"Xalq Sığorta" və "Bakı Sığorta" avtomobil sahiblərini daha çox narazı salır...
![Image](/uploads/posts/2024-02/avto-kredit.webp)
İlkin İbrahimov: “Şikayətlər daha çox avtomobillərin mülki məsuliyyətinin icbari sığortası ilə bağlı olur”
Sığorta şirkətlərinin fəaliyyətini qənaətbəxş hesab etmək olmaz. Çünki bu şirkətlərin xidmətlərindən istifadə edənlərin əksəriyyəti şikayətçidir. Sığorta halları daha çox avtomobillərlə bağlı baş verdiyi üçün şikayətçilərin də çoxu sürücülərdir.
Ən çox şikayət halları isə sığorta şirkətlərinin süründürməçiliyə, sığorta hadisəsi nəticəsində dəymiş zərərin ödənişində gecikmələrə yol verməsindən qaynaqlanır.
Bütün bunların nəticəsidir ki, əhali sığorta şirkətlərinə inanmır, etibar etmir. Mümkün qədər sığorta şirkətləri ilə əlaqədə olmaqdan imtina edir. Avtomobil sığortası məcburi olduğu üçün sürücülər sığorta şirkətlərindən yayına bilmir. Bu da yuxarıda göstərilən halların tez-tez yaşanmasına səbəb olur.
Onu da qeyd edək ki, Azərbaycan Mərkəzi Bankı ən çox şikayət edilən sığorta şirkətlərinin adını açıqlayıb. Məlumata görə, ötən ay ən çox şikayət edilən şirkətlər "Xalq Sığorta", “Atəşgah Sığorta” və "Bakı Sığorta" olub.
Maraqlıdır, sığorta şirkətləri ilə vətəndaşlar arasında ən çox mübahisələr hansı məsələlər ətrafında yaranır?
Əsasən şikayətlər hansı sahələri əhatə edir? Sığorta şirkəti ilə müştərilər arasında yaranan problemlər əsasən nədən qaynaqlanır, səbəb nə olur?
“Sığorta şirkətləri daha az sığorta ödənişləri etməyə, vətəndaşlar da daha çox sığorta ödənişi almağa çalışır”
Sığorta sahəsi üzrə ekspert İlkin İbrahimov “Bakı-Xəbər”ə şərhində bildirdi ki, şikayətlər daha çox avtomobillərin mülki məsuliyyətinin icbari sığortası ilə bağlı olur: “Bu mübahisələrə görə də Mərkəzi Bank bir neçə müsbətyönümlü addım atıb və qanunvericilikdə vətəndaşların xeyrinə dəyişikliklər edib. Dəyişikliklərdən biri də əvvəllər AMB-nin “müstəqil ekspertlərin reyestri” adlanan sistemilə bağlıdır. Bu dəyişikliklərə qədər sistem vasitəsilə sığorta şirkətləri ekspertlərdən birini seçmək üçün vətəndaşlara imkan yaradırdı. O da ekspertlərdən birini seçirdi ki, bu da ədalətli seçim adlanırdı. Ancaq Mərkəzi Bank həmin qaydaları daha da təkmilləşdirdi”.
Ekspert onu da əlavə etdi ki, sığorta şirkətləri daha az sığorta ödənişləri etməyə, vətəndaşlar da daha çox sığorta ödənişi almağa çalışır. Əsas həqiqət hər ikisinin arasında olan məbləğdir. Mübahisələr də, ən çox şikayətlər də adətən ödənişlərlə bağlı olur. Belə məsələlərlə bağlı adətən problemlər yaşanır və bu belə də davam edir".
Günel CƏLİLOVA