Makron Bakı-İrəvan məsələsində tam iqnor edildi...
Amid Əliyev: “Bütün platformalar üzərindən Azərbaycana qarşı hücuma keçən Fransa heç bir halda Azərbaycan-Ermənistan prosesinə qoşula və müdaxilə edə bilməz”
Azərbaycan Prezidenti İlham Əliyevlə Ermənistanın Baş naziri Nikol Paşinyan arasında Münhendə baş tutan ikitərəfli görüşlərdən biri Almaniya kansleri Olaf Şoltsun təşkilatçılığı ilə baş tutub.
Fransanın vasitəçilik səyinin tam iqnor olunması Azərbaycan diplomatiyasının növbəti uğuru sayıla bilərmi? Çünki Makron artıq heç həndəvərə də buraxılmır.
Politoloq Amid Əliyev “Bakı-Xəbər”ə açıqlamasında bildirdi ki, Münhen Təhlükəsizlik Konfransı çərçivəsində Azərbaycan-Ermənistan dövlət başçılarının görüşünün keçirilməsi müsbət hal kimi qiymətləndirilə bilər: “Diqqəti çəkən əsas məqam ondan ibarətdir ki, görüş Almaniyanın təşkilatçılığı ilə baş tutub. Fransa hər hansı bir formada bu formatda iştirak edə bilmir və iştirakına da yol verilmir. Baxmayaraq ki, Almaniya bəzi məslələrdə Fransa ilə eyni istiqamətdə addımlayır, lakin təşkilatçılığı qəbul olunub. Görüş başlananadan sonra isə Almaniya kansleri Olaf Şolts tərəfləri tək buraxaraq görüş yerini tək edib ki, bu da Almaniyanın da vasitıçi qismində iştirak etmədiyinə bir işarədir. Görüş nəticəsində hər iki tərəfdən müsbət fikirlər səslənidirilib, yaxın zamanda hər iki dövlətin XİN-nın görüşməsi qərara alınıb və sülh gündəliyinin davam etdirilməsi üçün növbəti təmasların olması haqqında razılıq əldə edilib.
Bütün qeyd olunanlar fonunda Fransanın proseslərdən kənarda qalması faktı da nəzərdən qaçmamalıdır. Prezident hər zaman bildirib ki, Azərbaycanla Ermənistan arasında hansısa vasitəçinin olmasın artıq ehtiyac yoxdur. Hər iki tərəf birbaşa təmaslar vasitəsilə məsələləri daha asan və maneəsiz həll edə bilirlər. Arzu olunmayan vasitəçilər isə iki ölkə arasında sülhə yox öz ambisiyalarının bərqərara olmasına çalışırlar. Bunun bariz nümunəsi məhz Fransadır. Ötən müddət ərzində Fransa apardığı siyasət nəticəsində vasitəçi kimi yox, yalnız prosesləri uzaqdan müşahidə etmək statusuna yiyələnə bildi. İndi bütün platformalar üzərindən Azərbaycana qarşı hücuma keçən Fransa heç bir halda Azərbaycan-Ermənistan prosesinə qoşula və müdaxilə edə bilmir. Bu, sözsüz, Azərbaycan diplomatiyasının uğurudur ki, Fransa bütünlüklə bu proseslərdən kənarda qalıb. Fransa bu məsələlərdə arzu olunmayan tərəfdir. Hətta Ermənistan belə bunu, acı da olsa, reallıq kimi qəbul edir və Azərbaycanla münasibətlərdə Fransanın iştirak etməyəcəyi faktını qəbullanır. Azərbaycan hər zaman ədalətli, beynəlxalq hüquqa əsaslanan münasibəti üstün tutub. Birtərəf və qərəzli mövqe Azərbaycan üçün qəbuledilməzdir. Məhz bu səbəbdən də nəinki MTK, eləcə də digər platformalarda da Fransanın tərəf kimi iştirakı bundan sonra da limitli olacaq. Ən azından, Fransa Azərbaycana qarşı olan münasibətini köklü olaraq müsbət istiqamətdə dəyişənə qədər”.
Məhəmmədəli QƏRİBLİ
