Azərbaycana xarici sərmayə cəlbi yenidən aktuallaşdı - çıxış yolları da deyildi...
![Image](/uploads/posts/2024-02/iqtisadi-azer.webp)
Fuad İbrahimov: “Qeyri-neft sektorunun inkişafında xarici sərmayənin iştirakçılıq səviyyəsi çox aşağıdır”
“Biz hər il 10 minlərlə yeni iş yeri yaratmalıyıq. Bunun üçün, əlbəttə ki, daxili resurslar kifayət deyil”. Bunu Prezident İlham Əliyev andiçmə mərasimində etdiyi çıxışında deyib.
Ölkə başçısının fikrincə, bununla bağlı xarici sərmayənin cəlbinə ehtiyac var: “Müstəqillik dövründə əhalimiz 3 milyon artıb və artan əhalisi olan ölkələrdə işsizlik bir qayda olaraq ciddi problemdir, o cümlədən bizim üçün. Biz hər il 10 minlərlə yeni iş yeri yaratmalıyıq. Bunun üçün, əlbəttə ki, daxili resurslar kifayət deyil. Xarici sərmayəyə ehtiyac var və iqtisadi islahatlar, o cümlədən biznes mühitinin yaxşılaşdırılması, rəqabətlə bağlı, inhisarçılığa qarşı olan tədbirlər bu biznes mühitini yaxşılaşdıracaq. Əlbəttə ki, Qarabağ və Şərqi Zəngəzur bizim iqtisadi inkişafımızın yeni bir dayaq nöqtəsi olacaqdır. O bölgələrdə həm kənd təsərrüfatı, həm bərpaolunan enerji ilə bağlı layihələr, turizm layihələri qeyri-neft sektoruna böyük dəstək verəcəkdir”.
“Sahibkarlar yeni açılan müəssisələri bağlayırsa, yerli icra qurumları bu barədə hesabat verməlidir”
Məsələ ilə bağlı “Bakı-Xəbər”ə açıqlama verən iqtisadçı-ekspert Fuad İbrahimov hesab edir ki, xarici sərmayənin cəlbi vacibdir: “Məşğulluq səviyyəsinin yüksəldilməsi, işsizliyin minimuma endirilməsi istiqamətində ciddi işlər görülməlidir. Cənab Prezidentin verdiyi göstərişləri, sərəncamları yerli idarəedici qurumlar arzu olunan səviyyədə həyata keçirmirlər. Əgər yerli qurumlara rəhbərlik edənlər regionlarda bu işi təşkil edə bilmirlərsə, o zaman kənara çəkilməlidilər. Hələ də Azərbaycanda ciddi inhisarçılıq problemi var. Düzdür, bu bütün dünyada mövcuddur. Ancaq Azərbaycan kimi ərazisi böyük olmayan bir ölkədə bunu aradan qaldırmaq nə böyük problemdir ki? Biz nə vaxta qədər vaxt itirib geriləməliyik? Çox təəssüflər olsun ki, bu baxımdan zaman düzgün dəyərləndirilmir. Azərbaycanda qeyri-neft sektorunun inkişafında xarici sərmayənin iştirakçılıq səviyyəsi çox aşağıdır. Ölkədə real sektorun inkişaf etdirilməsinə ciddi ehtiyac var. Cənab Prezidentin iştirakı ilə çoxsaylı müəssisələrinin açılışı olub. Müstəqil komissiya yaradıb həmin müəssisələrin necə fəaliyyət göstərməsini ortaya çıxarmaq lazımdır. Məlum olacaq ki, bəzi dövlət qurumları biznesin inkişafına mane olurlar. Hesab edirəm ki, düsturu dəyişmək lazımdır. Hərtərəfli biznes mühiti olmalıdır ki, həm yerli sahibkarlar, həm də xarici sərmayədarlar real sektorun inkişafına vəsait qoysunlar. Bu cazibədarlıq olmadan, vergi və digər güzəştlər tətbiq edilmədən sərmayə qoyuluşunu təmin etmək mümkün olmayacaq. Ona görə də yerli strukturlar bu yöndə çalışmalıdır. Sahibkarlar yeni açılan müəssisələri bağlayırsa, yerli icra qurumları bu barədə hesabat verməlidir. Araşdırılmalıdır ki, nəyə görə bu baş verir. Biz bir sıra məhsulları xaricdən idxal edirik. Halbuki, onları ölkə daxilində istehsal etmək, aqrar məhsulları emal edib son məhsula çevirmək mümkündür. Dövlət orqanları xarici sahibkarlara, o cümlədən yerli biznesmenlərə dəstək olmalıdılar. Sənədləşmə işini asanlaşdırmalıdılar. Bir tərəfdən inhisarçılıq, o biri tərəfdən icra qurumlarının müdaxilələri sərmayə qoyuluşunu, yerli istehsalın genişlənməsini tormozlayır”.
Vidadi ORDAHALLI