Baş nazir Sunakdan Azərbaycana COP29 dəstəyi - "partla, Makron"...
Akif Nəsirli: “COP 29-un daha səmərəli keçməsində, başda Böyük Britaniya, olmaqla bütün Qərbin...”
“2024-cü il Azərbaycan üçün daha çox əhəmiyyət kəsb edir, çünki siz noyabrda COP29-a ev sahibliyi etməyə hazırlaşırsınız. Enerji keçidlərini irəliyə aparmaq və qlobal emissiyaları azaltmaq baxımından bu, həyati əhəmiyyətli bir məqamdır. Məmnuniyyətlə bildirmək istəyirəm ki, biz artıq COP26-nın ev sahibi kimi öz dəstəyimizi və təcrübəmizi təklif edirik. COP29-un uğurla keçirilməsi üçün sizə dəstək verəcəyimizə əmin olar bilərsiniz”.
Bu sözləri Böyük Britaniya və Şimali İrlandiya Birləşmiş Krallığının Baş naziri Rişi Sunak Prezident İlham Əliyevə ünvanladığı təbrik məktubunda bildirib.
Sunak COP 29-da Azərbaycana dəstək təklif edib. Bunun əhəmiyyəti nədir?
“...Təbrik məktubunda bu məsələyə ayrıca yer verlməsi Böyük Britaniyanın Azərbaycanla öz təcrübəsini bölüşmək niyyətini ortaya qoyur”
Liberal İqtisadçılar Mərkəzinin rəhbəri Akif Nəsirli “Bakı-Xəbər”ə “Beynəlxalq təşkilatların tədbirlərini keçirmiş ölkələr özlərindən sonra eyni tədbiri keçirən ölkələrə öz təcrübələrini təklif edirlər. Bu bir protokol qaydasıdır. Bundan bir neçə il əvvəl COP26 tədbirini Böyük Britaniya keçirib. İlham Əliyevin növbəti dəfə Azərbaycan Prezidenti seçilməsi ilə bağlı təbrik məktubunda bu məsələyə ayrıca yer verlməsi Böyük Britaniyanın Azərbaycanla öz təcrübəsini bölüşmək niyyətini ortaya qoyur”-deyə bildirdi.
A.Nəsirli qeyd etdi ki, məktubda COP29-la yanaşı sülh müqaviləsinə və başqa məqamlara da toxunulub və bu məktub Azərbaycanda keçirilən seçkilərin legitimliyini tanıma məktubudur.
“Digər tərəfdən, COP29 dünya üçün, xüsusən də demokratik kəsimdən ötrü çox böyük əhəmiyyətə malik bir tədbirdi. Bu tədbir dünyanın neftdən asılılğının azalması istiqamətində atılan əsas addımlardan biridir. Orada ətraf mühitə təsir də qabardılır. Amma əsas problem ətraf mühit problemi kimi götürülmür. Burada əsas məqsəd dünyanın demokratik kəsimini, o kəsim ki, dünyadakı toplam sərvətin çox az hissəsi onların payına düşür, onların sərvət, enerji asılılığını azaltmaqdır. Bilirsiz ki, dünya sərvətlərinin 40 fazi Rusyada cəmləşib, qalan 60 faizi isə dünyanın qalan ölkələrinə aiddir, burada Qərbin payı çox azdır. Ona görə də Qərb istəyir ki, dünyada alternativ enerji əldə etmək üçün sürətli gəlişmələr, inkişaf, irəliləyiş olsun və onların aslılığı azalsın. Burada onlar ümumi dünyadan dəstək istəyir. Bunun üçün də öz nüfuzlarından istifadə edirlər. Bu səbəbdən COP29-un daha səmərəli keçməsində, başda Böyük Britaniya olmaqla, bütün Qərbin, ABŞ-ın marağı var. Bu maraq naminə istəyirlər ki, Azərbaycanın ev sahibliyi ilə keçiriləcək COP29 tədbiri yaşıl enerjinin, alternativ enerjinin inkişafına daha çox təkan versin. Bu, İngiltərənin dövləti maraqlarına daxil olan məsələlərdən biridir. Məhz ona görə də bu məsələni prezidentə ünvanladığı təbrik məktubunda hərtərəfli şəkildə vurğulayır”-deyə A.Nəsirli bildirdi.
İradə SARIYEVA
