həm dövlət rəsmiləri, həm də şirkət rəhbərləri öz təşəbbüsləri ilə Prezident Əliyevlə görüşürdülər”.
Vidadi ORDAHALLI
