Necə yəni "Azərbaycanın ABŞ-ın hərbi yardımına ehtiyacı yoxdur?"...
Ramil Məmmədli: “Yaxşı olardı ki, səfir belə bir düzəlişin başqa ölkənin ərazilərini işğal edən Ermənistana niyə tətbiq edilmədiyinə aydınlıq gətirəydi”
ABŞ-ın Azərbaycandakı səfiri Mark Libbi mətbuat konfransında deyib ki, ABŞ-ın Azadlığa Dəstək Aktına 907-ci Düzəlişi 30 il əvvəl qəbul edilmiş qanunun bir hissəsidir və Bakı ilə Vaşinqton arasında münasibətlərdə “kiçik faktor”dur:
“30 il əvvəl mən bu işdə deyildim. Bu qanunvericiliyi düzəldə bilmərəm. Sizə deyə bilərəm ki, hər il biz müəyyən növ təhlükəsizlik yardımı göstərmək üçün 907-ci Düzəlişdən yayınmağın lazım olub-olmadığı barədə düşünürük, amma bu hələ nəzərdən keçirilir.
Onu da qeyd etməliyəm ki, 907 saylı Düzəliş Azərbaycanla əməkdaşlıq etmək üçün görüləcək yeganə iş deyil. Mən hələ də bunun nə üçün inanılmaz dərəcədə vacib olduğunu tam başa düşə bilmirəm. Bu, münasibətlərimizin geniş spektri baxımından və Azərbaycanla qarşılıqlı fəaliyyətimiz baxımından. bütün sahələrdə, mədəni, iqtisadi və hətta müəyyən dərəcədə təhlükəsizlik sahəsində əməkdaşlıq baxımından kiçik amildir. Bu, bəzi növ hərbi yardımları məhdudlaşdırır. Azərbaycanın ABŞ-ın hərbi yardımına ehtiyacı olub-olmadığını bilmirəm, çox güman ki, yoxdur”.
Səfir qeyd edib ki, bu, iki ölkənin prioritetləri kontekstində diqqətlə nəzərdən keçirilməli olan məsələdir:
"Bu il isə bu məsələ ilə bağlı heç bir qərar verilməyib. Amma Azərbaycanla bağlı edə biləcəyimiz başqa sahələr də var. Biz Azərbaycanın ərazi bütövlüyünü dəstəkləyirik. Biz Ermənistanın da ərazi bütövlüyünü dəstəkləyirik. Ərazi bütövlüyü bizim əsas prinsipimiz olub”.
Səfir ABŞ-ın tətbiq etdiyi 907-ci Düzəlişi qəribə şəkildə izah edərək deyir ki, Azərbaycanın ABŞ-ın hərbi yardımına ehtiyacı yoxdur. Bu nə dərəcədə ciddi əsaslandırma sayıla bilər?
Hərbi-siyasi şərhçi Ramil Məmmədli “Bakı-Xəbər”ə açıqlamasında bildirdi ki,
hər il Azərbaycana qarşı 907-ci Düzəlişin hüquqi qüvvəsini bir illik bloklanır: “Beləlilklə, ABŞ-ın Azərbaycana yönəlik hərbi dəstəyi və silah satışı qarşısında daha bir il ərzində hər hansı əngəl olmayacaq. 2002-ci ildən bütün ABŞ prezidentləri 907-ci Düzəlişə münasibətdə eyni ənənəni təkrarlayırlar.
Hansı məqsədlə ABŞ Konqresi 907-ci Düzəlişi birdəfəlik ləğv etmir?
Hər il 907-ci Düzəliş bir il müddətinə dayandırılır. Olmaz ki, bu düzəliş birdəfəlik ləğv olunsun? Təbiidir ki, bunu Azərbaycana təzyiq etmək üçün saxlayıblar. Əgər belə deyilsə, onda Kongres bu düzəlişi ləğv edib, Azərbaycanla normal münasibət qursun, daha ikili standart siyasəti aparmasınlar. Erməni lobbisinin fitvası ilə Azərbaycan əleyhinə qəbul edilən 907-ci Düzəlişi Azərbaycan Ordusunun gücünə görə tətbiq etməyiblər. Vaşinqton bir çox hallarda Azərbaycanı strateji tərəfdaş adlandırır, Əfqanıstan və İraq əməliyyatlarında dəstəyə görə minnətdarlıq edirdi, ancaq düzəliş sadəcə dondurulub, onun ləğvi gündəlikdə deyil. 907-ci Düzəliş ilk dəfə 1992-ci ildə guya "Azərbaycan tərəfindən Qarabağın "işğalı" və Ermənistana qarşı blokadanı dayandırmaq" məqsədilə senator Con Makkeyn tərəfindən, daha sonra isə senator Con Kerrinin və erməni lobbi təşkilatlarının dəstəyi ilə konqressmen Veyn Ovens tərəfindən təklif edilib. Senator Riçard Luqarın düzəlişin qəbul edilməsinin əleyhinə çıxış etməsinə baxmayaraq, 907-ci Düzəliş 1992-ci ildə ABŞ Konqresi tərəfindən Azadlığa Dəstək haqqında Akta əlavə edilib. ABŞ Cənubi Qafqazın açar dövləti olan Azərbaycandan istifadə etməklə Rusiyaya, İrana qarşı özünün məkrli planlarını həyata keçirmək niyyətindədir ki, Azərbaycanı platsdarm kimi istifadə etsin. Ermənistan bu gün özünün yeni faciələrinin astanasındadır. 30 il Rusiya Ermənistanı təpədən dırnağa qədər silahlandırdı. Nəticə nə oldu? İndi bir tərəfdən Fransa, bir tərəfdən ABŞ Ermənistanı silahlandırır. ABŞ-ın Azərbaycana qarşı 907-ci Düzəlişi hərəkətə gətirməsi Bayden Administrasiyanın bəhanələrindən biridir. Azərbaycan Ordusunun hərbi dəstəyə ehtiyacının olub-olmamağının bu məsələyə heç bir dəxli yoxdur. Yaxşı olardı ki, səfir belə bir düzəlişin başqa ölkənin ərazilərini işğal edən Ermənistana niyə tətbiq edilmədiyinə aydınlıq gətirəydi. Belə düzəliş onlara yox, məhz bizə tətbiq olunubsa, deməli, burada açıq qərəzdən söhbət gedir”.
Məhəmmədəli QƏRİBLİ
