2003-2023 aralığında Azərbaycanın əldə etdikləri...
Vüqar Bayramov: “Bir neçə il əvvəl qeyri-neft ixracı 500 milyon dollar ətrafında idisə, ötən il bu, 3 milyard dollardan çox olub”
Prezident İlham Əliyev fevralın 14-də keçirilən andiçmə mərasimindəki çıxışında 2003-2023- cü illər ərzində sosial-iqtisadi inkişafla bağlı bir sıra nümunələri rəqəmlərlə göstərdi:
“Sosial sahədə görülmüş işlər də göz qabağındadır. 2003-cü ildə bizim minimum əməkhaqqı, - bəlkə də çoxlarının yadında deyil, - 9 manat idi. İndi 345 manatdır. Əlbəttə ki, bu da yetərli deyil, ancaq dinamika var və dinamika davam edəcək. Minimum pensiya 2003-cü ildə 20 manat idi. Bu gün 280 manata çatıb. Orta pensiya 500 manatdan çoxdur. Orta əməkhaqqı 940 manatdır. Əlbəttə ki, yenə də deyirəm, bu, bizi qane edə bilməz. Ancaq dinamika var, inkişaf var və ən önəmlisi, gözəl perspektivlər var”.
Bütün bu deyilənlərin fonunda, 2003-dən 2024-cü ilə qədər bu sahələrdə hansı müqayisəli nəticələr əldə etmişik? Konkret olaraq ixrac nə qədər artıb? Ümumən, bütün bunları ekspertlər necə dəyərləndirir?
“2024-cü ilin dövlət büdcəsinin ümumi xərclərinin 45 faizi, cari xərclərin 70 faizi sosial yönümlü xərclərdir”
Məsələ ilə bağlı “Bakı-Xəbər”ə açıqlama verən millət vəkili Vüqar Bayramov bunları qeyd etdi: “Son 20 ilin yekunları göstərir ki, sosial təminatın gücləndirilməsi əsas prioritetlərdən biri olub. Bu çərçivədə minimum əmək haqlarında və pensiyalarda müşahidə edilən artımlar sosial sahəyə göstərilən diqqətin göstəricisidir. Növbəti dövrdə sosial paketin gücləndirilməsi ilə bağlı həyata keçirilən tədbirlər bir daha təsdiq edir ki, yeni dövrdə sosial təminat tədbirləri öz prioritetliyini qoruyub saxlayacaq. Bu konteksdən, təbii ki, biz yeni dövrdə sosial istiqamətə əvvəlki illərdə olduğu kimi daha çox diqqətin ayrılmasını müşahidə edəcəyik. Xüsusən nəzərə almaq lazımdır ki, son 20 ildə minimum əmək haqqı 9 manatdan 340 manata qalxıb. Minmum pensiya isə 20 manatdan 280 manata qədər artıb. Bu, artıq 2024-cü ildə pensiyaların indeksasiyası, o cümlədən ehtiyac meyarlarının artırılması nəticəsində sosial yardım məbləğlərinin artırılması ilə müşahidə olunur. Eyni zamanda hərbi qulluqçuların vəzifə maaşlarının artırılması həyata keçirildi. 2024-cü ilin dövlət büdcəsinin ümumi xərclərinin 45 faizi, cari xərclərin 70 faizi sosial yönümlü xərclərdir. Bu isə ondan xəbər verir ki, 2024-cü il daxil olmaqla növbəti illərdə sosial təminatın gücləndirilməsi öz prioritetliyini qoruyub saxlayacaq. Ötən 20 il ərzində ölkədə müşahidə olunan iqtisadi artım göz qabağındadır. Məsələn, 2003-cü ildə bizim ümumi daxili məhsulumuz 7 milyard dollar idisə, ötən il bu, 72 milyard dollar olub. Bir neçə il əvvəl Azərbaycanın qeyri-neft ixracı 500 milyon dollar ətrafında idisə, ötən il bu, 3 milyard dollardan çox olub. 2026-cı ilə qədər qeyri-neft ixracının 5 milyard dolları ötəcəyi gözlənilir. Bütün bunlar sosial-iqtisadi sahədə görülən işlərin nəticəsidir”.
Vidadi ORDAHALLI
